รม 6

1เซ อึณ ปาย ตี, เอ ดี ปาย เหมา? เอ ดี แว โบง ฮาว หมาบ ปอ อึณ ปัว, แตห ปี เฆฌู เฌาพรา แว กืน? 2อาว มูห ปาย ตี. เอ แฮะ ปี ดูอี อี แฮะ ฮอต ยัม. หมาบ อาว ฮู ปึอน ดี อึบ เอ. เซ อึณ ปาย ตี, เหมา เอ ดี ปาย, เอ ดี วี โบง หมาบ ปี บรีม? อาว มูห ปาย ตี. 3เบ ตู นับ? ดอ แฮะ คัม เอ ดี จึบ แคง อึม โดบ เฌา เยซู, อึณ ปี เอ แฮะ คัม ดี ยัม รึม โดบ เฌา เยซู. 4โคว, ดอ แฮะ จึบ เอ แคง อึม ตี, อึณ ปี เอ แฮะ ยัม รึม บอ กอย รึม แคง กาเดา บาเรว โดบ เฌา เยซู. อาพูง ดังโคว เฌาพรา อี มูห ฆูณ เฌา เยซู, อึณ แฮะ วี แตห เฌา เยซู วี ยีต วี อีม. ปาย ตี บอ เอ แฮะ วี ยีต วี อีม, แตห เอ วี มึห อาซาก กามาย ปี เฌา เยซู.

5โคว, เซ เอ แฮะ ยัม ปี เฌา เยซู, เอ มืร แฮะ วี ยีต วี อีม รึม โดบ อัน. 6เอ มืร แฮะ นับ, อึณ ปี โดว บรีม เอ นี แฮะ ดึก ดี ร็อง กาแวะ ปี เฌา เยซู, แตห โดว บรีม เอ อี มึห หมาบ ตี ลึร ชึม โตต, แกวะ ฮู แตห หมาบ ปึอน ดี อึบ เอ ปี ดา กาณา อี อึบ หมาย อัน. 7โคว, เซ ดูอี แฮะ ฮอต ยัม, หมาบ อาว ฮู ปึอน ดี อึบ อัน.

8เซ เอ แฮะ ฮอต ยัม โดบ เฌา เยซู, เอ มืร หณึม, เอ ดี วี ยีต วี อีม, วี มึห อาซาก กามาย ปี อัน เฌา. 9โคว, เอ แฮะ นับ, โกบ แฮะ ฮอต วี ยีต วี อีม เฌา เยซู, แฮะ วี มึห อาซาก กามาย, อัน อาว ฮู โลว ยัม ดอ เหมา. เฌา มารานัะ มืร, อาว ฮู มึห ปวน ดี อึบ อัน. 10ดอ คัม เฌา เยซู ดี ยัม, หมาบ อาว ฮู ปึอน ดี อึบ อัน ดอ เหมา. อัน มืร อาว ฮู โลว ยัม แบน เฌณ แบน เฌณ. อาซาก ปี วี มึห อัน ดอ ตี นี, อึณ มูห อาซาก กามาย, อาซาก อี กอย รึม โดบ เฌาพรา เซเซ.

11เบ มืร โลว มาด โดว เบ ปาย ตี. โดว บรีม เบ แฮะ คัม ดี ยัม, แกวะ ฮู แตห หมาบ ปึอน ดี อึบ เบ. แฮะ ฮอต โกบ หณึม เบ เฌา เยซู, เบ วี มึห อาซาก กามาย อี นับ ดี โบง ปี อึง เฌาพรา. 12โคว, แกวะ แตห หมาบ ปึอน ดี วี อึบ โดว โบ็ง เบ. แกวะ วี โดบ น็อห กาวาต อี ซี กาซูห เบ โบง นา ฮาย นา มืก. 13แกวะ แตห เปลา เบ เฆ แด เบ บอ ดอน โมยว อี กอย ดี โดว โบ็ง เบ ปึอน ดี โบง นา ฮาย นา มืก. แกวะ แตห โดว เบ แบน ปี ซูต ปี จัร หมาบ. แตห เบ ยี อาบ โดว โบ็ง เบ ดี เฌาพรา, แตห อึณ แบน ปี ซูต ปี จัร นา ซืร นา หมาน. โคว, เบ แฮะ ปี ดูอี อี แฮะ ฮอต ยัม, แฮะ วี ปึอน อาซาก กามาย. 14หมาบ อาว ฮู ปึอน ดี อึบ เบ. โคว, เบ อาว ฮู โลว โดบ ดารา. เบ แฮะ ปึอน ปี เฆฌู เฌาพรา.

15เซ อึณ ปาย ตี, มาเซ ปี ดี โลว โบง เอ? อึณ หมาน, เซ เอ ต็อห, “แตห เอ โบง หมาบ โกบ แฮะ ปึอน เอ ดี บึง ปี เฆฌู เฌาพรา, อาว ฮู โลว โดบ ดารา?” อาว มูห ปาย ตี. 16โอว ซี แตห เบ นับ ซีคยา, เซ เอ อาบ โดว เอ ดี อาเซ บอ ต็อห ดี โทม โฆรห อัน, เอ มืร ดี แบน หมาย วี ตี. เซ เอ แตห หมาบ อึบ เอ, อึณ ดี แตห เอ ยัม. เซ เอ ยี โทม โฆรห เฌาพรา ปี หมาย อี โทม โฆรห ดา กาณา อัน, เฌาพรา ดี ดัว น็อห ซืร น็อห หมาน ดี เอ. 17โอว ยี ดาง ฆูง เฆฌู ดี เฌาพรา. เบ ปี บอ แฮะ ดึอม แตห หมาบ อึบ เบ มืร, เบ แฮะ วี ออน ดี โทม, ออน ดี โดบ โฆรห เฌาพรา แปะ แฮะ มาโนว อี ดี เบ, แตห อึณ ลึบ แคง น็อห เบ. 18เบ แฮะ ฮอต ลอด ตัะ หมาบ, แฮะ วี แบน หมาย นา ซืร นา หมาน.

19โอว บอ โลว กาลาง ลอง อัน ตี, แตห อึณ โดบ ปี ปาย ดูอี ดี เฌณฌา, แตห อึณ หงึย โทม ดี เบ. โคว, ลอง เฌาพรา อาว หงึย กาหลูห ดี ดูอี. เบ แฮะ ดึอม แตห โดว โบ็ง เบ บอ โดว แบน ปี หมาย อี โบง ปี จัร ดา กาณา อัน อี หมึอม กาอีห, หมึอม กาดาต. เบ แฮะ โบง อี ฮาย อี มืก แตห อึณ แกร ดี กืน กาเซา. ดอ ตี นี, แตห เบ วี อาบ โดว โบ็ง เบ ตี, แตห เบ วี แบน หมาย นา ซืร นา หมาน, วี แบน ดูอี อี ซีงา บอด. 20ดอ โบง เบ ปี จัร หมาบ, นา ซืร นา หมาน ตู ปึอน ดี ซูต ดี จัร เบ. 21แปะ แฮะ ดึอม โบง เบ ตี, แฮะ แตห เบ ซาย อี ดอ ตี นี. อาฆยึร ปี โบง เบ ตี, อึณ มืร ตู จอย มาเซ. อึณ แตห เบ ยัม. 22มาแล, ดอ ตี นี เบ แฮะ ฮอต ลอด ตัะ หมาบ. เบ แฮะ วี แบน หมาย เฌาพรา. อาฆยึร อัน ตี ยี แตห เบ แบน ดูอี อี ซีงา บอด. แฮะ ฮอต, เบ มืร ดี ปึอน ดี กอย รึม โดบ เฌาพรา เซเซ. 23โคว, เซ เอ โบง หมาบ, รูห อัน อึณ แตห เอ ยัม. มาแล, ปี เฆฌู เฌาพรา บอ ปี ดัว เฌาพรา ดี เอ, เอ ปี ซัะ โลว โตต มาเซ มืร, อึณ แตห เอ กอย รึม โดบ เฌา เยซู เซเซ.

Currently Selected:

รม 6: pce

Highlight

Compare

Copy