1 Yɔana 5
5
Bɔkɛtɛ bwe kuimenya
1Ɔɔsɛ utwimenya itɛ Yɛsu ne Kilisito, osoboteka na Kakua, nɛ ɔɔsɛ otokonda Tati otokonda mwaana waakɛ. 2Totocheba itɛ totokonda baana ba Kakua ko bobo: atokonda bae Kakua ne koketa bitɔɔcha salia yaakɛ. 3Kɔmɔa kokonda Kakua ne kobengya salia yaakɛ, ne salia yaakɛ iisi na kokoba. 4Kɔmɔa kɛsɛ kebotekee na Kakua kesokoela mɔsɛngɛ. Ne kokanga kotokoela mɔsɛngɛ ne kuimenya kwito. 5Ne naani otokoela mɔsɛngɛ, na olya utwimenya itɛ, Yɛsu ne Mwaana wa Kakua.
Byaɔcha ko mbanga ya Yɛsu
6Awɛ Yɛsu Kilisito wabaka ne maache ne masi; ataasi maache bokata, maache ne masi. Motema utusingeecha maa makomo kɔmɔa Motema ne kiinɛkinɛ. 7Kɔmɔa koe basato batusingeecha maa makomo: 8Motema, maache ne masi; ne basɛ basato batuungwana. 9Tusuungwa bisingeechee bando, bitusingeecha Kakua ne bikataa; kɔmɔa bibi ne bitusingeecha Kakua: usingeechee biisɛ kombanga ye Mwaana waakɛ. 10Ɔɔsɛ utwimenya Mwaana wa Kakua, utusingeecha monda mwaakɛ; olya otaasi ndatuimenya Kakua oomoketa koongwa wee manu, kɔmɔa ndatuimenya bitusingeecha Kakua kombanga ye Mwaana waakɛ. 11Na tɔlɔlɛ kusingeecha koa kwa Kakua koe bɔtɔɛchɛ mwɛchɔ we meombo, na olya mwɛchɔ oe ne monda mwa olya Mwaana waakɛ. 12Ɔɔsɛ oe ne Mwaana oe nɛ mwɛchɔ, ɔɔsɛ otaasi ne Mwaana wa Kakua, ndaasi nɛ mwɛchɔ.
Mwɛchɔ we meombo
13Nakunyee bibi koe baanu batuimenya chiina lye Mwaana wa Kakua, ko boa mochebe itɛ moe nɛ mwɛchɔ we meombo. 14Ena ne kiinɛkinɛ ee niito kombaa kwa Kakua itɛ: ingɛ tɔsɔɛngɛa keemo koengama ne kokonda kwakɛ, ututuungwa. 15Ingɛ twasocheba itɛ ututuungwa, tosocheba itɛ tookonja keemo kɛɛngɛɛ bae kwakɛ. 16Ingɛ mondo ɔsɔmɔa mobotwa naakɛ koketa bwabea botaasi bwe koolecha ko lokwo, uiyaye kwa Kakua na Kakua otamɔɛchɛ mwɛchɔ. Bibi bie ne iboa ko baa be bwabea bwabɔ buusi bwe koolecha ko lokwo. Alakini koe bwabea botoolecha ko lokwo, sitɔɔcha itɛ otaiyaye kɔɛyɔmbanga. 17Biisɛ bitaasi bwaachi ne bwabea; koe bwabea botaasi koyesa mondo ko lokwo.
18Totocheba itɛ, ɔɔsɛ otoboteka na Kakua ndatoketa bwabea; kɔmɔa Mwaana wa Kakua ɔtɔmɔkɛnga, ne Isombo wa Bea lɛtɔmɔkɔbɔcha.
19Totocheba itɛ toe ba Kakua, nɛ mɔsɛngɛ ɔɔsɛ oe ne mose mwe boombe bwa Isombo wa Bea.
20Totocheba bwakaɛ itɛ Mwaana wa Kakua obee, nɛ ɔtɔɛchɛɛ lokani lwe kocheba Kakua ke kiinɛkinɛ, na bae toe bomweyechee sambe naakɛ Kakua we kiinɛkinɛ koetea Mwaana waakɛ Yɛsu Kilisito. Awɛ ne Kakua we kiinɛkinɛ; awɛ nɛ mwɛchɔ we meombo.
Kolaana
21Ee baana banɛ, mwikɛngɛ banu bɛɛnɛ ne maboka.
Currently Selected:
1 Yɔana 5: ZMB
Highlight
Copy
Compare
Share
Want to have your highlights saved across all your devices? Sign up or sign in
©2022 Seed Company in coordination with Forum Communautaire des Traducteurs de la Bible et Alphabétisation
