Issaayyaas Kitaaba 11

Xummi Leeraakkoo Adillano

1 # Kal 5:5; 22:16 Issayyi lugumiinsi lat firookko; niggiinsem mat caaf misha mishookko.

2Waa'ik Ayyaan ixxonne ihookko;

qooroo'mmekii qoossimmikii Ayyaan,

sogimmikii malaayyikii Ayyaan,

lachchikii Waa'a baddimmikii Ayyaan ixxonne usheexxookko.

3Waa'a baddimmanne liiramookko;

xale'i moo'ukkisinne te'im macceesukkisinne oogatooyyo.

4 # 2Tas 2:8 Ihukkaarem buxina hanqinne oogatookko;

hara'mmatbee'i kee'nnekam hanqa egerookko.

Ixxi sagarinne minaadaba guzumo'amookko;

jor keenim bi'ookko.

5 # Efe 6:14 Muccuroom lamaxxi saqqa

amma'nnamaakkoohaannoomim midaaxxi sabbat ihookko.

6 # Isa 65:25 Oro'ii gereebbii mateeyyanne hee'ookko;

kabeerim fella'i wotallinne gii'mmookko.

Waataanni hobbi geexxuwwinne maqire hosookko;

hoffi oosim allaarookko.

7Lar tibbe'inne allaa'llookko;

wo'llii wotallii mateeyyanne gii'mmookko;

hobbi baalluwwisa bura'a itookko.

8Anuuna iicoo ciil qubaam hamashshi ba'l gadanonne lellookko;

anuuna uru ciilim woraqaallichchi barenne anga aagisookko.

9 # Inb 2:14 Waa'aannonne keesammi duunanne

hawwodoo te'im jor luwwi hore'em hee'ooyyo.

Dambalaq wo'inne wo'mmoo'isa

uulli Waa'a la'imminne wo'mmaakkoohan ihookko.

Qeefadanto'i Keen Daba'llitamisa

10 # Oro 15:12 Ee ammane Issayyi shumo'i mannina mare'i ihaa uullookko; minaadab ixxo hasookko; lat firookko; ixxi heechchi beyyim lombi yoohan ihookko. 11Ee ammane Waa'i odim ixxi minaadabiinsi gatu keeno Asooriinsi, Gibxiinsi, Phaaxiroosiinsi, Tophphe'iinsi, Eelaamiinsi, Baabilooniinsii Haamaatiinsii ee'isam dambalaq tochchiinsii wo'inne kibbamu uulliinsii dabaraa worookko. 12Ee ammane Waa'i uulli hundannem binnita'a hee'llam Isra'ee'llekaa Yihuxxi minaadabaa uulli tochchi hundiinsim wixxaa'aa worukkisa uulli minaadab hundinam la'isoo mare'e iimaa'aa kaasookko. 13Ee lasage Isra'ee'l minaadab Yihuxxi minaadabanne yoo to'achchancha urookko; Yihuxxi minaadabim Isra'ee'l minaadabinne yoo diina'oomaa joranchaa urookko. 14Lamem minaadabim mat ikka'a eelliinchi aaggi Filisxee'm uulli mannanne ki'llamo; eelliinchi firanne yo'i minaadaphphekam amaxxa boggamo. Edoo'mmekaa Moo'aaphphi minaadabaa kaa'llamo; Amoo'n minaadabim ixxuwwina ijaajantamo. 15#Kal 16:12Waa'i gokkisoo hafachchinne Gibxi dambalaqika tochchuwwa gokkisookko; Efiraaxiis daajjem aphphisaa lamar hoffi dajjuwwanne baxxansoo bikkina manni caamma'innem fireena xanookko. 16Waa'i gaassi anno'i Gibxiinsi fitto'i ammane issukkisam kabadem bichchiinsi gatto'i Isra'ee'l minaadabam Aasooriinsi fittam googo taaphansookko.

Currently Selected:

Issaayyaas Kitaaba 11: KeesKita

Highlight

Copy