ESRA 9
9
Perjabun kalak Jahudi ras kalak si la Jahudi tereteh man Esra
1Kenca si e ndai enggo dung kerina, reh piga-piga kalak pengulu bangsa Israel ndahi aku, janah ikatakenna maka bangsa e, bage pe imam-imam ras kalak Lewi, la iserapkenna bana i bas anak negeri si pedeher ras ia, e me kalak Amon, Moap, ras Mesir, ntah pe i bas kalak Kanaan, Heti, Peris, ras Amori nari. Perbahanenna bali melketna ras perbahanen bangsa-bangsa e. 2Dilaki bangsa Jahudi ngempoi singuda-nguda bangsa si deban, janah erkiteken si e bangsa Dibata enggo ilangketi bangsa si deban. Pengulu ras pegawai-pegawai me si melalana erbahan salah. 3Kenca kubegi si enda, kucaingken pakenku, kuruah buk takalku ras janggutku, jenari kundul aku alu dem ate ceda. 4Kundul aku i je alu ate ceda ngayak seh paksana mpersembahken persembahen si karaben. Erkiteken si e mulai me kalak pulung i sekelewetku, e me kalak si mbiar erkiteken kai si ikataken Dibata Israel kerna dosa-dosa kalak si enggo mulih i bas pembuangen e nari.
5Kenca enggo seh paksa persembahen karaben, keke aku i bas inganku erceda ate e nari, jenari alu ruisken paken si merigat-rigat e, erjimpuh aku, kuangkat duana tanku ertoto man TUHAN Dibatangku. 6Ningku ertoto, “O, Dibatangku, lanai kal aku pang nare kempak Kam perban mela kal kuakap. Sabap dosa-dosa kami enggo ergun-gun janah ganjangen asa takal kami. Salah kami enggo asa langit ganjangna. 7Mulai i bas paksa nini-nini kami nari seh genduari kami bangsaNdu, enggo mbelin kal dosa kami. Erkiteken dosa-dosa kami, raja-raja kami ras imam-imam kami enggo ndabuh ku bas tan raja-raja si deban, janah kami enggo itampul, irampuk, janah ibuang ku negeri si deban. Lanai tanggung penggombangi kalak man kami, janah seh genduari pe bage denga. 8Tuhu genduari, i bas paksa si kentisik, O TUHAN Dibata kami, enggo melias ateNdu kempak kami janah piga-piga kalak i bas kami nari enggo ibereNdu pulah i bas perbudaken nari janah nggeluh alu teneng i bas ingan si badia enda. Enggo iberekenNdu man kami kegeluhen si mbaru aminna gia kami iperkawanken. 9Gelgel nari kami enggo jadi budak, tapi la itadingkenNdu kami. Ngena ate raja-raja Persia man kami ibahanNdu, e maka ipelepasna kami tetap nggeluh ras majekken Rumah Pertoton mulihi, si gelgel nari enggo runtuh, janah banci ndatken ketenengen i Juda ras Jerusalem enda.
10Tapi genduari, o Dibata kuga nari ningkami ngerana man baNdu kenca kerina kejadin enda? Enggo ka kami mulihken ngelanggar perentah-perentahNdu 11si iberekenNdu arah suruh-suruhenNdu, nabi-nabi. Ituriken nabi-nabi e man kami maka negeri si nandangi iingani kami e negeri si melket, sabap kalak si ngianisa ndemi negeri e kenjahe nari seh ku kenjulu alu perbahanen si pantang dingen melket. 12Ikataken nabi-nabi e man kami maka la banci ndigan pe kami siempon ras bangsa e janah la banci isampati kami i bas ia ndarami kebayaken ntah pe nehken sura-surana, adi kin ate kami tetap man ulih taneh e dingen ngendeskenca man kesusuren kami. #Kel 34:11-16; Ul 7:1-5 13Tuhu enggo iukumNdu kami erkiteken salah dosa kami. Tapi arah ukumen e pe ieteh kami maka ukumen si isehkenNdu man kami nahangen asa si patut ialoken kami sabap enggo ipelepasNdu kami tetap nggeluh. 14Adi bage banci kin mulihi kami la mperdiateken perentah-perentahNdu janah siempon ras bangsa si jahat enda? Adi bage perbahan kami, la banci la merawa. Kam kempak kami seh maka ikernepkenNdu kami seh keri janah la lit sada pe si tading. 15TUHAN Dibata Israel, bujur kap Kam, tapi enggo ipelepasNdu kami tetap nggeluh. Iakuken kami kesalahen kami man baNdu. Si tuhuna la lit hak kami reh ku adep-adepenNdu.”
Currently Selected:
ESRA 9: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.