HAKIM-HAKIM 21
21
Ndehara-ndehara man suku Benyamin
1Sanga Israel pulung i Mispa ersumpah ia man TUHAN nina, “Sada pe kami la mereken anak kami man empon suku Benyamin.” 2E maka lawes kalak Israel ku Betel, kenca bage kundul ia jah ngayak ben. Ngandung ia alu megang sorana nina, 3“O, TUHAN Dibata nu Israel, ngkai maka bagenda jadina? Engkai maka menam keri suku Benyamin, sada suku i bas bangsa Israel nari?”
4Pepagina lampas erpagi-pagi ipajekkenna sada batar-batar i je, ipersembahkenna persembahen persadan, janah deba itutungna persembahen alu bulat-bulat. 5Nungkun bangsa Israel nina, “Suku Israel si apai si la ikut pulung i adep-adepen TUHAN i Mispa enda?” (Kalak enda enggo ersumpah maka si la ikut pulung i Mispa la banci la ibunuh.) 6Mekuah ate bangsa Israel man seninana suku Benyamin e maka nina, “Sendah lit sada suku i Israel si bene. 7Uga sibahan nikapken ndehara man dilaki kalak Benyamin si tading denga? Enggo kita ersumpah man TUHAN maka la sibere anakta iempoina.”
8Sanga isungkun kalak e kerna suku si apai si la ikut pulung i Mispa, la lit idahna sekalak pe reh i Jabes nari i Gileat. 9Asum gelar tentera e ilebuhken sekalak pe la lit si ngaloi i Jabes nari. 10E maka isuruh perpulungen e sepuluh dua ribu tenterana si mbisana alu perentah bagenda, “To bunuh kalak si lit i Jabes, subuk diberu bage pe anak-anak. 11Bunuh kerina dilaki ras diberu si lanai singuda-nguda.” 12I bas rayat Jabes nari idat kalak ndai empat ratus kalak diberu singuda-nguda denga, e maka ibabana ku perkemahen i Silo, i negeri Kanaan.
13Kenca bage itenahken perpulungen e perkatan man suku Benyamin si ringan i deleng batu Rimon ngataken maka perang enggo ngadi. 14Mulih suku Benyamin, e maka ibereken kalak Israel man bana singuda-nguda si i Jabes nari si la ibunuhna. Tapi la cukup singuda-nguda e man suku Benyamin.
15Mekuah kal ate bangsa e man suku Benyamin erkiteken TUHAN enggo ngerenggangken persadan suku-suku Israel. 16E maka nina peminpin perpulungen e, “Lanai lit diberu i bas suku Benyamin. Uga sibahan muat ndehara kalak enda? 17La arus bene sada pe suku Israel i bas si sepuluh dua suku e nari. Arus sidarami dalan gelah suku Benyamin ola masap, 18tapi la banci sibereken anakta man emponna, erkiteken kita enggo ersumpah maka la sibereken anakta iempoi suku Benyamin.”
19Kenca bage iukurken kalak enda, “Lanai ndekah kerja tahun man TUHAN i Silo.” (Silo e arah Utara Betel, i Selatan Lebona ras i Timur dalan kelang-kelang Betel ras Sikem.) 20Nina man suku Benyamin, “Laweslah janah cebuni i kebun-kebun anggur, 21e maka intip. Sanga singuda-nguda Silo ndarat landek-landek kidekah pesta e, ndarat kam i bas peken anggur nari. Buat singuda-nguda e alu paksa man bandu tersada baba jadi ndeharandu ku daerah suku Benyamin. 22Adi reh bapa ntah turangna nungkun man bandu, bagenda nindu, ‘Man kami min enda, erkiteken labo ibuat kami ia jadi ndehara kami i bas peperangen. Janah erkiteken labo iberekenndu ia man kami, e maka labo kam ersalah ngelanggar sumpahndu.’ ”
23Ilakoken suku Benyamin bagi si ikataken peminpin perpulungen e. Ipilihna singuda-nguda si sangana landek-landek i Silo jadi ndeharana e maka ibabakenna. Kenca bage mulih ia ku daerahna, ipantekina ka kuta-kutana, e maka i jah me ia ringan. 24I bas paksa e lawes ka bangsa Israel i Mispa nari, janah tiap kalak mulih ku sukuna ras ku keluargana ras ku tanehna.
25I bas paksa si e la lit raja i Israel. E maka tiap kalak erbahan bagi atena ngena. #Hak 17:6
Currently Selected:
HAKIM-HAKIM 21: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
