1 Yɔana 4

Ndɛnda che manu nɛ ndɛnda che kiinɛkinɛ

1Ee ngondwa chaanɛ, mwimenyaya ɔɔsɛ ne motema, kombaa nɛ kɔmɛɛlɛka ko kocheba ingɛ ee metema etotoka kwa Kakua, kɔ kɔmɔa ndɛnda chabua che manu chisoolea mɔ mɔsɛngɛ. 2Mɔlɔlɛ botachebe banu Motema ototoka kwa Kakua: ne motema ɔtɔɔcha itɛ Yɛsu Kilisito wabaka mɔ lɔkɔba oe ne motema wa Kakua. 3Ne ɔɔsɛ motema otaasi utwindoa Yɛsu, uusi wa Kakua, oe ne motema we otoangecha Kilisito, uungwee banu itɛ otoba, na leno otae mɔ mɔsɛngɛ.

4Banu, baana bakɛɛkɛ, moe ne ba Kakua ne moobakoela. Kɔ kɔmɔa olya oe monda mwiinu oe mokoo koeta olya oe mɔ mɔsɛngɛ. 5Abɔ bae bɛ mɔsngɛ; ne batɔɔcha bwe bando bɛ mɔsɛngɛ nɛ mɔsɛngɛ otobaungwa. 6Bae toe ne ba Kakua, olya otocheba Kakua ututuungwa; olya otaasi wa Kakua ndatutuungwa. Ko bobo ne kotachebe bae koni koe Motema we kiinɛkinɛ na koni koe motema we manu.

Kokonda kwe kiinɛkinɛ ne kokonda kwe manu

7Ee ngondwa chaanɛ, tokondane bae bɛɛnɛ kwɛ bɛɛnɛ; kɔmɔa kokonda koe ne kwa Kakua, nɛ ɔɔsɛ otokonda, ooboteka na Kakua ne otocheba Kakua. 8Olya otaasi ndatokonda, ndaacheba Kakua, kɔmɔa Kakua ne kokonda. 9Kokonda kwa Kakua kwamɔɛka mwingya mwiito koetea boa bwatoma awɛ Mwaana waakɛ ɔmɔɔsa mɔ mɔsɛngɛ tokonje mwɛchɔ koe awɛ. 10Koo ne kokonda; ataasi itɛ bae ne bakonda Kakua, ko boa bwatokonda awɛ na kotoma Mwaana waakɛ koongwa keochwa ko bwabea bwito. 11Ee ngondwa chaanɛ, kende Kakua ototokonda bobo, totokoka ne kokondana bae bɛɛnɛ na bɛɛnɛ. 12Kuusi wasɔmɔa Kakua; kende twasokondana bae bɛɛnɛ kwɛ bɛɛnɛ, Kakua oe monda mwiito ne kokonda kwakɛ koe monda mwiito.

13Totocheba itɛ toe monda mwaakɛ na awɛ oe monda mwiito; kɔ kɔmɔa watɔɛcha Motema waakɛ. 14Na bae twamɔa ne kusingeecha itɛ Tati watoma Mwaana waakɛ koongwa Moolochi wɛ mɔsɛngɛ. 15Ɔɔsɛ utwimenya mo ndongo itɛ Yɛsu ne Mwaana wa Kakua. Kakua oe monda mwaakɛ na awɛ monda mwa Kakua. 16Na bae twasocheba kokonda kwa Kakua ko mbanga yiito twasaimenya.

Kakua ne kokonda, nɛ ɔɔsɛ otokonda oe monda mwa Kakua. 17Ko eena njea kokonda kɔsɛ kɔsɔmɔɛka asambea bae. Ko boa toongwe ne kiinɛkinɛ ku lusu lwɛ kɔbɛmba makomo, kɔ kɔmɔa mo ona mɔsɛngɛ toe boe Kilisito. 18Bɔɔba buusi monda mwe kokonda kwe kiinɛkinɛ, kokonda kwe kiinɛkinɛ kwaanga kuchia bɔɔba, kɔ kɔmɔa bɔɔba botoangoecha keangaa kye kokonja manɛnɛ na olya utuungwa bɔɔba ndaasi monda mwe kokonda.

19Bae totokonda kɔ kɔmɔa awɛ watokonda kombaa. 20Kende mondo ɔsɔɔcha itɛ: «Natokonda Kakua», koko nɛ ɔtɔkɔna mobotwa naakɛ, oe we manu; kɔmɔa olya ɔtɔkɔna mobotwa naakɛ ɔtɔmɔa awɛ, booni botakonde awɛ Kakua otaasi awɛ ndatɔmɔa? 21Na awɛ ɔtɔɛchɛɛ eena salia: ɔɔsɛ otokonda Kakua okonde mobotwa naakɛ.

Currently Selected:

1 Yɔana 4: ZMB

Highlight

Copy

Compare