Luka 11
11
Yɛsu langoecha njea yee kwiyaya
(Mat 6:9-13; 7:7-11)
1Lɔmɔ lusu, Yɛsu wabɛa amɔchi mu kwiyaya. Asia awɛ, ɔmɔ asambea baeyechwa bakɛ na komobocha itɛ: «Mwaame, tochebekya njea yee kwiyaya bwaeyecha Yɔana baeyechwa bakɛ.»
2Awɛ na kobasaolea itɛ: «Atwiyaya banu mɔɔchɛ:
‹Isito oe mwiyoo,
chiina lyao leame.
Boombe bwao bobake.
3Tɔɛcha byekolya biito lusu ku lusu.
4Ebeela bwabea bwito,
kɔmɔa na bae kabee totoebeela bwabea bwa olya ɔtɔtɔbɛngɛa.
Ndɛkɔtɔlɛkɛa mɔ kɔɛlɛkiwa.›»
5Yɛsu na kobasaolea itɛ: «Naani asambea banu oe nɛ kɛɛmba wamoolelea ne butu ne komosaolea: ‹Ɛɛ kɛɛmba ngɔpɛsa mikati esato. 6Kɔmɔa kɛɛmba kyaakɛ keomoolelea kotokea lwɛndɔ lwakɛ, na mee siisi ne keemo kyɛ kɔmɔɛcha.› 7Olya oe monda mwe ndabo otamosaolee: ‹Ndekongembecha kɔmɔa nausia kuchiba mukinda ne baana banɛ baɔkɛsa kɔmɔɔsa naanɛ ko kyandwa, sikaɔsɔnɛ kobyoka nɛ kɔkɔɛcha bitɔɛngɛa awɛ.› 8Natɔbaɔkɔɛla itɛ: ɔbɛɛ ndakabyoke kɔ kɔmɔɛcha ko boa boe awɛ kɛɛmba kyaakɛ, kɔ kɔmɔa osomoembecha, otabyoke nɛ kɔmɔɛcha kɛtɔɛngɛa awɛ.
9«Na mee natobasaolea banu, mɔɛngɛɛ, na banu motaɛwɛ, molenge na banu motakonje, mupike ɔli batamochiboele. 10Kɔmɔa ɔɔsɛ mondo ɔtɔɛngɛa ɔtɔɛchwa; na olya otoenga otokonja, na olya otokomoa ku mukinda utuchiboelwa. 11Isa naani asambea baanu, ingɛ mwaana waakɛ ɔsɔmɔɛngɛa mwɛa ne ɔsɔmɔɛcha njɔka? 12Ɔbɛɛ, ingɛ ɔsɔɛngɛa chae na kɔmɔɛcha kambasa? 13Ingɛ banu bae babea motocheba kɔɛcha baana binu biemo byaachi, ko booni Isinu wee mwiyoo ndakaɛchɛ basɛ batɔmɔɛngɛa Motema wa Ama?»
Yɛsu osobochiwa Bɛlɛsɛbulu
(Mat 12:22-30; Mali 3:22-27)
14Awɛ waba oe mu kulikita isombo lyaba kaluma. Atoka lea isombo mu ilebe alyo na kɔɔcha: ndongo na kokanakana. 15Bakinɛ asambea abɔ na kɔɔcha itɛ: «Otoocha masombo kɔ bɔkɛtɛ bwa Bɛlɛsɛbulu, mokoo we masombo.»
16Bakinɛ na kɔmɔɛlɛka mo koenga bisinga bye kotoka kwiyoo. 17Awɛ wacheba lokani lwabɔ, na kobasaolea itɛ: «Boombe bɔɔsɛ botosambokana bɔtɔɔnɛka; nɛ ɛɛsɛ ndabo etosambokana etakee. 18Kabee, ingɛ Isombo lisuchiana bita naalyo lyɛɛnɛ, booni botaemae boombe bwakɛ? Mɔtɔɔcha itɛ, nae mukulikita masombo ne kɔmɔa nakonjee bɔkɛtɛ bwa Bɛlɛsɛbulu. 19Ingɛ mee natulikita masombo kɔ bɔkɛtɛ bwa Bɛlɛsɛbulu, bando binu batulikita masombo kɔ bɔkɛtɛ bwa naani? Baa batoangoecha abɔ bɛɛnɛ itɛ muusi ne sambo. 20Ingɛ mee natulikita masombo kɔ bɔkɛtɛ bwa Kakua, kɔ bɔbɔ, boombe bwa Kakua bosoolea kwinu.
21«Ingɛ mondo we bɔkɛtɛ, nɛ byɛla byakɛ, oe mo kosanga kyambaa kyakɛ, byɛndɔ byakɛ bitaongwe byaachi. 22Alakini, ingɛ mondo ukinɛ oe nɛ bɔkɛtɛ kokoela olya osoolea kwakɛ na komokanga, awɛ otamobakoe byɛla byakɛ biisɛ bibɛɛ awɛ mo koekekea, na koabanya byɛndɔ biisɛ bibakoee awɛ.
23«Ɔɔsɛ mondo otaasi naanɛ kɔmɔɔsa ne moangani naanɛ, na olya otaasi ndatosombecha naanɛ oe ne mo kosanja.»
Bikete bye masombo matɔɔtɔkɛa mondo
(Mat 12:43-45)
24Yɛsu na kɔɔcha kabee itɛ: «Atotoka isombo mo mondo, lɛtɔɛndɛa a iboa letaasi ne maache, mo koenga iboa lye kubundea mbomo, ingɛ ndelyakonja, lɛtɔɔcha: ‹Naɔtɔkɛɛ mo ndabo ɛbɛɛ mee.› 25Ingɛ lɛsɔɔtɔka, na kɔmɔa iboa lɛɔkɔmbiwa ne koongwa lyaachi. 26Ko boa, letaye kwaende masombo mosambo mabea koleetea alyo lyɛɛnɛ, kwaingee na kuchikaa; nɛ bɔtabɛ olya mondo kɔbɔnga botaete bɔbɛɛ awɛ kombaa.»
Koenoka kwe kiinɛkinɛ
27Abɛchaya awɛ mɔ kɔɔcha, ɔmɔchi mwamokachi ne kokandoka mo ndongo na komosaolea itɛ: «Lyaenoka ikundu lekochaee ne mabɛɛ makɔnyɔmyɛɛ!» 28Yɛsu na kɔɔcha itɛ: «Waenoka ne mondo utuungwa Ikomo lya Kakua na koleketa!»
Kɔɛngɛa kisinga
(Mat 12:38-42)
29Abɛchaya ndongo etae kubua bando, awɛ na kobangoa kɔɔcha itɛ: «Lɔɔka lwabea, lɔtɔɛngɛa kisinga, nɛ kisinga baakakɛmɔɛ kokoea kea kya Yɔna. 30Kɔmɔa, bwakaɛ bwaba Yɔna#11:30 Yɔɔla Yɔn 3:3-5. kisinga ko bando be Ninawi, Mwaana we Mondo otaongwe kisinga kɔ lɔɔka lwa leno. 31Lusu lwe kɔbɛmba makomo, kenombe kye mwamokachi we Mili otaemane ne bando ba loo lɔɔka, ne kɔbaɛbɛcha kasia: kɔmɔa watoka kwibɔngɛa mɔsɛngɛ, na koba kwaiyungweecha lokani lwa Sɔlɔmɔnɔ, ano moe ne mondo otoeta Sɔlɔmɔnɔ. 32Lusu lwe kɔbɛmba makomo, bando be Ninawi bataemane ne bando ba loo lɔɔka ne kɔbaɛcha kasia, kɔmɔa abɔ batuuluka kotoka ko bwabea bwabɔ aungwa mokando wa Yɔna; mɔlɔlɛ ano moe ne mondo wakoela Yɔna.»
Kyɛɛngɛ kye mobee
(Mat 5:15; 6:22-23)
33Yɛsu na kɔɔcha kabee itɛ: «Kuusi mondo, kɔmɔngɔ kwe kɔkɔcha mumunɛ ne komobeka a iboa lya isama ɔbɛ kose kwe kembaka; otokobecha ne ko kakoekelwa, ko boa baa batwingea batamɔɛ lwɛɛngɛ. 34Liisɔ ne mumunɛ we mobee. Ingɛ liisɔ lyao lee bwaachi, mobee ɔɔsɛ otamunekiwe; ingɛ liisɔ lyao lee ne kolwaa, mobee ɔɔsɛ otaongwe ne ikunyɛ. 35Lɔla ingɛ kyɛɛngɛ kee monda mwao kiisi ikunyɛ. 36Ingɛ mobee wao ɔɔsɛ oe nɛ kyɛɛngɛ, kotasi ikinɛ mbanga ne ikunyɛ, mobee ɔɔsɛ otaongwe kyɛɛngɛ; boe mu kukununekea mumunɛ nɛ kyɛɛngɛ kyaakɛ kɛsɛ.»
Mabɛchi ma Yɛsu ko bakoo be Bafalisayɔ ne baeyechi be Salia
(Mat 23:1-36; Mali 12:38-40)
37Abɛa awɛ mɔ kɔɔcha bɔbɔ, ɔmɔchi Mufalisayɔ na kumwitana kwalye mambombe. Awɛ na kwingea, na kuchikaa a mɛsa. 38Mufalisayɔ na kɔmɔa itɛ Mwaame ndaɔya manja kombaa kwe kolya mambombe. 39Mwaame na komosaolea itɛ: «Baanu Bafalisayɔ, mɔtɔkwaɔyɛ bwaachi kɔmɔngɔ kwe bibacha binu, ne mbɛɛ chiinu, alakini monda mwiinu moe bochae lokani lwe luubo ne bwabea. 40Moe ne ilalo! Olya waketa kɔnjɛ ndaketa kabee monda? 41Mɔɛchanɛ kee niinu, ne biisɛ bitaongwe byasokoka koe banu.
42«Mayombe koe baanu, Bafalisayɔ! Motoocha kɛmɔɔsa kye ikumi kye bichɛɛ, ne bisɛsi bituumba, ne kye bisɛsi bye mitindɔ ɛɛsɛ, alakini mɔtɔnyɛnyɛka kiinɛkinɛ ne kokonda kwa Kakua. Bibi ne biengye baanu koketa kombaa, kotaasi kɔnyɛka bikinɛ. 43Mayombe koe banu, Bafalisayɔ, kɔmɔa motokonda kuchikaa ko byɛɛnɔ bye kombaa mo masinakɔki nɛ kɔɛwa mɔyɔ mo ndongo yee bando! 44Mayombe koe banu, bae boe manda chitaasi chitɔmɔnɛka, ne bando batɔɛndɛa mo nganda kotasi kocheba.»
45Ɔmɔ mweyechi we Salia koenda chuuki na kɔɔcha itɛ: «Mweyechi, mɔ kɔɔcha bɔbɔ, oe mo kotobabacha na bae kabee.» 46Awɛ na kɔɔcha itɛ: «Mayombe kwinu kabee, baeyechi be Salia, kɔmɔa motokonda kochekya bando misiɔ ya nyɛma na banu bɛɛnɛ mɔtɔmɛkɔbɔcha ne ɔmɔ we mosani yiinu.
47«Mayombe koe banu, kɔmɔa moe mo koaboka manda che ndɛnda cha Kakua, koko ne baisinu ne babachia! 48Moe mo koangoecha ne kwimenya bikete bye baisinu mokoo; abɔ bachia ndɛnda cha Kakua, na baanu mutuimɔɛna botoaboka manda chabɔ. 49Nɛ kɔ bɔbɔ Kakua, ko lokani lwakɛ, waɔcha: ‹Nabatomee ndɛnda cha Kakua nɛ ndomwa; batachie bamɔchi na kosongya bakinɛ.› 50Kɔ bɔbɔ, bando ba keno keeko batachɔnjɔɛ masi me ndɛnda chiisɛ cha Kakua chachiiwa kobangoa kwabangokea mɔsɛngɛ, 51kobangoa masi ma Abɛli#11:51 Yɔɔla Kob 4:3-4,8., ne masi ma Sakalia#11:51 Yɔɔla 2 Bik 24:20-22., wachiiwa asambea masabau ne ndabo ya Kakua. Inde, natobasaolea, banu bando ba keno keeko, motachɔnjɔɛ kokwa kwa bii bitomba biisɛ.
52«Mayombe koe banu, baeyechi be Salia, mwibakolee lufungula lwe kocheba. Ataasi itɛ banu bɛɛnɛ mutwingea, mutuchibea batokonda kwingea.»
53Aola Yɛsu mo ndabo, baeyechi be Salia, ne Bafalisayɔ na komoyembokea na kɔmɔɛbya ne bye komobocha ko biemo biisɛ. 54Abɔ na komolongea tɔlɛbɔ mɔ kɔɔcha, kɔmɔa bakonje ikomo lye kɔmwinyɛkɛchɛa.
Currently Selected:
Luka 11: ZMB
Highlight
Share
Compare
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
