ESEKIEL 5
5
Esekiel ncukur bukna
1Nina TUHAN, “O manusia si ermasap-masap, buat sada pedang si entelap, jenari cukur janggutndu ras kerina bukndu alu pedang e. Kenca bage timbang bukndu e i bas timbangen, jenari bagi-bagi jadi telu bagin. 2Ciluk seperteluna i bas kuta e adi enggo dung pengepungen e. Buat sepertelu nari kenca bage gatgati alu pedangndu janahndu erdalan engkeleweti kuta e. Si sepertelu nari caburken ku das maka ikabangken angin, gelah Kuayak-ayak alu pedangKu. 3Buat mulihi buk e piga-piga lambar, jenari punjutken i bas suki bajundu. 4Kenca bage pedarat ka mulihi deba, benterken ku api, janah pediat keri meseng. I bas si e nari me api merap ku kerina bangsa Israel.”
5Nina TUHAN si Erdolat, “Nehenlah, enda me Jerusalem. Kutamaken kuta e i bas pertengahen doni enda, i ja kerina negeri-negeri si deban lit i sekelewetna. 6Tapi Jerusalem berontak ngelawan perentahKu, janah icidahkenna maka jahaten ia asangken bangsa-bangsa si deban, buen ia nimbak asangken negeri-negeri si i sekelewetna. Jerusalem nulak perentahKu, janah la ia nggit matuhi Undang-undangKu. 7E maka genduari begikenlah katangKu o Jerusalem; Aku, TUHAN si Erdolat ngerana man bandu. Kam la patuh man Undang-undang ras peraturen-peraturenKu, la patuhen kam asangken kerina negeri-negeri si lit sekelewetndu. Iikut-ikutndu adat kebiasan bangsa si deban. 8Erkiteken si e, Aku, TUHAN si Erdolat, ngataken man bandu maka Aku me musuhndu. Kuukum me kam i lebe-lebe bangsa-bangsa si deban. 9Erkiteken kerina perbahanenndu si ciga ateKu, Kuukum me kam lebih asa ukumen si pernah Kubahan, janah asa ndigan pe la pernah bage nari. 10Orang tua si i bas kuta Jerusalem, ipanna pagi anakna, janah anak ipanna pagi orang tuana. Kuukum me kam janah kasa kalak si nggeluh denga Kukerapken ku belang-belang doni. #Perng 4:10
11Aku kap Dibata si nggeluh, TUHAN si Erdolat janah enda me katangKu, erkiteken icemarkenndu RumahKu alu kerina kejahaten ras perbahanenndu si ciga ateKu, e maka Kuruntuhken me kam, janah la sitik pe ateKu mekuah. 12Sepertelu pendudukndu mate pagi erkiteken penakit ras kelihen i bas kuta e; sepertelu itampul alu pedang i darat kuta, janah sepertelu nari Kukerapken gelah ibabaken angin jenari Kuelis-elis alu pedang.
13Inanamindu me uga sangatna rawa ras pernembeh ateKu seh maka puas Kuakap. Kenca jadi si enda kerina, i je tek me kam o Jerusalem maka Aku, TUHAN, enggo ngerana man bandu erkiteken nembeh ateKu ngidah kinilapatuhenndu. 14Kerina kalak i negeri-negeri si lit i sekelewetndu nguru-nguru kam, janah kasa kalak si mentas pe nilah me.
15Tupung Kuajar kam alu ukumen pernembeh ateKu si gara, kerina bangsa-bangsa sekelewetndu pe gentar; janah si e jadi pertenget bana. Ciga atena ngenehen kam e maka iuru-uruna kam. 16Kukeriken persedian panganndu janah inanamindu me uga suina kelihen, bali ras anak panah si ntelap si ipanahken man bandu lako ngkernepken kam. 17Kubahan kelihen, jenari kusuruh rubia-rubia si merawa munuh anak-anakndu; lako munuh kam Kusuruh penakit, perubaten seh ngamburken dareh, ras perang. Aku, TUHAN, enggo ngataken si enda.” #Ket 6:8
Currently Selected:
ESEKIEL 5: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
