2 SAMUEL 23
23
Kata-kata Daud si perpudina
1Daud anak Isai. Dibata erbahanca ia jadi si mbelin. Dibata nu Jakup milih ia jadi raja. Janah ia nuratken ende-enden man Israel. Enda me kata-kata Daud si perpudina:
2Kesah TUHAN ngerana arah aku;
pedahNa i bas babahku.
3Dibata nu Israel enggo ngerana,
penampat Israel ngerana bangku:
“Raja si merentah alu adil,
si merentah i bas kepatuhen nandangi Dibata
4bali ras sinalsal matawari si la lit embunna,
matawari si erbahan dukut erndilap kenca udan.”
5Janah bage me Dibata masu-masu kesusurenku,
sabap enggo ibahanNa sada perpadanen si tetap man bangku,
sada perpadanen si la banci iobah
sada padan si la sambar-sambar.
E me kerina kesikelku e me kemenangenku
janah Dibata kap merekenca.
6Kalak si ngelawan Dibata bali ras duri si ibenterken;
ise pe la pang ncikepsa alu tanna.
7Pala ipakena perkakas besi ntah lembing;
meseng me kerina kalak si ngelawan Dibata.
Tentera Daud si terberita
(1Kro 11:10-41)
8Enda me gelar-gelar tentera Daud si terberita: si pemena e me Josep Basebet i Takemon nari. Ia peminpin “Si Telu”, ia erperang alu lembingna ngelawan 800 kalak janah ibunuhna kerina i bas sada peperangen.
9Kalak si terberita peduaken i bas si telu e e me: Eleasar anak si Dodo i bas terpuk Ahoh nari. I bas sada wari ia ras Daud ngelawan bangsa Pilisti si enggo pulung guna erperang. Bangsa Israel mundur, 10tapi ia tetap ertahan, ilawanna kalak Pilisti, seh maka tanna enggo penggingen e maka lanai terpulahisa pedangna. Mbelin kal kemenangen TUHAN i bas wari e. Kenca perang e enggo dung mulihken bangsa Israel ndahi Eleasar, jenari itangtangina baju kalak si enggo mate e.
11Kalak si peteluken i bas si telu si terberita e, e me Sammah anak si Age i Harar nari. Bangsa Pilisti enggo pulung i Lehi i bas sada juma si isin kacang gara. Kalak Israel kiam iayak-ayak bangsa Pilisti 12tapi Sammah tetap ertahan i bas juma e, jenari ibunuhina bangsa Pilisti. Mbelin kal kemenangen TUHAN, i bas wari e.
13I bas sada wari i bas permulan paksa rani, Daud sangana i bas gua Adulam. E maka reh telu kalak i bas “Si Telu puluh” ndahi ia. Sanga si e sada rombongen bangsa Pilisti erkemah i Baluren Repaim. 14Paksa si e Daud sangana i das sada uruk-uruk si erbenteng, janah sada terpuk bangsa Pilisti enggo ngkuasai Betlehem. 15Tedeh ate Daud kutana, e maka nina, “Merincuh kal min aku sekalak maba lau inemen i bas sumur i pintun gerbang Betlehem nari!” 16Teluna tentera si terberita e iterobosna perkemahen bangsa Pilisti, ijarukna lau i bas sumur e nari jenari ibabana mulih man Daud. Tapi la nggit Daud minem lau e; tapi iamburkenna lau e jadi sada persembahen man TUHAN, 17e maka nina, “TUHAN, ndigan pe la aku nggit nginemsa lau e! E seri kap ras minem dareh kalak enda si ngasamken kesahna!” E maka la ia nggit nginem lau e.
Bagem rawana teluna tentera si terberita e.
18Senina Joap, si Abisai (nande kalak enda Seruya gelarna) ia me peminpin “Si Telu puluh si terberita”. Ia erperang alu lembingna ngelawan 300 kalak janah ibunuhna kerina e maka ia jadi terberita i bas “Si Telu puluh”. 19Ia me si terberitana i bas “Si Telu puluh” e maka ia me jadi peminpin, tapi lebih terberita denga ka “Si Telu” asangken ia.
20Benaya anak Joyada i Kabsel nari, e me tentera si deban si terberita; ia sekalak si mbisa tuhu-tuhu. Ia enggo munuh dua tentera Moap si mbisa. I bas sada paksa, lawes ia ku bas sada lubang tupung salju sangana nusur jenari ibunuhna sada singa i je. 21Sekalak bangsa Mesir si mbestang pe ibunuhna. Bangsa Mesir e ncikep sada lembing. Benaya ngelawan bangsa Mesir alu cikenna, isintapkenna lembing e i bas tan kalak Mesir e nari jenari ibunuhna kalak Mesir alu lembing e ka. 22E me kinimbisan si ilakoken Benaya. Ia pe sekalak i bas “Si Telu puluh”. 23Ia me si terberitana i bas “Si Telu puluh” tapi terberitan denga “Si Telu” asang ia. Itamaken Daud ia ertugas jadi pengawal peribadina.
24-39Enda me kerina anggota-anggota “Si Telu puluh”:
Asahen senina Joap
Elhanan anak Dodo i Betlehem nari
Sammah ras Elika i Harod nari
Heles i Pelet nari
Ira anak Ikes i Tekoa nari
Abieser i Anatot nari
Mebunai i Husa nari
Salmon i Aho nari
Maharai i Netopa nari
Helep anak Baana i Netopa nari
Itai anak Ribai i Gibea i bas daerah Benyamin nari
Benaya i Piraton nari
Hiddai i bas baluren deher Gaas nari
Abialbon i Araba nari
Asmawet i Bahurim nari
Eliaba i Salbon nari
Anak-anak Jasen si dilaki
Jonatan
Sammah i Harar nari
Ahiam anak Sarar i Harar nari
Elipelet anak Ahasbai i Maaka nari
Eliam anak Ahitopel i Gilo nari
Hesro i Karmel nari
Paarai i Arab nari
Igal anak Natan i Soba nari
Bani i Gat nari
Selek i Amon nari
Naharai i Beerot nari, si maba senjata Joap
Ira ras Gareb i Jatir nari
Uria kalak Heti
Kerina lit telu puluh pitu tentera si terberita.
Currently Selected:
2 SAMUEL 23: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
