ปบ 6

ลอง ฌึม บู โบ็ง

1ปัน ตี โอว ยอด ฆอน มาบู ดอ ปยาต อัน ฌึม ดอ โฆว แคง บู โบ็ง ตึอน. ดอ อัน ตี แคง โดว ซัดดาวา พวน โดว ตึอน, อู โดว กาลาง โฆรห ปี ฮัม กานัม ต็อห, “ตัห.” 2โอว วี ยึร บอ มังปร็อง ลูย อู โดว. ดา อี ป็อะ มังปร็อง ตี, อัน แฮะ โฆ็ง บอ อัะ. อัน แฮะ ปึอน บอ มังฆึม อู โบ็ง. ปี ปาย อัน ดี ป็อะ มังปร็อง ตี แฮะ ปี ดูอี อี ดี ฮาว กาโฆห, อี ดี ออง รันซู อัน.

3ปัน ตี ฆอน มาบู บอ ปยาต ฌึม ฮาอา. ดอ อัน ตี แคง โดว ซัดดาวา พวน โดว ตึอน, โอว วี ยึร โฆรห โดว ฮาอา. อัน ต็อห, “ตัห.” 4โอว ปี วี ยึร มังปร็อง เรณ อู โดว ตัห. วี อี ป็อะ มังปร็อง ตี, เฌาพรา แฮะ แตห อัน มึห ปวน, แตห อัน โบง แตห ดูอี แดง กาดาย ลาย กาโฆห ลาย กาง็อห. อัน แฮะ โฆ็ง บอ มาปัวะ ลาง อู บลัะ อี ตาง กาเซา.

5แฮะ ฮอต, ฆอน มาบู ปยาต ฌึม ฮาโอย. ดอ อัน ตี โอว วี ยึร โฆรห โดว ซัดดาวา ตึอน, อี มูห โดว ฮาโอย. อัน ต็อห, “ตัห.” โอว บอ ยอด, โอว วี ยึร มังปร็อง ว็อง อู โดว. วี อี ป็อะ มังปร็อง ตี, อัน แฮะ โฆ็ง ลัะจู อู บลัะ แคง แด อัน. 6โอว วี ยึร โฆรห กาแต เฆ โดว ซัดดาวา พวน โดว ตึอน ต็อห, “ดีฆาว เคาคยูง อู ควาก, โลว ฮาว กาเวน อู วี. บอ ซีโฆ็งรา โอย ควาก, โลว ฮาว กาเวน อู วี. อี มูห อึม มางูน บอ นามัน, เบ แกวะ แตห อึณ ลึร.”

7ปัน ตี ฆอน มาบู วี ปยาต ฌึม อึณพวน. ดอ อัน ตี โอว วี ยึร โฆรห โดว ซัดดาวา โดว อึณพวน, อัน ต็อห, “ตัห.” 8โอว ปี วี ยึร, มังปร็อง เงียน ซีดีณ อู โดว. วี อี ป็อะ มังปร็อง ตี, อัน จืร เฌา มารานัะ. มืง มารานัะ อาว กาโต็ง ดี อัน. อัน มึห ปวน ดี แตห อี ยัม ดี ดา ซึก, ยัม ดี เอต ปี ดี โฮม, ดี เซา รอฆา บอ ดี มา โดว แปร. อัน ปึอน ง็อห ดูอี แดง กาดาย อาดา พวน บูน อู บูน.

9ฆอน มาบู วี ปยาต ฌึม อึณพัน. ดอ อัน ตี โอว วี ยึร กาเปรา เฆ ดูอี อี แฮะ คัม ดี ยัม โกบ กาลาง เฆ โฆรห เฌาพรา บอ โกบ กาลาง เฆ แปะ แฮะ ยึร แฮะ นับ เฆ ลอง เฌา เยซู. เฆ กอย ครึม กาโช็ง หลู. 10เฆ บอ ดัด ตาง ต็อห, “อึย แม เฌา อี อึบ โตต ดอน โมยว อี ซีงา บอด, อี โบง นา มูห นา หมาน อาคาคัร, อึณ ดี เหลณ ปอ แคะ เหมา, แตห อึณ ฌัม ปัน ดี ซูงพยาด แม เฌา อามู เฆ ดูอี แดง กาดาย? ปัน เหมา แม ดี ดัม หมาบ ดี เฆ อี แฮะ ง็อห ยัม เย?” 11เฆ แฮะ ฮอต ต็อห ปาย ตี, เฆ ดอน อี แฮะ ปึอน ดี ชึบ ครึง ลูย. อัน เฌา วี กาลาง ดี เฆ, แตห เฆ บัร ปอ อี แจก. แตห เฆ หน็อะ, แตห อึณ กอ โนะ แคะ กอย บีนอง เฆ บอ ฆึก อี โบง ฆาน รึม โดบ เฆ, อี ซี โลว คัม ดี ยัม ปี เฆ.

12โอว บอ ยอด ฆอน มาบู ดอ ปยาต อัน ฌึม อึณเดา. โอว วี ยึร มาอีม แฮะ เยณ กาเซา. บอ ซีแง อาว ฮู บลาง, แฮะ อับ ว็อง โตต. มาเฆียน มืร แฮะ เรณ ปี หนาม. 13เฆ ซีมัณ มืร แฮะ โจห แดง กาดาย, ปี เบล ดีปู อี ซีฆลูห โจห อาต ซีน ดอ มึห คูน ตาง ตัห บูด ดียูห เฮ อัน. 14เบลณ มืร แฮะ หราย ปี แปะ ปี ซีลอย อูน อี. นอน ดอน นอน บอ ฆูน อึม ดอน โปละ แฮะ กาโทะ โดง กอย เฆ.

15ดอ อัน ตี แคะ กอย เฆ คูนดีคัม แดง กาดาย บอ เฆ ดา กาณา, บอ เฆ ดา ตาง อี อึบ ดา ซึก, บอ ดูอี ครัม บอ ดูอี อี มึห ปวน, มึห อาพูง ดังโคว, บอ ดูอี เฮา บอกาเฆลียด, เฆ อี มูห หมาย บอ เฆ ดูอี อี กอย ทังฮาง, เฆ ดอน อี แฮะ เตา ฮาว เครียง เฆ ดี นอน อี มึห กาเดา มาว เฆ กาเดา มาว. 16เฆ บอ ดัด ต็อห, “แตห เบ นอน เกห ทีบ เย, แตห เบ กาดัห เย ดี อัน เฌา อี ตูต แดง มาลาง แคง ฆางหราว, บอ กาดัห เย ดี ฆอน มาบู อี ดี ดัม หมาบ ดี เย. 17โคว, ซีแง ดี ซูงพยาด เฌาพรา อามู อี แฮะ ฌัม. อาว มึห อาเซ อี ลอด เฌาพรา ดัม หมาบ ดี อัน.”

Currently Selected:

ปบ 6: pce

Highlight

Copy

Compare