Maatiwoos Mishiraachcha 11

Xammaqaanchi Yohaannis Asse'u Kee'n Bikkina

(Luq 7:18-35)

1Tomminaa lam losaaninaa awwontam ijaajo Yesuus uwwaa guullaa lasage ee beyyo uraa ee gadanonne yoo beero'uwwanne alallaateenaa losiseenaa marukko.

2-3Xammaqaanchi Yohaannis ee ammane karaxxi minenne hee'ukko. Karaxxi minenne hee'ukkuuyyim Kiristoos bax bikkina macceesaa « ‹Waarookko› yakko'i Kiristoos atettennii te'im mulleka egello?» yaa ixxi losaa'nneka lamo Kiristoos beyyo asse'ukko.

4Yesuusim dabaraa «Moo'llakko'okaa macceessakko'i luwwaa mattakka'a Yohaannisina kullehe. 5#Isa 35:5 Oono'o! Qooqquwwi moo'llamuulla; dimmuwwim xabbita'a taakke'llamuulla; oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla; leto'i keen lehiinsi ki'llamuulla; buxina mishiraachchi sagar kuramoolla. 6Eesenne malamaa qolamoobee'ek maasse'amaakkoohane» yukko.

7Yohaannis losaan mattu'uuyyim Yohaannis bikkina Yesuus ka'isa yaa minaadabina kurimma asheerukko. «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe? 8Te'im mahina mattakko'o? Danaam eddechcha edde'u mancho moo'llakkeenannihe? Danaam eddechcha edde'oo keen adilluwwi minenne siidamookko. 9Eehannaha mahina mattakko'o? Hiraagaancho moo'llakkeenattennihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte. 10#Mil 3:1 Keesammi Kitaabanne

‹Oono'o! Kiina googo gudisoo i asse'amaancho

ki illagenne asse'oommo› yamamaa kitaabamukkok Yohaannis bikkinatte.

11Hanqinam an ki'nnuwwina kuroommo; qaramu mannanne hundannem Xammaqaanchi Yohaannisiinsi lophphookkok hore'em bee'e. Ihukkaarem hundiinsim hoffe'ookkok Waa'i adillanonne ixxeensi lophphookko. 12#Luq 16:16 Xammaqaanchi Yohaannis doolliinsi ki'isaa kaballi afeebe'e Waa'ik adillan lobakata gafe'amoolla; malaayyaam keenim angi issiteena yakitamuulla. 13Hanenne waaroo woshshi bikkina hiraagaanii Seerii hundim Xammaqaanchi Yohaannisanne afeebe'e kutto'ookko. 14#Mil 4:5; Mat 17:10 Ki'nnuwwi amma'nnitakkolas ‹Eeliyaas waarookko› yamamukkok Yohaannisinatte. 15Qoossaa macceesoo macci yookkok macceesona» yukko.

16Odim Yesuus «Ka doolli manna mahinne akeekisoommo? Meeranne afuutta'a ixxuwwi dara'mmanna weeshshu'uuyyi 17‹Dibbe'e aphphinsummo,#11:17Dibbe'e aphphinsummo yookkoka Giriikisinne «Ganbaabiyya fungummo» yookko. kaddakko'oyyo; sollummo, wi'llitakko'oyyo› yitam oosinne kobi'llitamo. 18Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Kuka'i habus amadaakkoohane› yakko'o. 19Manchi Beet itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yakko'o. Ihukkaarem Waa'ik qooroom hanqo'an ihukkis baxinne moo'amaakko» yukko.

Amma'nnantobee'i Bikkina Acceeqasanto'i Beero'uwwi

(Luq 10:13-15)

20Ee lasage Yesuus maalalsiisoo agannuwwa issu beero'uwwi jora issimma uttobee'i bikkina ka'isa yukkuuyyi acceeqasimma asheerukko. 21#Isa 23:1 «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchcham ixxuwwi gaganne laphphita'a gaassim baaxiilo biiraa yitam hee'llo'o. 22Ee bikkina an ki'nnuwwina kuroommo; Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko. 23#Isa 14:13 Qifirinnaahooma, at iimane affaattoollayyonnihe? Ihukkaarem at Si'oolanne dillitootto. Keesenne issamu maalalsiisoo agannuwwi Soddomanne issamaakkoohan ihuta'n oo beero'i kaballi afeebe'em bi'am hee'ukkoyyo. 24#Mat 10:15; Luq 10:12 Ee bikkina an ki'nnuwwina kuroommo; oogaxxi ayyaamo kiinniinsi Soddomina sholle'ookko» yukko.

Kiristoos Usheexxato Uwwoo'isa

(Luq 10:21-22)

25Ee ammane Yesuus «Iimaninaa uullinaa Moollanni Iyyanna! Kaka qoolluwwiinsii lachchaammuwwiinsii daphphaa'llaa lachbee'i keenina caakkissitti bikkina keese galaxxoommo. 26Eeyya, Iyyanna! Kuk ki doo'lla.

27 # Yoh 3:35; Yoh 1:18; 10:15 Hundi luwwam Iyyanni iina uwwaakko. Anniinsi bagaan Beeto la'ookkok matim bee'e. Ee'isam Beetiinsi bagaan Anna la'ookkok matim bee'e; Beet la'iseena doo'llukkaanniinsi bagaan ayyim Anna la'eena xanooyyo.

28Iyyi kee'mmu hoongaan keen hundim i kollonne waallehe; an usheexxisoommo. 29#Erm 6:16 Ki'nnuwwi iikka gaanjaqqa massitakka'a iyyehe; iinniinsim lossehe. Mashka'oomim an qishixxoommanee maashaallaa; ki'nnuwwi foorinam usheexxato siiddakkamo. 30Iikki axaqqim kee'mmoobee'ane. I iyyim sholle'aalla» yukko.

Currently Selected:

Maatiwoos Mishiraachcha 11: KeesKita

Highlight

Compare

Copy