1 SAMUEL 5
5
Peti Perpadanen i tengah-tengah kalak Pilisti
1Kenca Peti Perpadanen enggo itaban kalak Pilisti, ilanjana Peti e i Ebeneser nari ku kuta Asdot. 2Ibabana ku bas Rumah Pertoton dibatana Dagon, jenari icibalkenna deher gana-gana. 3Lampas pepagina idah penduduk Asdot maka gana-gana Dagon enggo mbulak ku taneh langkem i lebe-lebe Peti Perpadanen TUHAN. E maka iangkat kalak ndai gana-gana e jenari itamakenna mulihi ku bas inganna. 4Lampas ka pepagina idahna maka gana-gana ndai enggo ka mbulak i lebe-lebe Peti Perpadanen. Sekali enda enggo penggel takalna ras duana tanna janah ampar i bas pintun; badanna nari ngenca tading. ( 5Em sabapna maka genduari pe imam-imam Dagon ras kerina si nembah ia i Asdot nilahi ingan e, la idedehna.)
6 TUHAN ngukum anak kuta Asdot alu mesangat janah mbiar ia kerina ibahanNa. IukumNa ia ras penduduk si lit i sekelewet daerah e. Barehen kerina ibahanNa. 7Kenca idahna kai si jadi nina kerina, “Dibata Israel ngukum kita ras ngukum dibatanta Dagon, lanai terban kita Peti Perpadanen e tading i jenda terdekahen.” 8E maka isuruh pertenahen guna ndilo raja Pilisti si lima gelah pulung. E maka isungkunna raja-raja e nina, “Uga nge sibahan nandangi Peti Perpadanen Dibata Israel?”
“Pindahken ku Gat,” nina ngaloisa. E maka ibabana Peti e ku Gat, sada kuta si deban i bas kalak Pilisti. 9Tapi kenca Peti e seh i je, kuta e pe iukum TUHAN ka, e maka seh kal ia biarna kerina. IukumNa alu bareh si turah i bas kerina anak kuta e, nguda ras metua. 10Erkiteken si e ikirimkenna Peti Perpadanen ku Ekron, sada kuta si deban i bas daerah kalak Pilisti, tapi enggo kenca seh i je, minter nderkuh penduduk kuta e nina, “Ibabana Peti Perpadanen Dibata Israel ku jenda, gelah munuh kita kerina!” 11E maka itenahkenna ka mulihken kerina raja-raja Pilisti nina, “Kiremken mulih Peti Perpadanen e ku inganna, gelah ola ibunuhna kita ras keluarganta.” Kebiaren si mbelin ndemi kerina kuta e, sabap iukum Dibata alu mesangat. 12Kalak si la mate pe turah bareh i bas ia e maka anak kuta e nderkuh mindo penampat man dibata-dibatana.
Currently Selected:
1 SAMUEL 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
