ESEKIEL 4
4
Igambarken Esekiel pengepungen Jerusalem alu perbahanenna
1Nina Dibata, “O manusia si ermasap-masap, buat batu bata, tamaken arah lebendu, jenari garislah batu e lako nggambarken kuta Jerusalem. 2Kenca bage, lako nggambarken pengepungen nandangi kuta e, bahanlah parik-parik taneh si ergun-gun, perkemahen-perkemahen, ras perkakas ngeruntuhken tembok i sekelewet batu bata e. 3Buatlah sada panci besi, jenari pajekken e desken tembok kelang-kelang kam ras kuta e. Alakenlah kuta e. Kuta e sangana ikepung, janah kam si ngepungsa. Enda me jadi sada tanda man bangsa Israel.
4-5Kenca bage, medemlah alu nindihi tan si kawes, maka Kutamaken man bandu kesalahen negeri Israel. Kam arus tading i je telu ratus siwah puluh wari dekahna janah ngenanami kiniseran erkiteken kesalahenna. Sada wari kam medem i je ndalani ukumen nggambarken sada tahun ukumen si Kusehken man Israel. 6Kenca enggo dung idalanindu si e, erkusur kam nindihi tan si kemuhen, janah Kam ngenanami kiniseran erkiteken kesalahen Juda, empat puluh wari dekahna sada wari nggambarken ukumen sada tahun.
7Pernehenlah kempak pengepungen kuta Jerusalem. Awatken tinju-tinjundu kempak kuta e, jenari ernubuatlah. 8Kuiket kam seh maka la banci erkusur ku kawes tah ku kemuhen seh enggo dung pengepungen e.
9Genduari buatlah gandum, sorgum, kacang, kacang megara, dawa, dawa cur. Campurken kerina, jenari bahan jadi roti. Em bahan man nakanndu kidekah kam medem nindihi tan si kawes telu ratus siwah puluh wari dekahna. 10Nakan si banci ipanndu setengah gantang ngenca sada wari, janah sekali ngenca kam man sada wari. 11Lau si man inemenndu tep-tep wari pe ersibar; dua cangkir ngenca sada wari. 12Pegaralah api, rantingna kotor manusia si enggo kerah, janah i bas api e kam manggang roti. Jenari panlah roti e i lebe-lebe jelma si nterem.”
13Nina TUHAN, “Bage me pagi kalak Israel man pangan si ipantangken rikutken Undang-undang, tupung Kukerapken ia ku negeri-negeri si deban.”
14Tapi erjabap aku, “Lang, o TUHAN si Erdolat! La pernah kuliami diringku. Mulai kin kitik-kitikku nari la pernah kupan daging bangke asuh-asuhen tah pe si ijerngem rubia-rubia si merawa. La pernah kupan si pantang rikutken Undang-undang.”
15E maka nina Dibata, “Mehuli. Adi bage banci ibahanndu kotoren lembu jadi rantingna, janah i je me ipanggangndu rotindu e.”
16Tole nina Dibata, “O manusia si ermasap-masap, Kubeneken ateKu kerina persedian pangan i Jerusalem. Suhsah dingen bene pagi ukur kalak si ringan i je erkiteken terpaksa itimbang panganna janah isukati inemenna. 17Bene pagi ukurna perban keri pangan ras inemenna, janah kedungenna mate ia erkiteken dosa-dosana.”
Currently Selected:
ESEKIEL 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.