PENGERANA 9
9
1Kerina e mbages kuukuri: Dibata nge si ngaturken kegeluhen kalak bujur ras kalak jahat, subuk ia engkelengi ntah ernembeh ate. Ise pe la metehsa kai si jadi pagin. 2La lit lainna kai si jadi man kalak bujur ras kalak jahat, man kalak si mehuli dingen kalak si la mehuli, man kalak si bersih pusuh peratenna ras si kalak macik ukurna, man kalak si mpersembahken persembahen ntah lang. La ulin sikerajangen kalak benar asangken kalak perdosa, man kalak si nggit ersumpah ntah la nggit ersumpah. 3Dage bali ulihna kerina. E la bujur bali ras kerina si jadi i bas pertibi enda la bujur. Kidekah umurna, pusuh manusia dem alu kejahaten si mehado, piah dungna rempet ia mate.
4Tapi kidekah manusia nggeluh,
kidekah e lit denga si man arapenken.
La kin ulin biang nggeluh
asangken singa mate-mate?
5Sabap kalak si nggeluh denga meteh maka kematen nimai ia.
Tapi kalak si enggo mate kai pe lanai itehna.
Kalak mate lanai dat upah,
ia enggo ilupaken tuhu-tuhu.
6Kekelengenna, pernembeh atena, pusuhna si mecimberu,
kerina mate radu ras ia.
Ndigan pe lanai ia ikut
i bas kerina kejadin i doni enda.
7E maka manken dingen meriahlah atendu,
inemlah anggurndu alu senang ukurndu.
Si e kerina labo dalih iakap Dibata.
8Cirem dingen sianglah ayondu katawari pe.
9Pesenanglah dirindu ras ndehara kekelengenndu,
kidekah kegeluhen si sia-sia i doni enda si ibereken Dibata man bandu.
Pesenanglah dirindu tep-tep wari aminna pe la lit gunana,
sabap e kap ngenca upahndu latih.
10Dahikenlah dahinndu asa gegehndu.
Sabap denggo lanai bo lit dahin, ntah pe perukuren.
I bas doni kematen lanai bo lit pemeteh ntah pe kepentaren,
janah ku jah me perlawesndu.
11Lit denga si kuidah i bas doni enda e me:
i bas perlumban labo lalap si meter kiam si menang,
i bas peperangen labo lalap kalak si megegeh si menang.
Labo kalak pentar lalap si jumpa pencarin,
janah labo kalak cerdik rusur ndatken kebayaken.
Bage pe labo kalak si mbages pemetehna si terberita.
Tapi kerina nge kalak banci kena sial.
12Labo ieteh manusia ndigan seh sipatna,
bali ras binurung kena jala ntah perik kena ragum
bage me manusia kena cilaka
i bas paksa si labo ieteh ndigan.
Perukuren kerna kepentaren dingen kebodohen
13I bas pertibi lit kuidah sada contoh si mehuli kerna uga perukuren kalak kerna kepentaren. 14Lit sada kuta kitik-kitik, jelmana pe labo nterem. I bas sada wari reh me sada raja si mbelin nerang kuta e. Ikepungna jenari iruntuhkenna atena bentengna. 15I bas kuta e lit sekalak pentar tapi musil ia. Erkiteken si e ngasup ia mulahi kuta e. Tapi erkiteken ia kalak musil, minter kalak lupa nandangi kai si ibahanna janah ise pe la lit si nginget ia. 16E maka payo nge kai si kukataken maka kepentaren lebihen kuasana asangken kalak si megegeh. Amin bage pe kepentaren kalak musil labo iergaken; rananna pe labo lit simegikenca.
17Ulin megiken kalak pentar si ngerana manjar-anjar asangken
megiken sora serko sekalak raja i bas perpulungen kalak motu.
18Liten gunana kepentaren asangken senjata,
tapi sekalak si erdosa encedaken mbue si mehuli.
Currently Selected:
PENGERANA 9: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
