ULANGEN 33
33
Ipasu-pasu Musa suku-suku bangsa Israel
1Enda me pasu-pasu Musa, suruh-suruhen Dibata e, si isehkenna man bangsa Israel ope denga ia mate.
2 TUHAN reh i Deleng Sinai nari;
IA desken matawari si mbincar i kepultaken negeri Edom
nalsali bangsaNa i Deleng Paran nari.
Sepuluh ribu malekat ikut ras IA,
gara api i bas tanNa si kemuhen.
3Keleng ate TUHAN man bangsaNa,
ikawaliNa sikerajangNa.
E maka erjimpuh kita i lebe-lebe naheNa,
janah siikutken perentah-perentahNa.
4Siikutken Undang-undang si ibereken Musa man banta,
e me kap erta bangsanta si mehergana.
5 TUHAN jadi raja bangsa Israel
sanga suku-suku bangsa e ras peminpin-peminpinna pulung ras-ras.
6Nina Musa kerna suku Ruben,
“Ola ndigan pe Ruben keri mate
aminna gia rayatna la nterem.”
7Kerna suku Juda nina,
“Dengkehkenlah penderkuhna, O TUHAN,
persadalah ia mulihken ras suku-suku si deban.
Erperang lah guna ia, TUHAN,
sampatilah ia ngelawan musuh-musuhna.”
8Kerna suku Lewi nina,
“O, TUHAN, cidahken lah peratenndu, arah Urim ras Tumim.
Arah suruh-suruhenNdu si patuh, kalak Lewi.
Iujindu ia i Massa,
janah teridah maka ia setia i Meriba. #Kel 17:7; 28:30; Bil 20:13
9Icidahkenna maka patuhen ia man baNdu
asangken man orang tua, senina, tah pe anak-anakna.
Iikutkenna perentah-perentahNdu
janah setia ia nandangi perpadanen si ibahanNdu.
10Ia me si ngajari anak-anakNdu gelah patuh man Undang-undangNdu.
Ia me si nehken persembahen i babo batar-batarNdu. 11TUHAN, sampatilah maka sukuna ergegehna;
meriahlah ateNdu erkiteken kai si ilakokenna.
Perperkenlah kerina musuh-musuhna,
olanai pelepas ndigan pe keke ka.”
12Kerna suku Benyamin nina,
“Enda me suku si ikelengi ras ikawali TUHAN,
ijagaiNa ia gedang-gedang wari,
Ia ringan i tengah-tengah suku e.”
13Kerna suku Jusup nina,
“Ipasu-pasu TUHANlah tanehna alu lau udan,
dingen alu lau si rehna i teruh taneh nari.
14Ipasu-pasu TUHANlah tanehna alu ulih sinuan-sinuan si mehulina,
siturah i bas kerina musim bekas isalsali matawari ras bulan.
15Dem lah uruk-urukna si nuria alu buah kayu si mehuli.
16Dem lah negerina alu kasa kai si mehuli,
bekas pemasu-masun TUHAN,
si ngerana i bas rambah si gara e nari.
Sehlah pasu-pasu enda man suku Jusup,
sabap ia me nai peminpin i tengah-tengah senina-seninana.
17Gegeh Jusup desken gegeh jenggi lembu
tandukna desken tanduk kelede si meliar.
Tandukna e me kap kalak Manase si meribu-ribu
ras kalak Eperaim si erpuluh-puluh ribu.
Alu e me iegasna bangsa-bangsa
janah ijulungna seh ku tampuk doni.”
18Kerna suku-suku Sebulon ras Isakar nina,
“Sangaplah Sebulon i bas perbinaganna i lawit,
dingen ertambah-tambah lah kebayaken Isakar i kuta.
19Iundangna bangsa-bangsa si deban ku delengna
janah ipersembahkenna persembahen si metunggung i je.
Idatca kebayakenna i lawit nari
ras i bas kersik nari si lit i gedang-gedang tepi lawit.”
20Kerna suku Gat nina,
“Pujilah TUHAN, si erbahanca mbelang daerah Gat.
Gat nggempangi desken sada singa
ngeretapken tan ntah pe mecahken tulan takal.
21Ibuatna taneh si mejilena man sikerajangenna
bagin sekalak peminpin iendesken man bana.
Iikutkenna perentah ras undang-undang TUHAN
tupung peminpin-peminpin Israel pulung ras-ras.”
22Kerna suku Dan nina,
“Dan e me kap anak singa
si lompat ndarat i Basan nari.”
23Kerna suku Naptali nina,
“Naptali ngena kal ate TUHAN, dingen ialokenna pasu-pasu si mbue.
Tanehna mulai i Dano Galilea nari, seh ku Selatan.”
24Kerna suku Aser nina,
“Aser buen ngaloken pasu-pasu asa suku-suku si deban.
Ialah min si ngenana ate senina-senina,
janah tanehna dem alu batang minak saitun.
25Terkawallah kuta-kutana alu gerbang besi ras tembaga
dingen kidekah geluhna, aman lah iakapna.”
26“O, bangsa Israel, la kap lit dibata bagi Dibatandu,
si erdalin i das langit alu dem kehagan
si erdahin mentasi embun-embun guna nampati kam.
27Dibata kap gelgel nari pertahanenndu;
tanNa si paguh rasa lalap, natang-natang kam.
IpelawesNa musuh-musuhndu asum kam ngasak
janah isuruhNa kam engkernepkenca kerina.
28Erkiteken si e maka sinursur Jakup nggeluh i bas dame
nggeluh alu aman i bas negeri si dem gandum ras anggur
i ja embun i langit nari ngelembapi taneh.
29Tuhu senang kal iakapndu, o Israel!
La lit ise pe bagi kam,
sada bangsa si iselamatken TUHAN.
TUHAN jine ampang-ampangndu ras pedangndu,
si ngkawali kam ras mereken kemenangen man bandu.
Reh me musuh-musuhndu mindo perkuah ate man bandu,
janah iperjakindu me ia.”
Currently Selected:
ULANGEN 33: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
