JESAYA 3
3
Jerusalem rontang dingen serbut
1Genduari seh paksana TUHAN, e me TUHAN si Mada Kuasa, ngangkut kerina keperlun geluh i Jerusalem ras Juda nari. Iangkutna me i jenari lau ras pangan; janah kerina penalemenna: 2pahlawan-pahlawan ras tentera-tenterana, hakim-hakim ras nabi-nabi, kalak si beluh ngoge retak tan ras pejabat-pejabat negeri, 3puanglima-puanglima ras peminpin-peminpin masyarakat, perpolitik, guru mbelin ras kerina kalak si make kinigurun guna engkuasai kejadin-kejadin. 4Bangsa e ipelepas TUHAN iperentah danak-danak. 5Sekalak-sekalak nipu temanna. Kalak si nguda lanai mehamat man orang tuana, janah kalak si la meherga megombang man kalak si ermulia.
6Seh me paksana kalak si sada terpuk milih sekalak i bas seninana jadi peminpin janah nina man bana, “Kam lit denga uisndu; e maka kamlah jadi peminpin kami i bas paksa gulut enda.”
7Tapi erjabap ia nina, “Ola aku! La aku ngasup nampati kam. Aku pe labo lit nakanku ras uisku. E maka ola aku angkatndu jadi peminpinndu!”
8Jerusalem enggo ndabuh! Juda enggo runtuh! Sabap kerina kata ras perbahanenna ngelawan TUHAN; alu la biar-biaren ilawanna Dibata. 9Arah ayona pe teridah maka ia enggo ersalah. Alu terang-terangen erdosa ia bagi kalak Sodom. E maka bene me ia, bene erkiteken perbahanenna jine.
10Kalak bujur la banci lang malem atena, janah si mehuli reh man bana. Bekas pendahinna si mehuli banci inanamina. 11Tapi kalak jahat la banci lang bene, kejahaten si ibahanna man kalak, genduari ibahan ka man bana.
12Kalak si pebungaken duit nindih bangsangKu, bangsangKu ikuasai perutangenna. O bangsangKu peminpin-peminpinndu mabai kam papak, e maka lanai ietehndu dalan apai si man dalanenndu.
TUHAN ngerunggui bangsaNa
13Iaduken TUHAN me bangsaNa; irungguiNa me bangsa e. 14Kerina peminpin bangsa e iadukenNa, janah enda me pengadunNa, “Enggo irampasindu kebuh-kebun anggur, janah rumahndu dem alu barang-barang rampasen i bas kalak musil nari. 15Lit kin hakndu nindih bangsangKu bage pe muat alu paksa i bas kalak musil nari?” Bage nina TUHAN si Erdolat si Mada Kuasa.
Persinget kerna ukumen man diberu-diberu Jerusalem
16Nina TUHAN, “Nehen me uga gombangna diberu-diberu Jerusalem! Jurgak ia erdalan, matana meliar, pengodakna ilebih-lebihkenna, janah gelang nahena erdering-dering. 17Tapi Kuukum me ia; takalna dem ugah, seh maka takalna melinang bagi takal tabu.”
18Seh me paksana isentapken TUHAN i bas diberu-diberu Jerusalem nari kai si igombangkenna: perhiasen takalna, gelang nahena, burana, 19gelang tanna, uis penutup ayona, 20tudungna, ajimat si ipakena i bas tan ras awakna, 21cincin jari-jari ras cincin si lit i bas igungna, 22kerina paken kerja-kerjana si mejile, baju panasna, baju panjangna, ras dompetna; 23baju nipesna, selendangna bage pe uis nipes si ipakena i bas takalna.
24Genduari erminak wangi ia, tapi pagi mbau me ia; genduari mejile genditna, tapi pagi nali pasa jadi sambarna; bukna si mejile merurus kerina, seh maka ia jadi takal tabu; genduari uisna mejile kerina, tapi pagi igantiken alu uis guni; genduari mejile ia tapi salih me ia jadi mejin seh maka mela kal akapna.
25Kerina dilaki i bas kuta e, subuk si megegehna pe, mate me i bas perang. 26Kerabangen-kerabangen kuta e dem pagi alu kalak si tangis ras ngandung, janah kuta e jine bali ras sekalak diberu manjang-anjang kundul i bas abu taneh.
Currently Selected:
JESAYA 3: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
