ESEKIEL 25
25
Nubuat kerna Amon
1Kata TUHAN seh man bangku, #Jer 49:1-6; Esek 21:28-32; Amos 1:13-15; Sep 2:8-11 2nina, “O manusia si ermasap-masap, sumpahilah negeri Amon. 3Suruh ia megiken katangKu, Aku TUHAN si Erdolat. Senang kal ukurndu ngidah Rumah PertotonKu iliami, ngidah Israel ikernepken, ras kalak Juda ibaba ku pembuangen. 4Erkiteken meriah iakapndu, Kupelepas suku-suku si ringan i gurun pasir si arah Timur naluken kam. Ipajekkenna pagi perkemahenna i bas negerindu, jenari i je me ia ringan. Ipanna buah kayundu dingen iinemna susu si aturenna kin sikerajangenndu. 5Kusalihken kuta Rabba jadi karang unta, janah kerina mbalmbal Amon man ingan ngasuhi biri-biri, gelah itehndu maka Aku kap TUHAN.”
6Nina TUHAN si Erdolat ka tole, “Ertepuk-tepuk dingenndu ersurak-surak alu meriah. Megombang kam man negeri Israel. 7Erkiteken bage perbanndu, Kuendesken me kam man bangsa-bangsa si deban, si ngerampuki ras ngerampasi erta-ertandu. Kukernepken me kam seh radas kerina, seh maka kam lanai igelari sada bangsa, janah negerindu pe lanai lit. Kenca bage itehndu me maka Aku kap TUHAN.”
Nubuat kerna Moap
8Nina TUHAN si Erdolat, “Erkiteken ikataken Moap maka Juda bali nge ras bangsa-bangsa si deban, #Jes 15:1–16:14; 25:10-12; Jer 48:1-47; Amos 2:1-3; Sep 2:8-11 9e maka Kupelepas kuta-kuta si ngampang-ngampangi perbalengen Moap iserang, subuk pe kuta-kuta si mejilena kal, e me Bet-Jesimot, Baal Meon, ras Kiryataim. 10Kupelepas suku-suku si ringan i gurun pasir si arah timur naluken Moap, radu ras Amon, seh maka Moap lanai igelari sada bangsa. 11Kuukum me Moap, maka itehna maka Aku kap TUHAN.”
Nubuat kerna Edom
12Nina TUHAN si Erdolat, “Alu kejam erbalas Edom kempak Juda, janah pembalasen e mahanca Edom ersalah seh rasa lalap. #Jes 34:5-17; 63:1-6; Jer 49:7-22; Esek 35:1-15; Amos 1:11-12; Oba 1-14; Mal 1:2-5 13Genduari Kupebetehken maka Kuukum me Edom dingen Kubunuh kerina dilaki ras asuh-asuhen si lit i je. Kubahan negeri e jadi terulang, mulai i kuta Teman nari seh ku kuta Dedan, janah rayatna keri mate i bas perang. 14Aku erbalas kempak Edom alu make Israel, bangsangKu, maka inanamina uga sangatna pernembeh ateKu. Iteh Edom me uga pagitna nanam pembalasenKu. Bagenda me nina TUHAN si Erdolat.”
Nubuat kerna Pilisti
15Nina TUHAN si Erdolat, “Kalak Pilisti enggo erbalas alu kejam nandangi musuh-musuhna turun temurun, janah ikernepkenna kal asa puasna iakapna. #Jes 14:29-31; Jer 47:1-7; Joel 3:4-8; Amos 1:6-8; Sep 2:4-7; Sak 9:5-7 16Erkiteken si e genduari Kupebetehken maka Kuserang me kalak Pilisti jenari Kusasapken kerina. Kasa kalak si tading denga si ringan i Kendit Pilisti, Kukernepken kerina. 17Kuukum alu mesangat janah erbalas Aku man bana seh puas. Inanamina me uga pernembeh ateKu. Kenca bage itehna me maka Aku kap TUHAN.”
Currently Selected:
ESEKIEL 25: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
