JESAYA 66
66
Ukumen man bangsa-bangsa
1Nina TUHAN, “Langit e me kap kursi kinirajanKu, doni e me ingan dedehen nahengKu. Dage, rumah si kuga kin banci ipajekkenndu man bangKu, janah ingan si kuga kin banci man inganKu tading? #Mat 5:34-35; 23:22 #Perb 7:49-50 2Aku jine kap si nepa si nasa lit! Ngena ateKu nandangi kalak si meteruk rukur dingen jera, si mbiar ras erkemalangen man bangKu.
3Tapi bangsa e, ngelakoken bagi ate-atena. Nggeleh manusia man persembahen bali nari nge akapna ras nggeleh lembu jadi persembahen. Mpersembahken anak biri-biri bali akapna ras menggelken kerahung biang; mpersembahken buah gandum bali akapna ras mpersembahken dareh babi; mpersembahken kumenen bali akapna ras ertoto man berhala-berhala. Meriah akapna erbahan persembahen si pantang e. 4Erkiteken si e Kudabuhi me ia alu mara, e me mara si ibiarina jine, sabap la lit si ngaloi tupung Aku erlebuh, la lit si megikenca tupung Aku ngerana. Ulin akapna erbahan si la ngena ateKu ras ngelakoken si jahat.”
5Begikenlah kai si ikataken TUHAN, o kam si mbiar dingen nehken peratenNa. Nina, “Erkiteken erkemalangen kam man bangKu, sada bagin i bas bangsandu ersegat ate man bandu janah ipedauhna kam. Iuru-uruna kam, janah nina, ‘Berelah TUHAN encidahken kemulianNa dingen ngkelini kam, maka idah kami kam ermeriah ukur.’ Tapi ia jine nge pagi mela akapna! 6Begiken! Sora megang i bas kuta, bage pe sora si lit i bas Rumah Pertoton, e me sorangKu ngukum imbang-imbangKu.
7KutangKu si badia bali ras sekalak pernanden si rempet mupusken anakna, aminna langa pe igejapna mesui. #Ket 12:5 8Lit kin kalak si enggo ngidah tah megi si bage? Lit kin bangsa si enggo ipetubuh i bas sada wari? Lang! Tapi bangsa Israel enggo tubuh aminna kentisik denga gia igejap Sion mesui mupussa. 9Banci kin Kuambati bangsangKu tubuh, adi enggo ia Kuarak-arak seh ku bas paksa tubuh? Lang! Tapi Kubere nge tubuh,” bage nina TUHAN.
10Ermeriah ukurlah ras Jerusalem, ersuraklah,
o kam kerina si ngkelengi kuta e,
kam si mbaruenda erceda ate erkiteken ia,
genduari ermeriah ukurlah ras ia.
11Inanamindu me seh besur kebayakenna,
bali ras sekalak anak ngincep susu nandena.
12Nina TUHAN tole, “Kubereken man bandu kebayaken si tahan rasa lalap, kebayaken bangsa-bangsa maler pagi man bandu desken lau mbelin si la pernah kerah. Kam bali pagi ras sekalak danak-danak si ipepinem nandena, si iangkip ras iampu alu dem keleng ate. 13Kuapuli kam i Jerusalem, bali ras nande ngapuli anakna. 14Tupung idahndu si enda jadi, meriah pagi akapndu; si e erbahanca kam megegeh dingen mejuah-juah. I je ietehndu me pagi maka Aku, TUHAN, Kusampati kalak si erkemalangen man bangKu, janah Kucidahken rawangKu man imbang-imbangKu.”
15Reh pagi TUHAN alu api. IersakNa kabeng angin kaba-kaba lako ngukum kalak si nembeh ateNa. 16Alu api ras pedang ibunuhNa pagi kerina kalak si ijumpaiNa ersalah i bas doni enda; janah nterem kal pagi si ibunuh.
17Nina TUHAN, “Paksa ukumen enggo seh nandangi kalak si mersihken dirina lako ersembah man dibata-dibata si deban, si lawes siarak-araken ku peken-peken keramat, bage pe kalak si man babi ras menci tah pe pangan-pangan pantangen si deban. 18Kueteh nge perukurenna ras perbahanenna. Reh nge Aku pepulung kerina kalak i bas kerina bangsa nari. Tupung ia pulung kerina, idahna me kemulianKu, 19janah itehna me maka Aku nge si ngukum ia.
Tapi deba Kupediat nggeluh janah Kusuruh ia ku bangsa-bangsa e ras ku negeri-negeri si ndauh si langa pernah megi gelarKu si termurmur, tah pe ngidah kemulianKu ras kuasangKu: ku Sepanyol, Libia ras ku Lidia, si terberita kerna jelmana beluh erpanah, bage pe ku Tubal ras ku Junani. Ku tengah-tengah bangsa-bangsa enda me pagi iberitakenna kerna kemulianKu. 20I bas negeri-negeri e nari, ibabana pagi mulih senina-seninandu, jadi luahna man bangKu. Alu ngersak kuda, kelede ras unta, bage pe gereta perang ras gereta kuda, itaruhkenna me pagi senina-seninandu e ku delengKu si Badia i Jerusalem bali ras kalak Israel naruhken persembahen gandumna ku Rumah Pertoton, tare inganna si bersih rikutken aturen agamana. 21Deba Kubahan ia jadi imam-imam, deba jadi kalak Lewi.
22Bali ras doni si mbaru ras langit si mbaru la ermasap-masap erkiteken kuasangKu, bage ka pe kesusurenndu ras gelarndu lalap la masap. #Jes 65:17; 2Pet 3:13; Ket 21:1 23Tep-tep Kerja Bulan si Mbaru ras wari Sabat, kerina kalak i bas tep-tep bangsa nari reh pagi nembah i adep-adepenKu,” bage nina TUHAN, 24“Janah tupung ia berkat idahna me mait kalak si mberontak ngelawan Aku mbarenda. Bernga si mangani dagingna rasa lalap la ermate-mate janah api si nutung ia rasa lalap la inimpeti. Ngidah si e ciga ate kalak kerina.” #Mrk 9:48
Currently Selected:
JESAYA 66: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
