ESEKIEL 12
12
Nabi Esekiel jadi sekalak pengungsi
1Kata TUHAN seh man bangku nina, 2“O manusia si ermasap-masap kam ringan i tengah-tengah bangsa pemberontak. Lit matana tapi kai pe la idahna; lit cupingna tapi kai pe la ibegina, erkiteken ia pemberontak. #Jes 6:9-10; Jer 5:21; Mrk 8:18
3-6E maka genduari, o manusia si ermasap-masap, sanga wari siang denga susunlah barang-barangndu i bas sada bungkusen bagi semalna ilakoken sekalak pengongsi. Kenca bage i lebe-lebe kalak kerina bahanlah sada lubang i bas dingding rumahndu. Ope denga gelap wari, berkatlah kam sanga kerina kalak ngidahsa. Ndaratlah kam i bas rumahndu nari arah lubang ndai, janah persanlah bungkusen e i bas barandu. Berkatlah mentasi berngi si gelap; janah tutupilah matandu seh maka la idahndu dalan si ibentasindu. Pelepas kerina kalak Israel ngidah kai si ilakokenndu e, gelah e jadi sada persinget man bana, maka igejapna ia bangsa pemberontak.”
7E maka kulakoken kai si isuruh TUHAN e. I bas wari e kubungkus barang-barangku bali ras si ibahan pengongsi, janah karaben, nandangi gelap wari, Kubahan sada lubang i bas dingding alu tanku, jenari ndarat aku. Sanga kerina kalak ngidahsa, kupersan bungkusen ndai i bas barangku jenari berkat aku.
8Pepagina, seh kata TUHAN man bangku nina, 9“O manusia siermasap-masap, genduari kalak Israel si pemberontak e nungkun-nungkun man bandu kai si ilakokenndu e. 10Erkiteken si e, turikenlah man bana katangKu, Aku, TUHAN si Erdolat. Berita enda man raja si erkuasa i Jerusalem bage pe man kerina kalak si ringan i je. 11Kataken man bana maka kai si enggo ilakokenndu e, e me sada tanda kerna kai si nandangi jadi man bana. Nandangi jadi pengongsi ras jadi tabanen me ia kerina. 12Raja si merentah ia genduari, la banci lang ipersanna me bungkusenna i bas barana arah berngi si gelap jenari lompat ia arah lubang si ibahan kalak e i bas tembok. Itutupna me matana e maka la idahna ku ja ia lawes. 13Tapi Kupebelang pagi jalangKu janah Kutangkap ia alu e. Kenca bage Kubaba ia ku kuta Babil, janah i je me ia mate, tapi kuta e la idahna. #2Raj 25:7; Jer 52:11 14Kerina singiani istanana bage pe penasehatna ras pengawalna, Kupemerap ku jah ku je, janah idarami kalak ia lako munuhsa.
15Kenca Kupemerap ia ku tengah bangsa-bangsa i negeri-negeri si deban, ietehna me maka Aku kap TUHAN. 16Piga-piga kalak i bas ia Kukelini i bas perang e nari, gelah i tengah bangsa-bangsa e igejapna uga cigana ateKu nandangi perbahanen si enggo ilakokenna, gelah iakuina maka aku kap TUHAN.”
Nabi Esekiel nggirgir
17Kata TUHAN seh man bangku nina, 18“O manusia si ermasap-masap, nggirgirlah kam alu gentar ras mbiar tupung kam man ras minem. 19Kataken man kerina bangsa e maka enda me berita i bas TUHAN si Erdolat nari nandangi kalak Jerusalem si ringan denga i bas tanehna. Nggirgir me ia alu gentar dingen mbiar tupung ia man ras minem. Tanehna jadi lume dingen terulang, erkiteken kasa kalak si ringan i je nggeluh alu la bujur. 20Kota-kota si genduari meriah ikernepken me, janah juma-juma isalihken jadi taneh terulang. Jenari itehna me maka Aku kap TUHAN.”
Kuan-kuan si mehuli ras berita si la mehuli
21Kata TUHAN seh man bangku nina, 22“O manusia si ermasap-masap, ngkai maka rusur ibelasken kalak Israel kuan-kuan enda nina: ‘Enggo mentas paksa-paksa, tapi nubuat kerina sia-sia?’ 23Genduari kataken man bangsa e kai jabapKu, Aku, TUHAN si Erdolat, kerna si e. Kumasapken me kuan-kuan si bage, janah ndigan pe lanai ibelasken i Israel. Jadi gancihna e me: Paksana enggo seh, janah jadi me bagi si inubuatken!
24I tengah-tengah bangsa Israel ndigan pe lanai lit pengenehenen si la tuhu tah nubuat si papak. 25Aku, TUHAN si Erdolat, ngerana man bana, janah kai si Kukataken la banci la jadi, janah lanai ipelawen-lawen. I bas paksa geluhndu Kusehken kerina kai si enggo Kusingetken man bandu.” Bage nina TUHAN si Erdolat.
26Kata TUHAN seh man bangku nina, 27“O manusia si ermasap-masap, kalak Israel erpengakap maka nubuatndu e ndekah denga kal maka jadi. 28E maka katakenlah katangKu enda man bana, ‘Lanai bo ipelawen-lawen. Kai si enggo Kukataken la banci lang jadi.’ Bage nina TUHAN si Erdolat.”
Currently Selected:
ESEKIEL 12: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
