ULANGEN 34
34
Kematen Musa
1Nangkeng Musa i kendit Moap nari ku Deleng Nebo, ku tampuk Deleng Pisga arah Timur Jeriho, e maka i jenari icidahken TUHAN man bana taneh e kerina: daerah Gileat seh ku Utara ngayak kuta Dan; 2kerina daerah Naptali; daerah-daerah Eperaim ras Manase; daerah Juda seh ku Barat ngayak Lawit Tengah; 3bagin Selatan Juda; janah taneh kendit i Soar nari seh Jeriho, e me kap kuta si igelari kuta kurma. 4Kenca bage nina TUHAN man Musa, “Enda me taneh si enggo Kupadanken man Abraham, Isak, ras Jakup, maka Kubereken man sinursurna. Enggo Kubere itatapndu, tapi la Kupelepas kam lawes ku je.” #Kej 12:7; 26:3; 28:13
5E maka mate me Musa, suruh-suruhen TUHAN e, i taneh Moap, sue ras si enggo ikataken TUHAN mbarenda. 6Ikuburken TUHAN ia i bas sada baluren i Moap, pekepar-kepar ras kuta Betpeor, tapi seh asa genduari ise pe la metehsa alu payo inganna ikuburken. 7Sanga Musa mate umurna 120 tahun; ia megegeh denga, janah matana langa seleng. 8Itangisi kalak Israel ia telu puluh wari dekahna i kendit Moap.
9Josua anak Nun dem alu kepentaren, erkiteken enggo itetapken Musa ia jadi gancihna dingen nangkuhken ia alu namaken tanna ku babo takalna. Kalak Israel ngikutken ia janah icikep bangsa Israel perentah-perentah si enggo ibereken TUHAN man bangsa e arah Musa.
10La enggo penah lit nabi i Israel bagi Musa; TUHAN ngerana ras ia petala-petala. #Kel 33:11 11La lit nabi si deban si penah erbahan tanda kuasa ras kejadin si mbelin bagi isuruh TUHAN si Musa ngelakokenca guna ngelawan raja Mesir, pegawe-pegawena, ras kerina negerina. 12La enggo lit nabi si deban si penah ngelakoken perkara-perkara si mbelin ras mejin bagi si ilakoken Musa i lebe-lebe mata kerina kalak Israel.
Currently Selected:
ULANGEN 34: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
