1 SAMUEL 4
4
Peti Perpadanen itaban
1Tupung e pulung me kalak Pilisti guna merangi Israel, e maka ndarat bangsa Israel ngelawanca. Ibahan kalak Israel inganna erkemah i Ebeneser janah kalak Pilisti i Apek. 2Reh kalak Pilisti nerangsa janah kenca jadi perang mesangat italukenna bangsa Israel. Lit ibunuhna kira-kira 4.000 kalak i bas mbalmbal ingan peperangen e. 3Kenca tentera si nggeluh denga mulih ku ingan erkemah nina peminpin Israel, “Engkai ndia maka ipelepas TUHAN kita italuken kalak Pilisti sendah? Otalah si legi Peti Perpadanen TUHAN ku Silo gelah berkat IA ras kita jenari ikeliniNa kita i bas musuh-musuhta nari.” 4E maka isuruhna pertenahen ku Silo, ngelegi Peti Perpadanen TUHAN, si nggambarken kursi kemulian TUHAN si Mada Kuasa, janah duana anak Eli, Hopni ras Pinehas, ikut reh ras Peti Perpadanen e. #Kel 25:22
5Kenca Peti Perpadanen e seh, ersurak kal bangsa Israel alu sora megang perban riahna ukurna seh maka kumeter taneh ibahanna. 6Kalak Pilisti megi sora ersurak e janah nina, “Begikenlah sora esurak e i bas kemah bangsa Heber. Kai nge ertina?” Kenca enggo tereteh man bana maka Peti Perpadanen TUHAN enggo seh i bas ingan bangsa Heber erkemah 7mbiar ia, jenari nina, “Sada dibata enggo reh ku ingan kalak ah erkemah! Nai nari la enggo pernah jadi bagenda man banta! 8Ise kin ngasup ngkelini kita i bas dibata-dibata si megegeh ah? Ia me kap dibata-dibata si munuhi kalak Mesir i gurun pasir! 9Piherkenlah ukurndu, o kalak Pilisti! Erperanglah bagi dilaki, adi lang tentu kita jadi budak bangsa Heber ah, bagi nai ia jadi budakta. E maka erperanglah bagi dilaki!”
10E maka iseraken bangsa Pilisti erperang jenari italukenna bangsa Israel. Kiam kerina kalak Israel ku rumahna. Nterem kal kalak si ibunuh; 30.000 kalak tentera Israel. 11Peti Perpadanen Dibata pe itaban kalak Pilisti, janah anak-anak Eli, e me Hopni ras Pinehas mate duana.
Kematen Eli
12Sekalak dilaki suku Benyamin kiam i bas ingan erperang e nari terus ku Silo janah seh ia i Silo i bas wari e kang. Guna nuduhken atena ceda, icaingkenna uisna janah itamakenna taneh i bas takalna. 13Eli tuhu-tuhu aru kal atena kerna Peti Perpadanen e, sangana kundul i bas bangku-bangku i tepi pasar, la erngadi-ngadi natap kempak pasar e. Ipebelang kalak ndai berita i bas kuta e, jenari nderkuh ia kerina perban biarna. 14Ibegi Eli sora gejek e, e maka nungkun ia nina, “Engkai maka gejek kal?” Pedas-pedas kalak ndai ndahi Eli guna nuriken berita e man bana. ( 15Eli genduari enggo siwah puluh waluh tahun umurna janah menam sitik pe lanai lit pengidahna.) 16Nina kalak ndai, “Aku enggo lompat i bas peperangen nari janah terus ndai aku kiam ku jenda.”
Isungkuni Eli ia nina, “Kai kin si jadi anakku?”
17Ngaloi persuruhen ndai nina, “Israel enggo kiam i bas bangsa Pilisti nari; mesangat kal ketalunta! Tambah si e, anakndu Hopni ras Pinehas enggo mate, janah Peti Perpadanen Dibata pe enggo itaban.”
18Kenca ibelasken kalak ndai Peti Perpadanen e, mbulak minter Eli ku pudi i bas inganna kundul nari deherken pintu gerbang. Perban enggo ia metua kal ras mbur ka pe, e maka pergulingna e erbanca penggel kerahungna, jenari mate. Ia jadi peminpin Israel empat puluh tahun dekahna.
Kematen ndehara Pinehas si enggo mbalu
19Permain Eli ndehara Pinehas, sangana mehuli kulana, janah menam seh paksana mupus. Asum ibegina maka Peti Perpadanen Dibata enggo itaban janah bengkilana Eli ras perbulangenna enggo mate minter mesui akapna jenari mupus ia. 20Nandangi ia mate, diberu-diberu si nampati ngataken man bana nina, “Piherken ukurndu! Enggo ipupusndu sekalak anak dilaki!” Tapi lanai diatena janah la ia ngaloi. 21Ibahanna gelarna anak ndai Ikabot, sabap nina, “Kemulian Dibata enggo nadingken Israel.” Si imaksudkenna e me erkite-kiteken Peti Perpadanen Dibata enggo itaban. Perbulangenna ras bapa perbulangenna pe enggo mate. 22“Kemulian Dibata enggo nadingken Israel, erkiteken Peti Perpadanen Dibata enggo itaban,” nina.
Currently Selected:
1 SAMUEL 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
