2 SAMUEL 17
17
Rencana Ahitopel igagalken si Usai
1Lanai ndekahsa kenca si e ngerana Ahitopel man Absalom nina, “Bere kupilihi 12.000 kalak janah i bas berngi enda ngayaki Daud. 2Gelah kuperang sanga ia latih ras kote. Gelah kusengget ia jenari kiam kerina tenterana. Raja ngenca si kubunuh. 3Jenari kubaba man badu kerina kalak si ras ia desken sekalak penganten mulihi ndahi perbulangenna. Kam ersura-sura munuh sekalak jelma ngenca; rayat si tading selamat nge.” 4Ajar enda lit perjilena iakap Absalom ras kerina peminpin-peminpin bangsa Israel.
5Amin bage gia nina Absalom, “Genduari lebuhken Usai, gelah sibegiken kai nina.” 6Kenca Usai enggo seh ngerana Absalom man bana, “Enda me ajar si enggo ibereken Ahitopel man banta. Si ikut nge e? Adi lang turiken dage man kami kai si man bahanen.”
7Erjabap Usai, “Ajar Ahitopel sekali enda la mehuli. 8Ietehndu maka bapandu Daud ras kalak si ras ia kerina kalak mbisa erperang, janah genduari kerina sangana merawa desken indung mberuang kebenen anak. Bapandu pe sekalak tentera si erpengalamen, janah i bas berngi enda labo ia tading ras anak buahna. 9Nggit me maka i bas paksa enda ia sangana cebuni i bas sada gua ntah i bas ingan si deban. Adi enggo iserang Daud tenterandu, ise pe si megisa e la banci la ngataken tenterandu enggo talu. 10E maka amin si merawana pe si la meteh mbiar desken singa pe mbiar, sabap kerina bangsa Israel meteh bapandu tentera si mbisa janah kalak si ras ia pe kerina mbisa. 11Pedahku maka ipepulungndu kerina bangsa Israel i bas tampuk negeri nari seh ku tampukna si deban, bali teremna ras kersik i tepi lawit. Jenari babaindu ia kerina erperang. 12Ugapa pe sidat nge ia amin i japa pe ia, jenari siserang ope denga ietehna kai jadi. Ia ras kalak si ngikut ia sada pe la pulah. 13Adi ia mundur ku bas sada kuta, kerina rayatna maba nali jenari gelah irintak kuta e ku bas baluren seh sada batu pe la lit tading i das tampuk uruk e.”
14Megi si e nina Absalom ras kerina kalak Israel, “Ajar Usai ulin asangken ajar Ahitopel.” Enggo itetapken TUHAN maka ajar Ahitopel si mehuli e la iikutken, gelah reh cilaka man Absalom.
Daud ipersingeti janah pulah i bas bahaya nari
15Kenca bage ituriken Usai man Imam Sadok ras Abiatar ajar si enggo iberekenna man Absalom ras man peminpin Israel janah ajar si enggo ibereken Ahitopel. 16Itambahi Usai cakapna nina, “Genduari pedasken! Suruh sekalak utusen ndahi Daud gelah ola ia erberngi i dalan ngepar lau si lit i taneh mesawang, tapi minterlah ngepari Lau Jordan, gelah ia ras kalak si ras ia la ketunduken jenari ibunuh.”
17Biasana Jonatan anak Abiatar ras Ahimas anak Sadok nimai i ulu Lau Enrogel i darat kuta Jerusalem, sabap la ia pang duana idah mengketi kuta e. Sekalak suruh-suruhen diberu reh ka ndahi kalak enda jenari nuriken man bana kai si enggo jadi, janah kenca bage lawes Jonatan ras Ahimas ngatakenca man Raja Daud. 18Tapi i bas wari si e rembang sekalak danak-danak ngidah kalak enda, e maka ikatakenna man Absalom. Minter kalak enda cebuni i bas rumah sekalak jelma i Bahurim. Lit sada sumur deherken rumahna e, e maka bengket Jonatan ras Ahimas ku bas sumur e. 19Ibuat ndehara empu rumah ndai sada tutup, ikimbangkenna e i babo lubang sumur e, jenari iamburkenna gandum i babona gelah ola ise pe mperdiatekenca. 20Pegawai-pegawai Absalom reh jenari isungkunna diberu e nina, “I ja Ahimas ras Jonatan?”
“Enggo ia ngepar lau e,” nina njabapsa.
Idarami pegawai Absalom kalak ndai duana, tapi la ia jumpa, e maka mulih ia ku Jerusalem. 21Ndarat Ahimas ras Jonatan i bas sumur e nari, jenari pedas-pedas lawes njumpai Raja Daud nurikenca kerina. Nina Ahimas ras Jonatan, “Ahitopel mereken ajar guna merang kam, Raja. E maka genduarilah kam berkat ngepari lau enda.” 22Lawes Daud ras tenterana ngepari Lau Jordan. Pepagina erpagi-pagi kerina enggo seh i lepar lau e.
23Kenca idah Ahitopel maka nasehatna la ibegiken kalak, ipasangna pelana keledena mulih ia ku kutana. Kenca idungina kerina urusenna ideliskenna bana. Ikuburken ia i bas kuburen keluargana.
24Daud seh i Kuta Mahanaim sanga Absalom ras bangsa Israel ngepari Lau Jordan. ( 25Absalom ngangkat Amasa jadi puanglima nggantiken Joap. Amasa anak Jeter bangsa Ismael, gelar nandena Abigail anak Nahas senina Seruya, nande Joap.) 26Absalom ras bangsa Israel erkemah i negeri Gileat.
27Kenca Daud seh i Mahanaim jumpa ia ras Sobi anak Nahas anak kuta Raba nari i Amon, bage pe Mahir anak Amiel i Lodebar nari ras Barsilai i Rogelim nari i Gileat. 28-29Ibaba kalak enda mangkuk, kudin taneh, tilam, bantal, bagepe pangan man Daud, ras anak buahna e me: gandum, page, cimpa, becih page, kacang ras ritik, tengguli ras mentega, ras biri-biri. Ieteh kalak enda maka Daud ras kalak si ras ia melehe, muas, janah latih i bas taneh si mesawang.
Currently Selected:
2 SAMUEL 17: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
