Luka 10
10
Yɛsu ootoma baeyechwa bakɛ makumi mosambo ne babee
1Kɔmɔngɔ kwe bia, Mwaame na kɔsɔbɔa bakinɛ bando makumi mosambo na babee. Awɛ na kobatoma babee babee, kumwiyambea mo tolya tɔɔsɛ ne mo maboa makonda awɛ koya. 2Na kobasaolea itɛ: «Mebyao ee ne kubua, be kokaola ne bae bakɛɛkɛ. Mwiyaye kwa Mwaame we mebyao otome bakambi kwamekaole. 3Moyake! Nasobatoma bwe mekɔkɔ mwingya mwe mɛɛla yee chaani. 4Moendaya tombaambaa, naanga ne lokombo, naanga ne bilato, mwinokeaya mondo mo njea.
5«Ne mo ndabo ɛɛsɛ etaingee banu, mɔɔchɛ kombaa: ‹Nyaa iongwe ko ena ndabo!› 6Ingɛ moa moe mondo usuisangya kokonja nyaa, otachikane ne nyaa emobesee banu. Ingɛ ndɛ bɔbɔ, elya nyaa etabaɔtɔkɛɛ. 7Muchikane mo elya ndabo, mole biebwa ne kɛsolwa ketaechiwe baanu, kɔmɔa ngambi etowaena kɔɛchwa kemanda kyaakɛ. Mobeokaya ndabo kwe ndabo.
8«Mo kalya kasɛ kataingee banu, ingɛ bando baɔmɔsɛkɛɛla, molye nɛ kɔsɔa bitabaɛchɛ abɔ. 9Moolose balwachi batasange banu ne mosaole ko bando: ‹Boombe bwa Kakua boe amɔɔsa niinu.› 10Mo kalya kasɛ kataingee banu, ne batuchikana amo ndebabasɛkɛa, moyake mo njea chikoo nɛ kɔɔcha: 11‹Tosobakukuela naa ne lukunyɛ lwe kalya kinu loe bubunde ko meende yiito, lɔbɛ kechebeo kwinu. Naa na bɔbɔ mochebe bwaachi itɛ boombe bwa Kakua bosobaisɛnɛnɛa.#10:11 Kukukua kausi kotoka ko meende nɛ kɔɔcha itɛ, mondo otomiwee, ndakeesi kabee nɛ lɛni ko olya omotomee abɔ ingɛ ɔɔkɔna ilɔngɔ lemobee nabɔ.› 12Natomosaolea kiinɛkinɛ itɛ, lusu lwe manɛnɛ kaɔ kalya katakomoiwe byatɔba kokoea, kalya kɛ Sɔlɔma.#10:12 Sɔlɔma kabɛchaya kalya ke bwabea bwabua, awɛ Kakua ne kɔ kɔɔna kasɛ. Yɔɔla Kob 19:24-28.»
Mayombe me tolya tɔkɔnɛɛ Yɛsu
(Mat 11:20-24)
13Yɛsu na koseboa itɛ: «Mayombe kwao, kalya ke Kolasini, mayombe kwao, kalya ke Bɛtɛsaila, kɔ kɔmɔa melendo esoketeka mwingya banu, ayo ngoba boetekee monda mwe kalya kɛ Tilɔ ne kɛ Silɔna, kungyaeta masu, baa batuchikaa amo bangatuuluka metema yaabɔ ne bangaibɛcha mo metema yaabɔ mo kobwaa makunia ne kuchikaa mɔ mɔtwɛ. 14Ko boa, lusu lwe kɔbɛmba makomo bando binu batabɛmbiwɛ makomo mabɔ ne kochoa kokoela bando bɛ Tilɔ na Silɔna. 15Na awɛ, kalya kɛ Kapɛlɛnaumu, utuninga itɛ otakobechiwe ne kwiyoo? Kuusi otaikyewe ne ku mikinje.»
16Yɛsu na koseboa kɔɔcha itɛ: «Olya otamuungwe banu usunungwa, olya otamɔkɔnɛ banu ɔsɔngɔna mee, na olya ɔsɔngɔna mee, ɔsɔkɔna olya ondomee.»
Kɔɔtɔka kwe baeyechwa makumi mosambo
17Baa makumi mosambo baɔtɔka nɛ kɛmɛmɔ, mɔ kɔɔcha itɛ: «Mwaame, ne masombo matwiyaya koe bae amalikitee bae ku chiina lyao.»
18Yɛsu na kobasaolea itɛ: «Namɔichi Isombo mo kokea bwe mɔkɛɛli kotoka kwiyoo. 19Mwiungweeche bwaachi bibi: nasɔmɔɛcha banu bɔkɛtɛ bwe kwinya njɔka ne tombasa, nɛ bɔkɛtɛ bɔɔsɛ bwa olya moangani Isombo, kokabɛ keemo kye kobaketa bwabea. 20Mɔɔmɛmaya, kɔ kɔmɔa itɛ masombo masomotena; mwimɛmɛ kɔ kɔmɔa miina minu masukunyewa kwiyoo.»
Kɛmɛmɔ kya Yɛsu
(Mat 11:25-27; 13:16-17)
21Kyakaɛ kea keeko, Yɛsu na kochekwa kɛmɛmɔ ne Motema wa Ama na kokandoka itɛ: «Ee Isanɛ, Mwaame we ese ne iyoo, nasokoseka ku kuchiboea baana bakɛɛkɛ byaiseka awɛ ko bando be lokani ne njebi. Inde, ee Isanɛ, okondee biongwe bobo.
22«Naɛchiwɛ biemo biisɛ na Isanɛ; kuusi mondo oe bochebe Mwaana ne naani, Mwaana ikɛɛsa, ne mondo ɔɔsɛ, otakonde Mwaana komoboela.»
23Na kutuluka ko baeyechwa bakɛ, na kobasaolea ku bwise itɛ: «Maenoka miisɔ matɔlɔla baanu. 24Kɔ kɔmɔa, natobasaolea: ndɛnda cha Kakua chabua ne binombe bakonda kɔmɔa makomo mama matɔmɔa baanu, alakini ndebamamɔa, ne kuungwa makomo matuungwa baanu, alakini ndebamaungwa.»
Kisimo kye Musamalia mwaachi
25 Mweyechi ɔmɔ we Salia na kotaoka na komobocha Yɛsu mo komoongea kalɛbɔ na komosaolea itɛ: «Mweyechi, ndakete eke ko kokonja mwɛchɔ we meombo?» 26Yɛsu na komobocha itɛ: «Bike bitukunyiwa monda mwe Salia? Utuungwa bwaachi bitɔyɔɔla awɛ?» 27Olya mondo na komosaolea ko mama makomo itɛ: «Konda Mwaame Kakua kao, kwe ibae lyao lɛsɛ, ne ko motema wao ɔɔsɛ, ne kɔ bɔkɛtɛ bwa bwao bɔɔsɛ, ne ko lokani lwao lɔsɛ, ne sambe nao butuikonda awɛ mwɛɛnɛ.#10:27 Yɔɔla Koe 6:5; Law 19:18.» 28Na komosaolea itɛ: «Ɔsɔɔcha bwaachi; keta bɔbɔ otakonje mwɛchɔ.» 29Mweyechi we Salia, na kokonda kwiangwecha we sambo, na koseboa itɛ: «Inde, sambe nanɛ ne naani?»
30Yɛsu na komosaolea itɛ: «Kwabɛchaya ɔmɔ mondo mu kwika koya ko Yɛlusalɛma ne Yɛlikɔ; na kokea mo mesani yee ngiba, abɔ na komokongoa ngubɔ chaakɛ, na kumututa, na koya byabɔ, na kumusia mubibai. 31Kwaola ɔmɔ musia mu kwika mo yakaɛ elya njea, na kɔmɔmɔa, na kwibɛmbɛɛla, na koya byakɛ. 32Bwakaɛ Molawi#10:32 Yɔɔla Koba 3:5-13., na koolea a lea iboa, na kɔmɔmɔa, ne kwibɛmbɛɛla na koya byakɛ. 33Alakini ɔmɔ Musamalia waeta alya, na koolea abɛa olya moande. Amɔmɔa awɛ, awɛ na komokwea lokwa. 34Awɛ kumwisɛnɛnɛa, na otoboka tolwaa twakɛ ne makuta ne lifai, na kobwekea tolwaa. Kusia na komokobecha mo mbonda yaakɛ, na komochaa ko ndabo ye baɛni kwabokiwa awɛ bye bondobondo. 35Ngɛcha yaakɛ, na otoocha linali chibee, na kɔɛcha otoemanea ndabo ye baɛni na otomosaolea: ‹Kongoseka ona mondo, biisɛ bitamoketee awɛ kɔmɔngɔ, ndakɔɔtɔsɛɛ kɔɔtɔsɛɛ ataɔtɔkɛ mee.›»
36Yɛsu na koseboa itɛ: «Kombanga yao, naani ko baa basato uiyangwechee kosamba na ona mondo ututwee ne maɔkwa?» 37Mweyechi we Salia na komosaolea itɛ: «Na olya omokwee lokwa.» Yɛsu na kɔɔcha bwakaɛ itɛ: «Kɔ bɔbɔ, yaaka, keta bwakaɛ bwakaɛ.»
Yɛsu mo ndabo ya Malata na Malia
38Abɛchaya Yɛsu ne baeyechwa bakɛ mɔ kɔɛnda, abɔ na kwingea mo kamo kalya. Alya mwamokachi ɔmɔ we chiina lya Malata na kumwinokea mo ndabo yaakɛ. 39Wabɛchaya na kisikyakɛ we chiina lya Malia. Ona koba na kuchina ko meende ya Mwaame, na utuiyungwechaya byaɔchaya awɛ. 40Mo kea keeko, Malata na otokambaya meemo komatua. Awɛ na kwisɛɛna kwa Yɛsu na komosaolea itɛ: «Mwaame, biitokochabya motema kɔmɔa bosonjangameka kisikyanɛ mee ingaa ne meemo? Mosaolea obambɛbɔa.»
41Alakini Mwaame na kosaolea Malata itɛ: «Ee Malata, Malata, utuundana ne kwikuula ne biemo bya bua; 42koe ne keemo kɛmɔɔsa ketowaena mondo kwikuula nakyo. Malia ɔsɔsɔbɔa keemo kyaachi, ketaasi mondo ndakaɔsɔnɛ komobakoa.»
Currently Selected:
Luka 10: ZMB
Highlight
Share
Compare
Copy
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
