JESAYA 65
65
Ukumen man kalak si ngelawan Dibata
1Nina TUHAN, “Si tuhuna enggo me ersikap Aku ndengkehken pertoton bangsangKu, tapi la ia ertoto. Enggo ersikap Aku maka banci ijumpaina, tapi la icubakenna pe ndarami Aku. Bangsa e la ertoto man bangKu, aminna pe Aku tetap ersikap ngaloisa, ‘Enda Aku, banci kam Kusampati.’ #Rom 10:20 2La erngadi-ngadi Kududurken tanKu ngalo-ngalo bangsangKu si pemberontak, aminna pe lepak rusur perbahanenna, janah idalanina nge dalanna jine. #Rom 10:21 3Rusur ibahanna ateKu nembeh. Ipersembahkenna persembahen man dibata-dibata si deban i bas peken-peken ras itutungna kumenen i babo batar-batar. 4Sanga berngi lawes ia ku guha kuburen-kuburen, nungkuni begu kalak si enggo mate. Ipanna daging babi dingen inemna kuah daging si ipersembahkenna man dibata-dibata si deban. 5Jenari ikatakenna man kalak si deban, ‘Ola deheri kami, kami enggo badia kal, e maka pantang idadapndu!’ Ciga ateKu ngenehen kalak si bage; pernembeh ateKu man bana gara desken api si la ernimpet-nimpet.
6Enggo Kuputusken erbahan pembalasen nandangi kejahatenna. La Aku nggit ngelupaken perbahanenna, janah la banci lang Kuukum ia, 7erkiteken dosa-dosana ras dosa nini-ninina. Itutungna kumenen man dibata-dibata si deban i das uruk-uruk janah ibelaskenna si jahat kerna Aku. Erkiteken si e Kuukum me ia sue ras perbahanenna si enggo lepas.”
8Nina ka TUHAN tole, “Labo lit kalak si encedaken buah anggur si mehuli tapi ibahanna nge anggur i bas buah si mehuli e nari. Bage me pe, labo ateKu engkernepken bangsangKu kerina, tapi Kukelini kerina kalak si ngelakoken sura-surangKu. 9Kupasu-pasu kalak Israel kesusuren suku Juda, janah taneh deleng-delengKu Kubereken jadi sikerajangen kesusurenna. Bangsa pilihenKu si ngelakoken sura-surangKu, ringan me i je. 10Isembahna Aku janah ipermakanina biri-biri ras lembuna ku mbalmbal i bas Kendit Saron i kenjahe, janah i bas Baluren Kesusahen i kenjulu. #Jos 7:24-26
11Tapi nasipndu labo bage, o kam si nadingken Aku, si la mperdiateken Sion, delengKu si Badia, bage pe kalak si nembah Gat ras Meni, si igelari dibata-dibata kesangapen ras nasip. 12Kam enggo itentuken maka mate ibunuh kalak, erkiteken la ialoindu tupung kam Kulebuh, janah la ibegikenndu tupung Aku ngerana. Ulin akapndu erbahan si la ngena ateKu janah ngelakoken si jahat. 13E maka Kukataken man bandu maka kalak si nembah ras si erkemalangen ngikutken Aku, cukup pangan ras inemenna, tapi kam muas dingen melihe akapndu. Ia malem atena, tapi kam mela akapndu. 14Ia rende alu meriah, tapi kam tangis erkiteken getem pusuhndu. 15Bangsa pilihenKu make gelarndu pagi i bas numpahi kalak. Aku, TUHAN si Erdolat, la banci lang munuh kam. Tapi man kalak si ngikutken Aku, Kubereken gelar si mbaru. 16Kasa kai kalak si lit i bas negeri e si atena mindo pasu-pasu, ipindona pagi gelah Dibata si tuhu-tuhu masu-masu ia. Ise ngangkat sumpah, i bas gelar Dibata si tuhu-tuhu e pagi ia ersumpah. Kesusahen i bas paksa si enggo lepas, masap me janah ilupaken.”
Tinepa si mbaru
17Nina TUHAN, “Kutepa doni si mbaru ras langit si mbaru. Kejadin-kejadin si enggo lepas ilupaken kerina. #Jes 66:22; 2Pet 3:13; Ket 21:1 18Ersurak ras ermeriahlah seh rasa lalap erkiteken kai si Kutepa. Jerusalem si mbaru si Kutepa e, dem pagi alu keriahen janah kalak si ringan i je malem atena nggeluh. 19Aku jine pe dem alu keriahen erkiteken Jerusalem ras bangsangKu si ngianisa. Lanai lit kalak tangis i je, lanai lit kalak erlebuh mindo penampat. #Ket 21:4 20Anak-anak lanai mate tupung ia gara-gara denga, janah umurna gedang pagi kerina. Kalak si umurna seratus tahun ikataken ia nguda denga. Kalak si mate ope denga umur si bage, e tandana maka Kuukum ia. 21-22Ipajekken bangsangKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna, nggedang pagi umur bangsangKu, bali ras batang kayu i kerangen. Kasa kai ulihna latih, tuhu-tuhu kal inanamina. 23Kelatihenna la sia-sia, janah anak-anakna pe la jumpa cilaka. Kupasu-pasu ia ras kerina kesusurenna terus ku bas paksa-paksa si reh. 24Ope denga ia erlebuh enggo Kualoi, sanga ia ngerana denga enggo Kubegiken. 25Anak biri-biri radu nggagat ras serigala; singa pe man dukut bali ras lembu, janah nipe lanai man kebiaren. I Sion, delengKu si badia, lanai lit si ncedai tah pe si jahat.” #Jes 11:6-9
Currently Selected:
JESAYA 65: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
