2 KRONIKA 18
18
Nabi Mikaya mpersingeti Raja Ahap
(1Raj 22:1-28)
1Kenca Raja Josapat i Juda nari enggo bayak dingen terberita, iaturna sada perjabun i bas anggota keluargana nari ras anggota keluarga Raja Ahap i Israel nari. 2Piga-piga tahun kenca si e lawes Josapat ku Samaria ndahi Ahap. Guna mereken kehamaten man Josapat ras rombongenna, mbue biri-biri ras lembu igeleh Ahap guna erbahan pesta man-man. Iendik-endikna Josapat gelah ras ia merang kuta Ramot i Gileat. 3Nina man Josapat, “Nggit kam ras kita merang kuta Ramot?”
Nina Josapat ngaloi, “Bali nge aku ras kam. Rayatku bali nge ras rayatndu. Ikut kami ras kam erperang.” 4Tapi nina Josapat tole, “Tapi sisungkun lebe TUHAN.”
5E maka ilebuh Ahap nabi-nabi; lit teremna kira-kira empat ratus kalak, jenari isungkunna nabi-nabi e nina, “Banci kang kuserang kuta Ramot ntah lang?”
“Seranglah,” nina nabi-nabi e njabapsa. “Dibata si mereken kemenangen man bandu.”
6Tapi nungkun Josapat nina, “Lanai kin lit i jenda nabi si deban si banci jadi kelang-kelangta nungkun man TUHAN?”
7Nina Ahap njabapsa, “Lit sekalak nari, e me Mikaya anak Imla. Tapi nembeh ateku ia sabap la pernah ia ernubuat kerna si mehuli man bangku; si lalap si la mehulina.”
“La arus kam bage ngerana!” nina Josapat ngaloi.
8E maka ilebuh Raja Ahap sekalak pegawai istana jenari ikatakenna man pegawai e gelah minter ia lawes ngelegi Mikaya.
9Duana raja e, ipakena paken kerajan. Kundul ia das kursi kinirajanna i bas ingan ngerik i daraten pintu gerbang Samaria. Janah kerina nabi-nabi e ernubuat i adep-adepenna. 10Sekalak i bas nabi-nabi e nari e me Sedakia anak si Kenaana, ibahanna tanduk besi jenari nina man Ahap, “Bagenda nina TUHAN, ‘Alu enda ilawanndu bangsa Siria e janah ikernepkenndu ia.’ ” 11Kerina nabi-nabi si deban pe seri cakapna nina, “Laweslah erperang ngelawan Ramot, tentu kam menang. TUHAN si mereken kemenangen man bandu.”
12Sanga e pengawal si enggo lawes ngelegi Mikaya ngerana man Mikaya nina, “Kerina nabi-nabi si deban enggo ernubuat maka si mehuli nge jadi man raja, ntah kam pe ulin nge bage ka perbahanndu.”
13Tapi ngaloi Mikaya nina, “Erkiteken TUHAN si nggeluh, arus kukataken kai si isuruh Dibatangku!”
14Kenca ia enggo tedis i adep-adepen Raja Ahap, isungkun raja ia nina, “O Mikaya, banci kang Raja Josapat ras aku lawes merang Ramot ntah lang?”
“Seranglah!” nina Mikaya njabapsa. “Tentu saja kam menang. TUHAN si mereken kemenangen man bandu.”
15Tapi ngaloi Ahap nina, “Adi kam ngerana man bangku i bas gelar TUHAN turikenlah si tuhuna. Piga kali arus kukataken si e man bandu?”
16Nina Mikaya njabapsa, “Kuidah tentera Israel marpar i uruk-uruk desken biri-biri si la lit permakanna. Janah nina TUHAN, ‘Kalak enda la lit peminpinna; pelepaslah ia mulih alu dame!’ ” #Bil 27:17; Esek 34:5; Mat 9:36; Mrk 6:34
17Nina Ahap man Josapat, “Bagi si kukataken man bandu ndai, la pernah inubuatken si mehuli man bangku; lalap si la mehulina!”
18Tole nina Mikaya, “Genduari begiken si ikataken TUHAN! Kuidah TUHAN kundul i bas kursi kinirajanNa i Surga dingen kerina malekatna tedis i kawes ras kemuhenNa. 19Nina TUHAN, ‘Ise si nipu Ahap gelah ia lawes gelah ibunuh i Ramot?’ Pelain-lain kerina jabap malekat e. 20Dungna reh sada kesah, ideherina TUHAN nina, ‘Kutipu ateku Ahap’ ‘Uga carana?’ nina TUHAN nungkun. 21Nina kesah e ngaloi, ‘Aku ndahisa janah aku erbahanca maka kerina nabi-nabi Raja Ahap e nuriken si la tuhu.’ Nina TUHAN, ‘To lawes jenari tipu ia. Ugapa pe ngasup nge kam nipu ia.’ ”
22Jenari nina Mikaya ndungi rananna, “Enda me si enggo jadi. TUHAN si erbahanca maka nabi-nabindu enda ngataken si la tuhu man bandu. Tapi TUHAN jine ngatakenca maka bene me kam.”
23Kenca bage ideheri nabi Sedekia si Mikaya, iparapna Mikaya jenari nina, “Ndigan kin kesah TUHAN nadingken aku jenari ngerana man bandu?”
24“Idahndu nge denggo sanga kam cebuni,” nina Mikaya ngaloi.
25Iperentahken Raja Ahap sekalak pengawalna nina, “Tangkap Mikaya, jenari baba ia man Amon gubernur kuta enda, ras man putra mahkota Joas. 26Kataken man bana duana maka ipenjarakenna Mikaya dingen roti ras lau saja bereken bana seh aku mulih alu mejuah-juah.”
27“Adi mulih kam alu mejuah-juah,” nina Mikaya, “e tandana maka TUHAN la ngerana bangku!” Jenari tole nina Mikaya, “Kerina kam, begiken kai si enggo kukataken enda!”
Raja Ahap mate
(1Raj 22:29-35)
28Kenca bage Ahap, raja Israel ras Josapat raja Juda duana ras berkat merang kuta Ramot i Gileat. 29Nina Ahap man Josapat, “Sanga kita lawes erperang, aku menyamar, tapi kam pakelah paken kinirajanndu.” Dage raja Israel lawes ku peperangen alu menyamar.
30Enggo iperentahken raja Siria man puanglima pasukenna si ergereta perang maka ola iserangna ise pe seakatan raja Israel. 31Dage sanga idah tentera Siria Raja Josapat, kerina ia erpengakap maka Josapat me raja Israel. E maka erkusur kalak ndai, iayakina Josapat. Tapi nderkuh Josapat, janah isampati TUHAN Dibata ia jenari ipelawes Dibata tentera Siria e i bas Josapat nari. 32Idah puanglima tentera si ergereta perang maka ia labo raja Israel, e maka ingadikenna ngelis-ngelissa. 33Tapi rembang lit sekalak tentera Siria manahken anak panahna, janah ngkenai Raja Ahap kelang-kelang perdemun baju perangna. “Enggo aku kena!” nina erlebuh man si maba gereta perangna. “Ota mulih janah ndarat i bas perang enda nari!” 34Kidekah perang e terus denga erbintur, Raja Ahap tetap tedis alu irante i das geretana ngalaken tentera Siria e. Kenca matawari sundut mate ia.
Currently Selected:
2 KRONIKA 18: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
