ESRA 8
8
Kalak si mulih i taneh pembuangen nari
1Enda me daftar pengulu terpuk si ibuang ku Babilon jenari mulih ras Esra ku Jerusalem asum Artasasta jadi raja:
2-14Gersom, i bas terpuk Pinehas nari
Daniel, i bas terpuk Itamar nari
Hattus anak Sekania, i bas terpuk Daud nari
Sakaria, i bas terpuk Paros nari, rikut ras 150 kalak dilaki i bas terpukna nari (lit surat terombona)
Eliehunai anak Serahia, i bas terpuk Pahat Moap nari, rikut ras 200 kalak dilaki
Sekanya anak Jahasiel, i bas terpuk Sattu nari, rikut ras 300 kalak dilaki
Ebed anak Jonatan, i bas terpuk Adin nari, rikut ras 50 kalak dilaki
Jesaya anak Atalia, i bas terpuk Elam nari, rikut ras 70 kalak dilaki
Sebadia anak Mikael, i bas terpuk Sepatia nari, rikut ras 80 kalak dilaki
Obaja anak Jehiel, i bas terpuk Joap nari, rikut ras 218 kalak dilaki
Selomit anak Josipia, i bas terpuk Bani nari, rikut ras 160 kalak dilaki
Sakaria anak Bebai i bas terpuk Bebai nari, rikut ras 28 kalak dilaki
Johanan anak Hakkatan, i bas terpuk Asgat nari, rikut ras 110 kalak dilaki
Elipelet, Jewel, ras Semaya, i bas terpuk Adonikam nari, rikut ras 60 kalak dilaki (kalak enda pudin mulih)
Utai ras Sakkur, i bas terpuk Bigwai nari, rikut ras 70 kalak dilaki.
Esra ndatken kalak Lewi guna erdahin i bas Rumah Pertoton
15Kerina terpuk ndai ipepulung i tepi lau anak si malerna ku kuta Ahawa, janah telu wari dekahna kami erkemah i je. I bas kalak ndai lit dat aku imam-imam, tapi la lit kalak Lewi. 16Kudilo pengulu kalak ndai siwah kalak, e me: Elieser, Ariel, Semaya, Elnatan, Jarib, Elnatan, Natan, Sakaria, ras Mesullam, bage pe dua kalak guru, Joyarip ras Elnatan. 17Kusuruh kalak enda ndai kerina njumpai Iddo, e me pengulu perpulungen si lit i Kasipia, lako mindo man bana ras teman-temanna, e me kesusuren kalak si erdahin i bas Rumah Pertoton, gelah ikiremkenna man kami kalak si erdahin guna Dibata i bas Rumah Pertoton. 18Arah perkuah ate Dibata isuruhna ras kami si Serebia, sekalak si ngasup i bas kai-kai pe. Ia sekalak Lewi i bas terpuk Mahli nari, janah sepuluh waluh kalak anakna ras senina-seninana reh ras ia. 19Hasabia ras Jesaia i bas terpuk Merari nari pe isuruhna man kami, rikut ras dua puluh kalak kade-kadena. 20Tambah si e lit ka pe 220 kalak si erdahin i bas rumah pertoton. Nini-nini kalak enda nai enggo itetapken Raja Daud ras pegawai-pegawaina lako nampati kalak Lewi i bas rumah pertoton. Kerina ia isuratken gelarna sekalak-sekalak.
Esra mabai bangsa e erpuasa dingen ertoto
21I tepi lau anak Ahawa e, kuperentahken kerina erpuasa dingen peteruk diri i lebe-lebe Dibata janah mindo gelah ibabaiNa kami i bas perdalanen janah ikawaliNa kami ras anak-anak kami bage pe kerina sikerajangen kami. 22Tentu mela nge min ndai kuakap mindo tentera si erkuda i bas raja nari guna engkawal kami i bas musuh-musuh nari kidekah perdalanen sabap enggo kukataken man raja maka Dibata kami masu-masu kalak si ernalem man baNa, janah ise si nadingken IA la ateNa ngena janah iukumNa pe. 23E maka erpuasa dingen ertoto kami man Dibata gelah ikawaliNa janah pertoton kami e ialokenNa.
Pemere guna Rumah Pertoton
24I bas pengulu imam-imam e nari kubuat Serebia, Hasabia, ras sepuluh kalak si debanna. 25Kenca bage kutimbang pirak, emas, ras kerina perkakas-perkakas si ibereken raja, penasehat-penasehat ras pegawai-pegawaina, bage pe kalak Israel guna ipake i bas Rumah Pertoton e, jenari kubereken man imam-imam e. 26-27Enda me si kubereken man bana:
pirak: beratna 22 ton
100 perkakas pirak: beratna 70 kilo
emas: beratna 3.400 kilo
20 mangkuk emas: beratna 8,4 kilo
2 mangkuk tembaga si mejile, ergana bali ras 2 mangkuk emas.
28Ningku man imam-imam e, “Kam enggo iserapken man TUHAN, Dibata nini-ninindu, janah bage pe kerina perkakas-perkakas pirak ras emas si iendesken man baNa jadi persembahen riah ukur. 29Jagalah alu metenget kerina perkakas-perkakas e seh kam i bas Rumah Pertoton e. Timbanglah perkakas-perkakas e i bas kamar imam-imam si lit i bas Rumah Pertoton e jenari endesken man pengulu imam ras pengulu-pengulu kalak Lewi, bage pe man pengulu-pengulu kalak Israel si lit i Jerusalem.” 30E maka ialoken imam-imam ras kalak Lewi pirak, emas ras perkakas-perkakas e, gelah ibabana ku Rumah Pertoton i Jerusalem.
Mulih ku Jerusalem
31E maka berkat kami i lau anak Ahawa nari ku Jerusalem i bas wari sepuluh dua bulan si pemena. Dibata ngarak-ngarak kami janah ikawaliNa kami maka la iserang musuh-musuh bage pe perngerampuk si nggempangi kami i bas perdalanen. 32Kenca kami seh i Jerusalem, pekesahken kami telu wari dekahna. 33Kenca bage i bas wari peempatken lawes kami ku Rumah Pertoton. I je itimbang kami pirak, emas, ras kerina perkakas-perkakas e, jenari iendesken kami man Imam Meremot, anak Uria. Si nemani ia e me Eleasar anak Pinehas ras dua kalak kalak Lewi, si Josabat anak Jesua ras Noadia anak Binnui. 34Kerina ikira ras itimbang, jenari isuratken alu lengkap.
35Kenca bage kerina kalak si enggo mulih i bas pembuangen e nari maba persembahen tutungen man Dibata Israel. Ipersembahkenna sepuluh dua jenggi lembu guna kerina kalak Israel, siwah puluh enem bajar biri-biri, pitu puluh pitu anak biri-biri. Janah ipersembahkenna pe sepuluh dua kambing guna nasapken dosa-dosana. Kerina asuh-asuhen e itutung jadi persembahen man TUHAN. 36Surat si enggo ibereken raja e pe ibuatna, jenari iberekenna man gubernur-gubernur ras pegawai-pegawai propinsi Eprat Barat. Iberekenna semangat man bangsa Israel dingen nampati pembangunen Rumah Pertoton ingan ersembah e.
Currently Selected:
ESRA 8: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
