JESAYA 2
2
Dame seh rasa lalap
(Mi 4:1-3)
1Enda me kata si ibereken Dibata man Jesaya anak Amos kerna Juda ras Jerusalem.
2I bas wari-wari si arah pudi pagin
deleng-deleng ingan Rumah Pertoton e pajek,
e me pagi deleng si meganjangna kal,
ganjangen asa kerina uruk-uruk.
Bangsa-bangsa reh erdemuyung ku je.
3Janah nina bangsa-bangsa e,
“Nangkenglah kita ku Deleng TUHAN
ku Rumah Pertoton Dibata Israel.
Kai ateNa si bahan iajarkenNa man banta;
arah dalan si enggo ipilihNa erdalan me kita.
Sabap pengajaren TUHAN i Jerusalem nari kap rehna,
i Sion nari ngerana IA.”
4Perjengilen i bas bangsa-bangsa idungiNa,
e maka itepa kalak me pedangna jadi gigi tenggala
janah lembing jadi sabi-sabi ibahanna.
Lanai ndigan pe bangsa-bangsa lawes erperang,
lanai ndigan pe ia ersikap-sikap ertempur. #Joel 3:10; Mi 4:3
5E maka kesusuren kerina Jakup, marilah erdalan kita, i bas terang si ibereken TUHAN man banta.
Kalak si meganjang rukur ikernepken me
6O Dibata, enggo itadingkenNdu bangsaNdu, kesusuren Jakup. Negeri enda enggo dem alu kalak si make kinigurun si asalna i Timur ras i Pilisti nari. Bangsa enda enggo ngikutken adat bangsa si deban. 7Negerina dem alu pirak ras emas, janah erta-ertana la ersibar buena. Negerina dem alu kuda, janah gereta perangna lanai terbeligai. 8Negerina dem alu berhala-berhala, janah isembahna gana-gana bekas tanna erbahan.
9Erkiteken si e tiap kalak la banci la ipeteruk gelah juru akapna. Ola alemi salahna o TUHAN!
10Cebuni me ia pagi i bas guha-guha si lit i bas uruk-uruk batu, tah lubang man inganna cebuni i bas taneh, lako nilahken pernembeh ate TUHAN ras sinalsal kemulianNa. #Ket 6:15; 2Tes 1:9 11Reh me warina maka ukur manusia si meganjang ipeteruk, janah kinigombangenna imasapken. Kenca bage TUHAN saja ngenca ipemuliaken. 12I bas wari e, TUHAN si Mada Kuasa la banci lang ndabuhken kerina kalak si erkuasa, bage pe kalak si rukur meganjang ras megombang. 13Batang kayu cemara si meganjang i Libanon bage pe kerina batang kayu si mbelin i Basan ikernepkenNa me. 14IpekenditNa kerina deleng-deleng ras uruk meganjang, 15bage pe kerina menara si meganjang ras kerina tembok benteng. 16Kapal-kapal si galang ras mejile pe igedapkenNa. 17-18Ukur manusia si meganjang ipeteruk, janah kinigombangen manusia imasapken. Gana-gana masap kerina, janah i bas wari e TUHAN saja ngenca ipemuliaken.
19Manusia cebuni i bas guha-guha si lit i bas uruk-uruk batu, tah pe lubang man inganna cebuni i bas taneh lako nilahken pernembeh ate TUHAN ras sinalsal kemulianNa, asum IA reh ngugur doni enda. 20Adi wari e enggo seh, iambekken kalak me gana-gana emas ras pirak si enggo ibahanna, itadingkenna man sikerajangen menci ras arip. 21Asum TUHAN reh ngugur doni enda, cebuni me manusia i bas lingling ras guha-guha si lit i bas uruk-uruk batu lako nilahken pernembeh ate TUHAN ras sinalsal kemulianNa.
22E maka olanai ernalem man manusia si ermasap-masap, sabap kai kin ergana ia?
Currently Selected:
JESAYA 2: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
