Maatiwoos Mishiraachcha 12

Usheexxaxxi Ayyaa'm Bikkina Yesuusa Xa'mmakko'isa

(Mar 2:23-28; Luq 6:1-5)

1 # Se'l 23:25 Ee ammane Yesuus Usheexxaxxi Ayyaamonne hurbaaxxi worinne higam hee'ukko. Ixxi losaanim sibaatta'a hee'llo'i bikkina hamaamika quxxa'a cukkita'a itimma asheetto'o. 2Farisaawe'uwwi eekka moo'llo'i ammanenne Yesuusina «Ki losaan Usheexxaxxi Ayyaamonne issimmina laboobee'i luwwa issitamisa moo'e!» yito'o.

3 # 1Sam 21:1-6 Yesuusim ixxuwwina dabaraa «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe? 4#Qes 24:9 Ixxi Keesammi Mine aagaa qeessuwwiinsi bagaan ixxi te'im ixxenne maqire hee'llo'i manni itimmi hasisoobee'i keesammi qorosho'o itukko. 5#Xiq 28:9 Odim Usheexxaxxi Ayyaamonne Keesammi Minenne qeessuwwi ee Usheexxaxxi Ayyaa'm seera gindito'aarem baaxiil ihoobee'isa Seeranne qananaa'llakko'oyyonnihe? 6An ki'nnuwwina kuroommo; Keesammi miniinsi lophphookkok keyye yookko. 7#Mat 9:13; Hos 6:6 ‹Diinate kitimimmi ihoo'n qishixximma iittoommo› yookkok mayyimda'e ihukkisa qoossitakko'oohan ihuta'n bi'ishshibee'i mannanne oogattakkam hee'llakko'oyyo. 8Manchi Beet Usheexxaxxi Ayyaaminam annichchomena'e» yukko.

Angi Shiihaakkoo Mancho Yesuus Fayyiisukkisa

(Mar 3:1-6; Luq 6:6-11)

9Yesuus ee beyyiinsi maraa Ayihuxxi manni wixxixxi mine aagukko. 10Eekke'em angi shiihaakkoo mat manchi hee'ukko. Ee ammane Yesuusa kasasseena hassam manni «Seeranne ‹Usheexxaxxi Ayyaamonne manna fayyiissehe› yoohonnihe?» yita'a xa'mmito'o.

11 # Luq 14:5 Yesuusim ixxuwwina «Ki'nnuwwiinsi matina gereechchi yookkok oo gereechchi Usheexxaxxi Ayyaamonne xilli barenne ubuta'n bariinsi fissoobee'ek ayyette? 12Eehannata'i gereechchiinsi manchi hinkaa'nna lophphoohane? Ee bikkina Usheexxaxxi Ayyaamonne er luwwa issimma Seer hoorooyyo» yukko. 13Ee lasage Yesuus ee anga shiihu mancho «Ki anga biddiqaa'e!» yukko. Ixxim biddiqaa'u ammanenne ee la'm angisam fayya'i ihukko. 14Ihukkaarem Farisaawe'uwwi ee beyyiinsi fitta'a Yesuusa shitam googo a'llanto'o.

Waa'i Doo'llaakkoo Awwaadaanchi Bikkina

15Yesuusim eekka la'u ammanenne ee beyyiinsi ille hoo'llukko. Lobakat minaadabim ixxo awwonto'aare hundam fayyiisukko. 16Oo fayyiisu manni ixxi bikkina mulli keenina kuttambee'isa Yesuus ijaajukko. 17Oohim ihukkok hiraagaanchi Issaayyaas

18 # Isa 42:1-4 «An doo'llummi i awwaadaanchi kane;

an iittoommokii eese liiransookkokii ixxotte.

I Keesammi Ayyaanam ixxonne issoommo.

Ixxim minaadabina iikka hanqo'i oogato'o alallaatookko.

19Ayyennem fitamooyyo te'im laarooyyo;

googonnem ixxi sagara ayyim macceesooyyo.

20Hoongaan keeninam qishixxookko;

hara'mmaanchibee'i keenom abooyyookko.

Eekkam issookkok hanqo'i oogato'ina beyyi

siidameebe'i afeebe'e.

21Minaadab hundim ixxonne neeyyato issitamo» yaa wocu hiraag wo'mmoo'isinatte.

Yesuusii Bi'eelzeebulii

(Mar 3:20-30; Luq 11:14-23)

22Habus asheeru bikkina moo'eenaa woceenaa xanoobee'i mancho Yesuus beyyo eebakko'aare Yesuus fayyiisukko. Ee lasage oo manchim moo'eenaa woceenaa xanukko. 23Minaadab hundim maalalta'a «Ku manchi Daawiit Beet#12:23 «Daawiit Beeto» yito'ok «Waa'i doo'llaakkoo Kiristoosa» yimminatte. ihoo'n urooyyo» yito'o.

24 # Mat 9:34; 10:25 Farisaawe'uwwim eekka macceesso'i ammanenne «Ku manchi habusa fissookkok habus adil Bi'eelzeebul uwwu malaayyinnette» yito'o.

25Ihukkaarem Yesuus ixxuwwika sawwite la'aa «Mat adil gassoo uulli manni ixxuwwina'i ixxuwwim qasantaman ihulas oo adillan bi'ookko. Odim mat beero'i te'im mat mi'n abaroos ixxuwwina'i ixxuwwim annanni ikkolas qoxxita'a uulliteena xantamoyyo. 26Sheexaanim Sheexaana fissoohan ihukkaa'lleensi ixxina'i ixxim annanni ihookko. Eehaare ixxek adillan hinkid qoxxaa uulleena xanookko? 27Bi'eelzeebul uwwu malaayyinne an habusa fissoomman ihulas ki'nnuwwik awwonaan ayyi malaayyinne fissitamo? Ee bikkina ki'nnuwwi huushanchanne ixxuwwi oogattamo. 28Ihukkaarem an habusa fissoommok Waa'i Ayyaaninnette ihu bikkina Waa'ik adillan ki'nnuwwi beyyo waaraakko.

29Mat malaayyaam manchika mine aagaa gaassaa manchooma karoo'n ixxi mu'uta bogeena ayyim xanooyyo. Ihukkaarem manchooma karaa lasage mu'uta bogeena xanookko. 30#Mar 9:40 Iinninne mateeyyoom bee'ek iinninne uullixxamookko. Iinninne maqire wixxaa'oobee'ekim binnaa'ookko. 31#Luq 12:10 Ee bikkina an ki'nnuwwina kuroommo; mannik baaxiilii Waa'inne game'llamoo game'llanchii hundim haafamookko. Ihukkaarem Keesammi Ayyaaninne game'llamoohaannina haafamooyyo. 32Ayyi manchim Manchi Beetonne jora wocukkaare haafamookko. Ihukkaarem Keesammi Ayyaananne jora wocukkaannina ayyi manchinam ka doollennem ihukko te'im waaroo doollenne haafamooyyo» yukko.

Haqqa Mishinne La'akkamisa

(Luq 6:43-45)

33 # Mat 7:20; Luq 6:44 Odim Yesuus «Haqqichchi danaam ihulas ixxi mishim danaam ihookko. Haqqichchimdu jor ihulas ixxi mishim jor ihookko. Haqqichcho la'akkamok ixxi mishinnette. 34#Mat 3:7; 23:33; Luq 3:7; Mat 15:18; Luq 6:45 Ki'nnuwwi hamashshi ooso; ki'nnuwwi jor keen ikkakko'i bikkina er woshsha woccakkeena hinkid xantakkamo? Mashka'oomim manni suuminne fissaa wocookkok wodanonne wo'mmaa gatukkane. 35Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko. 36An ki'nnuwwina kuroommo; manni wocu awwaad bee'i woshshi hundinam oogaxxi ayyaamonne xa'mmamookko. 37At muccur ikkoottok te'im keesenne oogatamookkok at woccitti woshshinnette» yukko.

Aganna Moo'isoo'isina Yesuusa Xa'mmakko'isa

(Mar 8:11-12; Luq 11:29-32)

38 # Mat 16:1; Mar 8:11; Luq 11:16 Ee lasage Seera losisaanii Farisaawe'uwwii «Losisaancho! Kiinniinsi maalalsiisoo mare'e moo'nneena hansoommo» yito'o. 39#Mat 16:4; Mar 8:12 Ixxim dabaraa «Amma'nnatbee'i ka doolli jor manni maalalsiisoo mare'e moo'eena hasookko. Ihukkaarem hiraagaanchi Yoonaasanne ihu mare'iinsi bagaan mulli mare'i uwwamooyyo. 40#Yon 1:17 Geejji qurxummekkichchi godaphphi woronne Yoonaas sas ballaa sas hiimoo hee'ukkisam ee'isam Manchi Beetim sas ballaa sas hiimoo uulli woronne hee'ookko. 41#Yon 3:5 Naanaawe'i uulli manni Yoonaas kuru woshsha macceessa'a baaxiilo biiraa yita'a daba'llito'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Yoonaasiinsi lophphookkok keyye yookko. 42#1Adl 10:1 Woroo'n qarinne yoo uullina adil hee'llo'i Saaba'am Salamoonika qoorooma moo'lleena uulli tochchiinsi waatto'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Salamooniinsi lophphookkok keyye yookko» yukko.

Jor Ayyaan Firu Manchi Beyyo Daba'llaa Waaroo'isa

(Luq 11:24-26)

43Odim Yesuus «Jor ayyaan manniinsi firoo ammane usheexxoo beyyo hasukkuuyyi wobee'i udma'anne kululookko. Ihukkaarem usheexxoo beyyo siidooyyo. 44Ee bikkina oo habus ‹Firaa waarummi i mi'n beyyom daba'llaa maroommo› yookko. Daba'llaa maroo ammane oo min fii'amaa ma'lluwwimbee'i muccur ihaa gudaakkoo siidookko. 45Ee lasage maraa ixxeensi baassam habussuwwika lamara ixxenne maqire massookko. Ixxuwwim aagga'a eekke'e hee'llamo. Ee manchik duuha'i eraa'llaanniinsi lasaqqek jorookko. Ka doolli jor mannannem ee'isa ihookko» yukko.

Yesuus Amaa Ixxi Abbaayyuwwii

(Mar 3:31-35; Luq 8:19-21)

46Minaadabina Yesuus wocukkuuyyi hee'onam ixxi amaa ixxi abbaayyuwwii atoorassiteena hassa'a biiranne uullita'a hee'llo'o. 47Eekke'e hee'u minaadabiinsi mat manchi Yesuusina «Kiyyummaa kiyyabbaayyuwwii keese atoorassiteena hassa'a u'llummanne uullito'ookko» yukko.

48Yesuusim dabaraa ixxena «Iyyumma ayyette? Iyyabbaayyuwwim ayyayyaamo?» yukko. 49Ee lasage ixxi losaa'n kollonne anga biddiqaa'aa «Iyyummaa iyyabbaayyuwwii ka keeno. 50Mashka'oomim iimanenne yoo Iyyanni yukkoka wonshookkok ayyim iyyabbaayyo, iyyaayyattee iyyummattee» yukko.

Currently Selected:

Maatiwoos Mishiraachcha 12: KeesKita

Highlight

Compare

Copy