ULANGEN 11
11
Kinihagan TUHAN
1“Kelengilah TUHAN Dibatandu. Ikutkenlah gelgel undang-undangNa. 2Ingetlah genduari kai si enggo ipelajarindu kerna TUHAN arah pengalamenndu ras IA. Kam nge, labo anak-anakndu, si ngalamisa. Enggo iidahndu kuga belinna kemulian TUHAN, kuga gegehNa, ras mbisaNa, 3bage pe tanda-tanda kuasa si ibahanNa. Enggo iidahndu kai si ibahanNa man raja Mesir ras negerina. #Kel 7:8–12:13 4Enggo iidahndu kuga pengkernepken TUHAN tentera Mesir ras kerina kuda bage pe geretana alu nggedapken kalak e i Lawit Merah, sanga ia ngayaki kam. #Kel 14:28 5Enggo idahndu kai si ibahan TUHAN man bandu i gurun pasir ope denga kam seh i jenda. 6Ingetndu kai si ibahanNa man Datan ras man Abiram anak Eliap suku Ruben. I lebe-lebe mata kerina kalak nganga taneh jenari itelenna ia, radu ras keluargana, kemahna, bage pe kerina suruh-suruhen ras asuh-asuhenna. #Bil 16:31-32 7Tuhu, kam me si enggo ngidah kerina perkara-perkara si mbelin si enggo ibahan TUHAN.”
Pasu-pasu man kalak si patuh i bas taneh si ipadanken TUHAN
8“Ikutkenlah kerina undang-undang si enggo kubereken man bandu wari enda, gelah ngasup kam ngepari lau e, ngiani taneh si nandangi ibengketindu. 9Janah cawir metua kam i bas negeri si mehumur ras melala asilna e, si ipadanken TUHAN maka iberekenNa man nini-ninindu ras man sinursurna. 10Taneh si nandangi iinganindu e, la seri ras taneh Mesir inganndu nggeluh mbarenda. I Mesir adi atendu merdang, terpaksa kam latih erdahin pepaler lau ku juma e. 11Tapi adi taneh si nandangi iinganindu e, e me taneh deleng-deleng ras berneh-berneh, taneh si usur kena udan. 12TUHAN Dibatandu si pekena-kena taneh e ras njagaisa gedang-gedang tahun.
13Dage ikutkenlah perentah si enggo kubereken man bandu wari enda; kelengi lah TUHAN Dibatandu janah dahiken lah dahinNa alu bulat ukurndu. #Im 26:3-5; Ul 7:12-16; 28:1-14 14Adi ilakokenndu e, ipesusurNa udan ku tanehndu e rikutken perluna i bas paksa musim erbunga ras erbuah, gelah lit gandum, anggur ras minak saitun man gunandu, 15bage pe dukut man gagaten asuh-asuhenndu. Datndu kerina pangan si apai pe atendu. 16Jaga maka ola kam papak ibabai kalak i bas TUHAN nari lako nembah ras erdahin man dibata-dibata si deban. 17Adi ilakokenndu e, nembeh TUHAN man bandu. IbanNa kelegon gelah kerah kal tanehndu, maka kai pe la turah. E maka mate kam minter i je, aminna gia taneh si iberekenNa man bandu taneh si mehuli.
18Inget lah perentah-perentah enda dingen ergaken lah. Iketkenlah e i bas tanndu, pakeken lah e i bas perdempakkenndu maka lalap ingetndu. #Ul 6:6-9 19Ajarken man anak-anakndu. Cakapken lah kerna si e subuk sanga kam i rumah ntah i bas perdalanen, ntah sanga kam ngadi-ngadi, ntah sanga kam erdahin. 20Suratken undang-undang e i bas binangun pintun rumahndu ras pintun gerbangndu. 21Adi bage nggedang umurndu ras anak-anakndu i bas taneh si ipadanken TUHAN Dibatandu merekenca man nini-ninindu. Kam tetap nggeluh i je, kidekah lit denga langit i babo doni enda.
22Ikutkenlah alu tutus undang-undang si enggo kubereken man bandu, e me: kelengi TUHAN Dibatandu, lakoken kerina perentah-perentahNa, janah setialah man baNa. 23Adi bage ipelawesNa kerina bangsa-bangsa e adi kam mengketi daerah e. Iinganindu me taneh bangsa-bangsa si belinen ras gegehen asang kam. 24Kasa taneh si idedehndu jadi sikerajangenndu. Daerahndu mulai i gurun pasir i Selatan nari seh ku deleng-deleng Libanon arah Utara. I Lau Eprat nari arah Timur seh ku Lawit Tengah arah Barat. #Jos 1:3-5 25Amin ku japa pe kam lawes i bas negeri e, TUHAN Dibatandu si erbanca maka mbiar rayat negeri e man bandu, rikutken si ipadankenNa. Janah ise pe la ngasup ngalang-ngalangi kam.
26I bas wari enda kupepilihken man bandu pasu-pasu tah sumpah. 27Kam ipasu-pasu, adi iikutkenndu perentah-perentah TUHAN Dibatandu si kubereken man bandu wari enda, 28tapi kam kena sumpah adi la iikutkenndu perentah-perentah e, tapi nilah kam guna nembah man dibata-dibata si deban si la pernah isembahndu gelgel nari. 29Kenca itaruhken TUHAN kam ku negeri si nandangi iinganindu e, momokenlah pasu-pasu i datas Deleng Gerisim nari, tapi momokenlah sumpah i datas Deleng Ebal nari. #Ul 27:11-14; Jos 8:33-35 ( 30Ingan deleng si dua e arah Barat Lau Jordan i bas daerah bangsa Kanaan si ringan i Baluren Lau Jordan. Inganna kempak Barat, la ndauhsa i bas batang kayu More deherken kuta Gilgal.) 31Nandangi ikeparindu me Lau Jordan guna ngiani negeri si ibereken TUHAN Dibatandu man bandu. Adi enggo man bandu ras iinganindu negeri e, 32jaga maka tetap kam ngikutken kerina undang-undang si kubereken man bandu wari enda.”
Currently Selected:
ULANGEN 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
