JESAYA 54
54
Kekelengen TUHAN man Israel
1O Jerusalem, kidekah enda bali kam ras diberu si la mupus
tapi genduari kam enggo banci rende dingen ersurak alu meriah.
Nterem me anakndu,
teremen asa anak pernanden si la pernah itadingken perbulangenna. #Gal 4:27
2Pebelinilah kemahndu, ola tanggungi,
pegedangi tinali-tinali dingen peteguhi pantuk-pantukna.
3Sabap ipebelangi me tanehndu ku kerina dampar,
janah kuta-kuta si lume, dem pagi mulihi.
Negerindu si genduari ikuasai bangsa si deban,
mulai ka pagi jadi sikerajangenndu.
4Ola kam mbiar sabap lanai pagi mela iakapndu,
lanai pagi megombang kalak man bandu.
Lupa me kam pagi kerna kini-la-patuhenndu tupung ngudandu,
bage pe kai si man kemelanken sanga kam mbalu.
5Si nepa kam e me perbulangenndu,
gelarNa e me TUHAN si Mada Kuasa,
Dibata si Badia nu Israel e me kap kekelengenndu,
IA me si merentah doni enda kerina.
6Kam desken sekalak ndehara si nguda denga
si erceda ate erkiteken itadingken perbulangenna.
Tapi ilebuh TUHAN kam mulihi nina,
7“Kentisik ngenca kam Kutadingken;
Kulegi me kam mulihi alu kekelengen si mbelin.
8Erkiteken gara pernembeh ateKu,
la Aku nggit encidahken ayongKu,
tapi labo aku lalap nembeh man bandu.
Jenari rasa lalap Kucidahken kekelengenKu.”
Bage nina TUHAN, Penebusndu.
9“Tupung paksa Nuah, erpadan Aku nai,
ndigan pe lanai Kubahan kelenglengen ndemi doni.
Genduari erpadan Aku, ndigan pe lanai kam Kutembehi;
lanai kam Kuukum, lanai Kurawai. #Kej 9:8-17
10Bicara deleng-deleng miser gia, uruk-uruk pe mundu-undu,
tapi keleng ateKu tetap la miser i bas kam nari,
janah padan dame si Kubahan lalap paguh la mundu-undu.”
Bage nina TUHAN si ngkelengi kam tetap.
Jerusalem si mbaru
11Nina TUHAN,
“O Jerusalem, kuta si sangana mesera,
kuta si medungu, si la lit ngapulisa.
Kupanteki ka kam mulihi i babo batu sapir si meherga,
janah kerina batu batandu kuleketken alu semin si mejilena. #Ket 21:18-21
12Menara-menarandu Kubahan batu delima
tembok-tembokndu batu permata;
pintu-pintu gerbangndu batu si erndilap-erndihawa
rupana ernala-nala, bagi api si gara.
13Aku jine kap si ngajari pendudukndu,
e maka senang dingen dame geluhna kerina. #Joh 6:45
14Kebujuren ras kebenaren mahanca kam megegeh,
lanai lit si nindih kam, lanai lit si man kebiaren.
15Adi iperangi kalak kam, labo bekasKu nuruh;
ise si ngelawan kam la banci lang ndabuh.
16Aku kap si njadiken tukang besi,
si pegara api arang lako nepa senjata.
Aku ka nge si njadiken tentera
si make senjata e lako munuhi.
17Tapi la lit senjata si banci nakiti kam;
janah kasa kai si ngaduken kam italukenndu i bas pengadilen.
Kerina suruh-suruhenKu Kubela;
Kubereken bana kemenangen.”
Bage nina TUHAN.
Currently Selected:
JESAYA 54: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
