2 KRONIKA 19
19
Sekalak nabi mandang Josapat
1Raja Josapat i Juda nari mulih alu mejuah-juah ku istanana i Jerusalem. 2Sekalak nabi, e me Jehu anak Hanani reh njumpai ia jenari nina man raja e, “Iakapndu kin payo nampati kalak si jahat dingen ngkapiti kalak si ernembeh ate man TUHAN? Kai si enggo ibahanndu e erbahanca nembeh ate TUHAN man bandu. 3Tapi aminna pe bage, lit nge si mehuli i bas kam. Enggo iaguindu kerina gana-gana Dewi Asera si isembah jelma si nterem. Janah enggo ipala-palaindu ngikutken kai si ngena ate Dibata.”
Pembaharun si ibahan Josapat
4Aminna pe Josapat ringan i Jerusalem, tetap nge isiar-siarna jelma si nterem, mulai i Berseba nari i Selatan ku deleng-deleng Eperaim i Utara, guna ngajuk bangsa e gelah mulihken ku TUHAN, Dibata nini-ninina. 5Itugaskenna hakim-hakim i bas tep-tep kuta Juda, si erbenteng, 6janah ipedahkenna man hakim-hakim e, “Metengetlah kam erbahan keputusen. Kam labo erdahin erpalasken kuasa manusia, tapi erpalasken kuasa TUHAN, janah iperdiatekenNa kap kam tupung kam mutusken ukumen. 7Mbiarlah man TUHAN janah metengetlah ndahiken dahinndu, sabap TUHAN Dibatanta la ateNa ngena kalak nipu ntah pe kalak si erbahan keputusen rayo-ayo ntah pe si ngaloken sogok.”
8I Jerusalem itugasken Josapat kalak Lewi, imam-imam dingen piga-piga kalak kuta e si terkemuka jadi hakim-hakim guna mutusken perkara-perkara pelanggaren Undang-undang TUHAN ntah perkara-perkara si debanna. 9Man kalak ndai iperentahkenna bagenda, “Arus kam ndahiken dahinndu alu erkemalangen man TUHAN, dingen alu patuh ngikutken IA i bas kasa kai si idahikenndu. 10Adi reh seninandu si sada bangsa i bas kuta-kuta nari nehken perkara pembunuhen, ntah perkara pelanggaren undang-undang ntah perentah TUHAN, arus maka alu metenget iajarkenndu man bana kuga lagu langkah si arus kidekah erperkara e, gelah ola ia erdosa man TUHAN. Adi la iajarkenndu ia, kam ras temanndu e la banci lang ngenanami kuga serana pernembeh ate TUHAN. Tapi adi iajarkenndu lah ia, kam la ersalah. 11Imam si Mbelin Amaria, kuasana me si meganjangna i bas perkara-perkara agama janah Sebadia anak Ismail, gubernur Juda, kuasana me si meganjangna i bas perkara-perkara si deban. Kalak Lewi ertanggung jawab ngawasi pelaksanan keputusen pengadilen. Tetapkenlah ukurndu janah dahikenlah perentah-perentah enda. TUHAN kap si ngkapiti si benar!”
Currently Selected:
2 KRONIKA 19: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
