HAKIM-HAKIM 20
20
Israel ersikap erperang
1Kerina bangsa Israel mulai i bas daerah Dan i Utara nari seh ku Berseba i Selatan, bage pe i Gileat nari arah Barat njabap pendilo e. Ersada ia kerina ngadap TUHAN i Mispa. 2Kerina peminpin suku Israel reh ku perpulungen bangsa Dibata enda janah tentera si erdalan nahe lit 400.000 kalak teremna. 3Paksa e enggo ibegi kalak Benyamin maka kerina bangsa Israel si debanna enggo pulung i Mispa.
Nina bangsa Israel nungkun, “Turiken kuga kejahaten e jadi.” 4E maka ngerana kalak Lewi si ndeharana enggo mate ibunuh ndai nina, “Ndeharangku ras aku erdalan ku Gibea erberngi i daerah suku Benyamin e. 5Dilaki-dilaki i kuta Gibea reh ngelawan aku, ikepungna rumah e berngi-berngi. Ibunuhna atena aku, tapi iperkosana ndeharangku e maka mate ia. 6Kubuat ndeharangku e, kukeret-keret e maka kubereken sada ngkeret man tiap suku Israel si sepuluh dua. Kalak Benyamin e enggo erbahan si jahat ras njuruken man banta kerina. 7Kerina kita bangsa Israel si pulung i jenda, kai arus si bahan kerna si e?”
8Kerina bangsa e tedis ras-ras e maka nina, “Sada pe kita ola mulih ku kutana subuk si ringan i kemah ntah rumah. 9Bagendalah si bahan: si bahan tikam tanduk milih piga kalak merang Gibea. 10Sepersepuluhna i bas bangsa Israel nikapken pangan man tentera e, janah si debanna lawes ngukum Gibea kerna perbahanenna si jahat si enggo ilakokenna i Israel.” 11Bage me kerina dilaki-dilaki i Israel ersada guna sada tujun, e me merang kuta e.
12Isuruh suku-suku bangsa Israel persuruhen ku kerina daerah suku Benyamin ngatakenca, “Kejahaten kai si enggo ibahanndu e? 13Genduari endeskenlah kalak jahat Gibea ndai, gelah ibunuh kami maka masap si jahat e i bas Israel nari.” Tapi la diate suku Benyamin pe suku-suku Israel si deban. 14E maka i bas kuta-kuta suku Benyamin si deban nari pe rehen kerina ku Gibea ngelawan suku-suku Israel si deban. 15-16I bas wari e ipepulungna i bas kuta-kuta suku Benyamin si deban nari lit buena dua puluh enem ribu tentera. Tambah si e, ipepulung kalak Gibea tentera pilihen pitu ratus kalak jaluk. Tiap kalak ngasup ngkalibawangi selambar buk alu batu, janah la enggo la kena. 17Suku Israel si deban ipepulung lit buena empat ratus ribu tentera.
Perang ngelawan suku Benyamin
18Bangsa Israel lawes ku ingan ersembah i Betel, janah i jah isungkunna Dibata nina, “Suku si apai lebe ngelawan suku Benyamin?”
Nina TUHAN erjabap, “Suku Juda.”
19E maka lampas erpagi-pagi mulai erdalan bangsa Israel kenca bage ibahanna perkemahen i deher kuta Gibea. 20Iperangna tentera suku Benyamin, iaturna tenterana erbaris petala-tala ras Gibea. 21Ndarat tentera Benyamin i bas kuta e nari janah ope denga ben wari, enggo ibunuhna dua puluh dua ribu tentera Israel. 22-23E maka lawes bangsa Israel ku ingan ersembah. Kenca bage ngandung ia i adep-adepen TUHAN seh ben. Nina nungkun TUHAN, “Arus denga kin kami lawes ku peperangen ngelawan senina kami suku Benyamin?”
Nina TUHAN erjabap, “Ue, laweslah.”
E maka enggo gedang ate tentera Israel. Kenca bage iaturna barisen tenterana i bas ingan si nderbih ka. 24Tentera Israel maju ka pedua kaliken ngelawan suku Benyamin. 25E maka pedua kaliken suku Benyamin ndarat i Gibea nari, janah i bas paksa si e ibunuhna sepuluh waluh ribu tentera Israel si terpilih. 26Jenari kerina bangsa Israel lawes ngandung ku Betel. Kundul ia i adep-adepen TUHAN janah la man seh ben. Ipersembahkenna persembahen persadan ras persembahen tutungen i adep-adepen TUHAN. 27-28Peti Perpadanen Dibata lit i Betel i bas paksa si e, janah Pinehas anak Eleasar kempu Harun si ertugas jadi imam. Bangsa e nungkun man TUHAN nina, “Arus denga kin kami lawes ngelawan senina kami suku Benyamin ntah lang?”
Nina TUHAN njabapsa, “Lawan. Pagi Kubereken kemenangen man bandu.”
29E maka itama bangsa Israel tenterana cebuni sekelewet Gibea. 30Kenca bage, petelu kaliken bangsa Israel maju ngelawan tentera suku Benyamin, iaturkenna tenterana petala-tala ras Gibea bagi si bahanna ope si e. 31Ndarat suku Benyamin, janah la iarapna enggo ndauh ia sirang ras kuta e. Bagi si enggona mulai ibunuhna piga-piga kalak Israel i daerah si salang arah dalan ku Betel ras Gibea. Ibunuhna kira-kira telu puluh kalak Israel. 32Nina suku Benyamin, “Enggo talu sibahan ia bagi si enggona.”
Tapi irencanaken kalak Israel mundur, gelah mabai kalak Benyamin e reh ku dalan-dalan dingen ndauh sirang ras kuta e. 33Asum bagin tentera Israel mundur janah ipepulungna bana mulihi i Baaltamar, kalak Israel si i sekelewet Gibea rempet ndarat i bas inganna cebuni i daerah si erbatu-batu i kelewet kuta peperangen e. 34Kalak ndai pilihen i bas belang-belang Israel, teremna lit sepuluh ribu kalak. E maka asum si 10.000 kalak e merang Gibea, jadi me peperangen si mesangat. Sitik pe la isangka kalak Benyamin maka kentisik nari talu me ia. 35Ibereken TUHAN kemenangen man Israel ngelawan tentera Benyamin. Ibunuh Israel 25.100 kalak tentera suku Benyamin i bas wari e; 36e maka ieteh suku Benyamin ia enggo talu.
Dalanna maka kalak Israel menang
Sada bagin tentera Israel mundur i suku Benyamin nari, erkiteken tek ia man tentera si cebuni i sekelewet Gibea. 37Tentera si cebuni e pedas-pedas kiam ku Gibea, merap ia ku kuta e, e maka ibunuhina kerina si lit i je. 38Tentera Israel ras kalak si cebuni ndai enggo lit arihna erbahan tanda. Kenca idahna asap erdipul ku das i bas kuta e nari, 39kalak Israel si erperang i darat erkusur mulihken. Tupung si e suku Benyamin e enggo munuh telu puluh kalak Israel. Nina i bas ukurna, “Enggo talu kalak ah sibahan bagi si enggona.” 40Kenca bage teridah me tanda ndai, gebuk api mulai nangkih i bas kuta e nari. Suku Benyamin nulih ku pudi janah sengget ngidah kuta e enggo keri ipan api. 41Kenca bage bangsa Israel mulihken ngelawan, e maka enggo gugup suku Benyamin, sabap ietehna maka nandangi kernep me ia. 42Mundur ia i bas kalak Israel e nari, kiam ku ingan si salang, tapi lanai banci pulah. Enggo terkepung ia kelang-kelang tentera Israel ras kalak si ndarat i bas kuta e nari, kenca bage ikernepken ia. 43Enggo isidingi Israel musuhna e maka iayakina musuh e seh i Timur Gibea, ibunuhina gedang-gedang dalan. 44Lit sepuluh waluh ribu kalak tentera suku Benyamin si mbisana mate. 45Si debanna mulihken janah kiam ku daerah si salang, ku deleng batu i Rimon. Lit lima ribu kalak ibunuh i bas dalan e. Si lebihna iayak tentera Israel terus ku Gidom, ibunuhna dua ribu kalak. 46Kerina, lit dua puluh lima ribu suku Benyamin ibunuh i bas wari e, janah kerina si mate e tentera si mbisa.
47Tapi lit 600 kalak si pulah ku daerah si mesawang ku deleng batu i Rimon, e maka i jah ia tading empat bulan dekahna. 48Tapi Israel mulihken ngelawan janah munuhi suku Benyamin, dilaki ras diberu, anak-anak ras asuh-asuhen. Icilukna tiap kuta i bas daerah e.
Currently Selected:
HAKIM-HAKIM 20: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
