2 SAMUEL 24
24
Sensus
(1Kro 21:1-27)
1Lit denga ate TUHAN nembeh nandangi bangsa Israel sekali nari, e maka ibahanNa Daud maba kesuliten man bangsa e. Nina TUHAN man Daud, “To lawes jenari kira kerina rayat Israel ras Juda.” 2E maka ibereken Daud perentah man Joap puanglima tenterana, “To lawes ras pegawaindu ku kerina suku-suku Israel mulai i bas ujung negeri ku ujungna si deban. Jenari kira rayat e, kueteh ateku beliganna.”
3Tapi ijabap Joap raja, “O Tuanku Raja, mungkin TUHAN Dibatandu mahan beligan rayat Israel seratus kali nari asang si genduari e. Janah mungkin nggeluh denga kam ngidah perbahanen TUHAN Dibatandu e. Tapi ngkai maka Tuanku Raja merincuh erbahan sensus?” 4Tapi iusahaken raja maka Joap ras pegawaina ngikutken perentahna, itadingken kalak enda adep-adepen raja jenari lawes ia kerina meligai rayat Israel.
5Ikepari kalak enda Jordan jenari erkemah ia i Selatan Arur kuta i tengah berneh, i daerah Gat. I jah nari lawes ia kerina ku Utara Jaser, 6jenari seh i Gileat jenari ku Kades i daerah Heti. 7Kenca bage lawes ia ku Dan janah i Dan nari lawes ia ku Selatan kuta kalak Hewi ras kalak Kanaan, jenari si perpudina ku Berseba i bagin Selatan Juda. 8E maka kenca siwah bulan dua puluh wari mulihken ia ku Jerusalem enggo idalanina kerina negeri e. 9Ilaporkenna man raja kerina beligan kengasupen tentera e me: 800.000 i Israel janah 500.000 i Juda.
10Tapi kenca Daud enggo erbahan Sensus e, pusuh peratenna mulai la senang, e maka nina man TUHAN, “Enggo mesangat dosa si kubahan alu erbahan sensus e! Alemi min dosangku erkiteken kebodohenku e.”
11-12Nina TUHAN man Gat nabi si Daud, “To dahi Daud janah kataken man bana maka Kubereken man bana telu si man pilihenna. Kulakoken si apai si ipilihna.” Pepagina erpagi-pagi, kenca Daud medak, 13idahi Gat ia, iturikenna man Daud kai si enggo ikataken TUHAN, kenca bage nungkun Gat, “Si apai si ipilihndu? Telu tahun dekahna kelihen i negerindu, ntah telu bulan kam kiam i bas adep-adepen musuhndu, ntah telu bulan dekahna penakit sampar i negerindu? Genduari ukurken manjar-anjar. Jenari turiken man bangku jabap si apai si kubaba mulih man TUHAN.”
14Nina Daud njabapsa, “Aku i bas keadan sakit. Tapi la ateku manusia si ngukum aku. TUHAN jinelah si ngukum aku, sabap perkuah ateNa.”
15Jenari ibereken TUHAN penakit sampar man Israel, menaken erpagi-pagi nari seh paksa si enggo itetapken, i bas ujung negeri ku tampukna si deban e maka mate me 70.000 kalak bangsa Israel. 16Kenca menam kernep Jerusalem, erkusur ukur TUHAN kerna ngukum bangsa e, jenari nina man malekat si munuhi bangsa e, “Bias! E enggo bias!” Malekat e lit i ingan ngerik Arauna kalak Jebusi.
17Idah Daud malekat e si enggo munuhi rayat e jenari nina man TUHAN, “Aku jine si ersalah. Aku saja si enggo erbahan lepak kai kin si enggo ibahan rayat si musil enda? Arus maka aku ras keluargangku nge si iukumNdu.”
18I bas wari e ka idahi Gat si Daud jenari nina man bana, “To lawes ku pengeriken Arauna, janah pajekken sada batar-batar persembahen man TUHAN.” 19Ipatuhi Daud perentah TUHAN e maka lawes ia bagi si enggo ikataken Gat man bana. 20Ipernehen Arauna ku berneh janah idahna raja ras pegawaina nangkeng ndahi ia. Idampeskenna bana ku taneh i lebe-lebe Daud 21jenari nungkun ia, “Tuanku Raja, erkai kam ku jenda?”
Nina Daud njabapsa, “Nukur ingan pengerikenndu janah majekken sada batar-batar persembahen man TUHAN gelah ngadi penakit sampar e.”
22“Buatlah, Tuanku Raja,” nina Arauna, “janah persembahkenlah man TUHAN kai iakapndu mehuli. I jenda lit piga-piga lembu man tutungen jadi sada persembahen i babo batar-batar e. Enda pasangen-pasangen gereta lembu ras kayu-kayu pengeriken man rantingna.” 23Ibereken Arauna e kerina man raja jenari nina, “Mbera ialoken TUHAN Dibatandu persembahenndu.”
24Tapi nina raja erjabap, “Labo bage, kugalari nge e kerina man bandu. La kupersembahken man TUHAN Dibatangku persembahen-persembahen la ertukur.” E maka igalarina ingan pengeriken ras lembu e lima puluh duit pirak. 25Kenca bage ipajekkenna sada batar-batar persembahen man TUHAN jenari ipersembahkenna persembahen tutungen ras persembahen persadan. E maka penakit sampar i Israel enggo ngadi.
Currently Selected:
2 SAMUEL 24: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
