ESEKIEL 11
11
Ukumen man Jerusalem
1Kesah Dibata ngangkat aku, jenari ibabaNa aku ku kerabangen Rumah Pertoton si arah kenjulu. Deherken kerabangen e kuidah dua puluh lima kalak dilaki, ikut pe Jakasanya anak Asur ras Pelaca anak Benaya. Kalak enda duana peminpin bangsa e.
2Nina Dibata man bangku, “O manusia si ermasap-masap, kalak enda kerina erbahan rencana-rencana si jahat janah iberekenna pedah si la mehuli man kuta enda. 3Nina, ‘Pedas nge kita majekken rumah mulihi. Sabap kuta enda bali kap ras kudin, janah kita desken daging i bas kudin e; e maka kita labo banci kena api.’ 4Genduari, o manusia si ermasap-masap, nubuatkenlah ukumenna.”
5Kesah TUHAN engkuasai aku, jenari isuruh TUHAN aku nehken berita enda man bangsa e, “O bangsa Israel, Kueteh nge kai si ikatakenndu ras si irencanakenndu. 6Enggo seh kal lalana jelma ibunuhindu i bas kuta enda, seh maka pasar-pasar dem alu mait.
7Erkiteken si e, enda me katangKu, Aku, TUHAN si Erdolat, nandangi kam. Tuhu kuta enda desken kudin, tapi kai kin daging e? Daging e, e me mait kalak si enggo ibunuhindu. Kam lanai pagi i jenda, sabap Kuambekken kam ndarat i bas kuta enda nari! 8Ma mbiar kin kam nandangi pedang? Kalak si erpedang me Kubaba lako merangi kam. 9Kubaba kam ndarat i bas kuta enda nari jenari Kubereken man bangsa si deban. Enggo Kuputusken ukumenndu ukumen mate, 10e maka mate me kam i bas perang i bas negerindu. Arah si e ieteh kalak me kerina maka Aku kap TUHAN. 11Kuta enda labo pagi engkawali kam bagi kudin ngkawali daging si lit i bassa. Kuukum kam aminna i ja pa pe kam i bas negeri Israel. 12Jenari ietehndu me maka Aku kap TUHAN janah Kuukum kam erkiteken ilanggarndu peraturen-peraturenKu dingen la iperdiatekenndu Undang-undangKu arah kam ngikutken adat kebiasan negeri-negeri si lit i sekelewetndu.”
13Tupung aku melasken nubuat enda ndai, rempet mbulak Pelaca, mate ia. E maka nembah aku, ayongku seh ku taneh janahku serko ningku, “Andiko, TUHAN si Erdolat, ibunuhNdu kin atendu kerina kalak si tading i Israel?”
Padan Dibata man kalak si ibuang
14Kata TUHAN seh man bangku nina, 15“O manusia si ermasap-masap, kalak si ringan i Jerusalem ncakapken kam ras senina-seninandu kalak Israel si sangana i bas pembuangen. Nina, ‘Kalak buangen e enggo ndauhsa inganna maka ia banci ersembah man TUHAN i Jerusalem enda. TUHAN enggo mereken taneh enda man sikerajangenta!’
16Genduari turikenlah man teman-temanndu si ibuang kai si Kukataken enda. Aku nge si mahanca ia ringan i tengah-tengah bangsa-bangsa si ndauh dingen Kupemerap ia i bas negeri-negeri si deban. Amin bage gia kidekah ia ringan i bas negeri inganna ibuang e, Aku nemani ia.
17E maka kataken man bana katangKu, Aku TUHAN si Erdolat. Kataken man bana maka Kupepulung nge ia i bas negeri-negeri e nari, jenari Kubereken man bana mulihi taneh Israel e. 18Kenca ia mulih, arus maka iambekkenna kerina gana-gana si macik dingen si ciga ateKu, si ijumpaina. 19Kubereken me man bana pusuh si mbaru ras perukuren si mbaru. Kuagui pusuhna si piher bagi batu, jenari Kusambari alu pusuh si erkemalangen man bangKu. #Esek 36:26-28 20Kenca bage ipatuhina me peraturen-peraturenKu janah alu tutus iikutkenna perentahKu. Ia jadi bangsangKu janah Aku jadi Dibatana. 21Tapi Kuukum me kalak si ersembah man gana-gana si macik dingen si ciga ateKu. Kuukum me ia erkiteken kai si enggo ilakokenna.” Enda me kata TUHAN si Erdolat.
Kemulian Dibata nadingken Jerusalem
22Ibenaken kerubim ndai me kabang, janah roda ndai pe kerina ikut rassa. Sinalsal si mesilo tanda Dibata nu Israel lit i je, teridah ersinalsal i babo kerubim e. #Esek 43:2-5 23Kenca bage sinalsal si mesilo e lawes nadingken kuta e janah pindah ku sada deleng si lit arah kenjulu. 24I bas pengenehenen e Kesah Dibata ngangkat aku, jenari ibabaNa mulih ku pembuangen i Babilon. Kenca bage masap pengenehenen e, 25jenari kuturiken man kalak buangen e kai si enggo icidahken TUHAN man bangku.
Currently Selected:
ESEKIEL 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
