ESEKIEL 24
24
Kudin si tembesin
1I bas wari si pesepuluhken, bulan pesepuluhken, i bas tahun pesiwahken kenca kami i bas pembuangen, seh kata TUHAN man bangku nina, 2“O manusia si ermasap-masap, suratkenlah tanggal wari si sendah, sabap i bas wari si sendah me raja Babil mulai ngepung Jerusalem. #2Raj 25:1; Jer 52:4
3-5Aku, TUHAN si Erdolat, lit sada perumpamanKu man bangsa pemberontak e, janah turikenlah man bana bagenda:
Geleh biri-biri si mburna,
buat dagingna si mejilena.
Daging nahe si arah lebe ras pahana,
bage pe tulan-tulanna si melala utukna.
Tamaken lau ku bas kudin,
tanggerken kerina i das dalikan.
Gestungken rantingna seh luam launa,
maka medate dagingna bage pe tulanna.”
6Enda me tole si ikataken TUHAN si Erdolat, “Cilaka me kuta kalak pemunuh e! Kuta e desken kudin si enggo tembesin si la pernah ibersihken. Daging ndai ibuat i bas kudin nari sengkeret-sengkeret, seh maka sitik pe lanai lit tading. 7Lit pembunuhen i bas kuta e; darehna la mambur ku taneh, tapi ku batu seh maka la banci itamburi. 8Kupelepas dareh ndai i bas batu si enggo la tertamburi e, maka arah e keke rawangku erbahan pembalasen.”
9Enda tole si ikataken TUHAN si Erdolat, “Cilaka me kuta kalak pemunuh e! Aku jine kap nggestungken rantingna. 10Tambahi tole rantingna! Kiapi apina! Belgang daging e! Gergeri seh kerah kuahna, seh maka meseng tulan-tulan e! 11Genduari tamakenlah kudin tembaga si enggo lume e i babo arang, jenari pegara seh merara kudin e. Kenca bage maka kudin e enggo ka bersih mulihi rikutken aturen agama erkiteken tembesina enggo meseng, 12aminna gia tembesina e langa keri kerina ibahan api e.
13O Jerusalem perbahanenndu si nggesuh e enggo ngeliami kam. Aminna enggo gia Kucubaken mersihken kam, kam tetap denga keliamen. Lalap kam la banci bersih mulihi adi langa kin inanamindu uga sangatna pernembeh ateKu man bandu. 14Aku, TUHAN si Erdolat enggo ngerana, janah genduari enggo seh paksana Aku ndalankenca. Dosa-dosandu lanai Kuenggo-enggoken, lanai ateKu mekuah, lanai kucidahken lias ateKu. Kam Kuukum sue ras perbahanenndu,” bagenda me nina TUHAN si Erdolat.
Kematen ndehara nabi
15Kata TUHAN seh man bangku nina, 16“O manusia si ermasap-masap; alu sekali gudam, Kubunuh me kalak si ikelengindu kal. Tapi la banci kam jungut-jungut tah nderkuh ngamburken iluh. 17Ola cidahken maka kam erceda ate. Sorandu kesi-kesi pe ola terbegi. Erbulang ras ersepatulah kam. Ola tutupi ayondu, janah ola pan pangan si biasa ipan kalak si erceda ate.”
18Lampas erpagi-pagi, ngerana aku man bangsa e. Karabenna mate ndeharangku, janah pepagina kulakoken sue ras si enggo ikataken man bangku. 19Nungkun bangsa e man bangku nina, “Engkai maka bage perbahanenndu?”
20E maka ningku ngaloi, “Lit kata TUHAN man bangku, 21si man sehenken man bandu, o kalak Israel. Kata e bagenda: Megah kal akapndu kerna uga gegehna Rumah Pertoton e. Meriah ukurndu natapsa ras ngidahsa, tapi iliami TUHAN ateNa ingan e. Isi jabundu si nguda denga si tading i Jerusalem mate pagi i bas perang. 22Kenca bage pagi, kam pe ilakokenndu bagi si kulakoken enda. La itutupindu ayondu, la ipanndu pangan si biasa ipan kalak si erceda ate. 23Erbulang dingen ersepatu kam, la kam tangis, la kam ngandung. Reh dekahna reh kertangna dagingndu erkiteken dosa-dosandu, janah kelsehen kam sekalak kempak si debanna. 24E maka aku, Esekiel, aku jadi kalak si man usihenndu; ilakokenndu me kasa kai si enggo kulakoken. Ikataken TUHAN maka kenca jadi pagi si enda, ietehndu me maka ia kap TUHAN si Erdolat.”
25Nina ka TUHAN, “Dage, o manusia si ermasap-masap, Kubuat me i bas ia nari Rumah Pertoton si paguh e, si jadi kemegahen ras keriahenna e, si meriah kal akapna natapsa ras ndahisa. Tambah si e Kubuat pe anak-anakna si dilaki si diberu. 26I bas warina Aku ngelakoken si enda sekalak si pulah i bas cilaka e nari reh ndahi kam janah nurikenca man bandu. 27I bas wari e mulihi ka kam pagi ngasup ngerana janah lanai kam pekak. Kenca bage ngerana-ngerana kam pagi ras ia. Alu dalan si bagenda kam pagi o Esekiel, jadi sada tanda man bangsa e, maka ietehna Aku kap TUHAN.”
Currently Selected:
ESEKIEL 24: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
