2 SAMUEL 16
16
Daud ras Siba
1Kenca sitik denga ibentasi Daud tampuk uruk e, rempet ia ijumpai Siba suruh-suruhen Mepiboset. Iteguna dua kelede maba 200 roti, 100 tandan anggur si enggo kerah, 100 iket buah pangan si mbaru denga iputikken, sada kantongen dem lau anggur. #2Sam 9:9-10 2Nungkun Raja Daud man Siba, “Man kadendu enda kerina?”
Erjabap Siba, “Kelede enda man ersaken keluarga Raja, roti ras buah pangan enda man pangan anak buahndu, anggur enda man inemenna i taneh si mesawang adi latih iakapna.”
3“I ja Mepiboset kempu tuanndu Saul?” nina raja nungkunsa.
“Ia tading i Jerusalem,” nina Siba. “Sabap iakapna maka genduari iulihken me man bana kerajan nini bulangna Saul.”
4Nina raja man Siba, “Kerina sikerajangen Mepiboset genduari jadi sikerajangenndu.”
“Kai nindu kuikutken,” nina Siba. “Ngenalah atendu tetap nandangi aku, o Raja!”
Daud ras Simei
5Kenca Raja Daud seh i Bahurim, sekalak keluarga Saul, Simei anak Gera reh njumpai Daud. Kenca ia seh isumpahina Daud la erngadi-ngadi. 6Jenari ibenteri Simei Raja Daud ras pegawaina, aminna pe Daud i keleweti tentera ras pengawal peribadina. 7Isumpahi Simei Raja Daud nina, “To lawes kam! Ndarat! Pemunuh! Penjahat! 8Ibuatndu kerajan Saul, e maka genduari TUHAN ngukum kam, sabap ibunuhndu nterem keluarga Saul. Enggo ibereken TUHAN kerajan e man anakndu Absalom, e maka enggo kam bene, o pemunuh!”
9Abisai si nandena Seruya ngerana man raja, “O Raja, ngkai maka iberendu biang e numpahi kam? Pelepas kudahi ia maka kutampul kerahungna!”
10“Labo urusenndu e,” nina raja man Abisai ras man seninana Joap. “Adi isumpahina aku sabap TUHAN si nuruhsa, ise kin lit hakna nungkunsa, ngkai maka ilakokenna e?” 11Jenari nina Daud man Abisai ras pegawaina kerina, “Anakku jine pe ibunuhna atena aku. Engkai maka mamang atendu ngidah perbahanen kalak Benyamin enda? TUHAN si nuruh ia numpahi, e maka ola iganggundu ia, pelepas ia sumpah-sumpah. 12Ntah mawen iperdiateken TUHAN kiniseranku jenari iberekenNa bangku pasu-pasu gancih sumpahna e.” 13Jenari iterusken Daud perdalanenna ras kerina pengikutna. Simei pe lalap ngikut-ngikut erdalan i awak uruk e. Janahna erdalan sumpah-sumpah ia, ibenterina rombongen Daud alu batu, ras taneh. 14Latih iakap Daud ras rombongenna kenca seh i Lau Jordan, e maka ngadi ia.
Absalom i Jerusalem
15Absalom ras kerina bangsa Israel bage pe Ahitopel ikut bengket ku Jerusalem. 16Sanga Usai teman si iteki Daud jumpa ras Absalom, ersurak Usai nina, “Mejuah-juahlah Raja! Mejuah-juahlah Raja!”
17“Engkai maka kam la setia man temanndu Daud?” nungkun Absalom kempaksa. “Engkai maka la kam ras lawes?”
18Nina Usai njabapsa, “Ja nge aku nggit! Aku tetap erpihak ras kalak si ipilih TUHAN, si ipilih kalak enda, si ipilih kerina bangsa Israel. Aku tading ras kam. 19I babo si e kerina jadi suruh-suruhen ise kin aku arusna, adi la jadi suruh-suruhen anak tuanku? Mbarenda aku suruh-suruhen bapandu, dage genduari aku ka jadi suruh-suruhenndu.”
20Kenca bage nungkun Absalom man Ahitopel nina, “Genduari kita enggo seh i jenda, kai iakapndu si man bahanenta?”
21Njabap Ahitopel, “To pedemi gundik bapandu si tading njaga istana. Alu bage kerina kalak Israel meteh kam enggo rimbang ras bapandu, e maka kerina pengikutndu reh tetapna ukurna.” 22Kenca bage ipajekken kalak enda kemah man Absalom i datas tarum istana, jenari bengket Absalom, ipedemina gundik bapana janah ngidah kalak kerina. #2Sam 12:11-12
23Kerina pedah-pedah Ahitopel tupung e ialoken tempa-tempa bali ras kata Dibata. Daud ras Absalom pe ngikutkenca.
Currently Selected:
2 SAMUEL 16: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
