ปบ 7

ลอง เฌาพรา ดอก ฌึม อัน ดี เฆ ดูอี อีซาเรลัะ อู แซน ดี พวน หมึณ ดี พวน แหรณ วี

1วาย อัน ตี โอว วี ยึร อามู อามาด เฌาพรา พวน กาดัง. เฆ จ็อง ดี พวน กาโตะ กาดาย. เฆ บอ แคร คูน อี ตัห พวน บลาก, แกวะ แตห คูน บูด แคง อึม นัมมูกซารา บอ แดง กาดาย บอ เฮ บอกาเฆลียด. 2โอว วี ยึร อามู อามาด เฌาพรา ปอ อู กาดัง ตัห นา เลห ซีแง. อัน โฆ็ง ฌึม เฌาพรา อี มูห เฌาพรา อีม. อัน วี ดัด ตาง กาเซา ดี เฆ อามู อามาด เฌาพรา พวน กาดัง ตึอน อี แฮะ ปึอน ดี โบง แตห อึณ ดูก แดง กาดาย บอ แคง อึม นัมมูกซารา. 3อัน ต็อห, “อาต ดอก เอ ฌึม ดี กาต็อห เฆ แดเจณ เฌาพรา, แกวะ แตห อึณ แบน ดูก แดง กาดาย บอ แคง อึม นัมมูกซารา บอ ดี เฮ บอกาเฆลียด.” 4อัน แฮะ ฮอต กาลาง โฆรห ตี, โอว วี ยึร ลอง เฆ อี แฮะ มึห ฌึม เฌาพรา ดี กาต็อห เฆ, อึณ มูห อู แซน ดี พวน หมึณ ดี พวน แหรณ วี. ดูอี เฆ ตี, เฆ มูห อาโมยว ดูอี อีซาเรลัะ, อี ตัห แคง ครึร ฆึร ดี อา ครึร ตึอน.

5-8อึณ บอ มูห ครึร อายูดา, อารูเบน, อาฆัด, อาเซน, อานาบทาลี, อามานาเซ, อาซีเมน, อาเลวี, อาอีซาคา, อาเฌบูโลน, อาโยว บอ อาเบนยาม. แคง ครึร เฆ ตี, อู ครึร ปี วี มึห อู หมึณ ดี อา แหรณ วี, อี มึห ฌึม ตี.

9วาย อัน ตี โอว วี ยึร พึง ดูอี กืน กาเซา กอ ฮู แป นับ ดี ตีห. ดูอี เฆ ตี, อึณ มูห ดูอี ดอน ฌึร ดอน ครึร, ดอน มาน ดอน มืง, เฆ บอ กาลาง โฆรห ดอน โมยว. เฆ แฮะ ชึบ โตต ครึง ลูย, โฆ็ง บอ หลา เฮ จึก. เฆ แฮะ ตัห กอย นา อาต มาลาง อัน เฌา บอ นา อาต ฆอน มาบู ตึอน. 10เฆ บอ ดัด ตาง ต็อห, “อี คยอด เอ แฮะ มูห เฌาพรา อี ตูต แดง มาลาง บอ ฆอน มาบู ตี.”

11แคะ กอย เฆ อามู อามาด เฌาพรา บอกาเฆลียด บอ จ็อง โรบ อัน เฌา บอ โรบ ดา ตาง เฆ โดว ซัดดาวา พวน โดว ตึอน, เฆ บอ กาโพรม ดี มูด ฆึบ ดี มาลาง, กรึบ เฌาพรา. 12เฆ บอ ต็อห, “ซาตู, เย อืบ มยูก แม เฌาพรา. แม มึห อาพูง ดังโคว. แม มึห อางยาน. เย บอ ดาง ฆูง เฆฌู ดี แม เฌา. แม บอ มึห ซาเร บอด บอ ปวน เฆ แฮณ. แตห อึณ บอ แบน ปาย ตี ดอน โจว ดอน บาน, ซาตู.”

13ดอ อัน ตี อึณ มึห ดา ตาง อู วี, อัน ดีหมอด โอว ต็อห, “เฆ อี ชึบ ครึง ลูย นี, เฆ มูห อาเซ? เฆ ตัห นา เหมา?”

14โอว วี ต็อห, “อึย แม เฌา, โอว ตู นับ. แม อี แฮะ นับ.” อัน วี ต็อห ดี โอว, “ดูอี เฆ ตี, เฆ มูห ดูอี อี แฮะ ลอด เลห แคง ดูก ตาง กาเซา. ครึง เฆ แฮะ ลูย ซีงา. อึณ ปี เฆ แฮะ ลัห ครึง เฆ แคง หนาม ฆอน มาบู ตึอน.

15โคว, เฌาพรา แฮะ ดึอม กาลาง ลอง เฆ, เฆ ดี ปึอน ดี กอย นา อาต มาลาง เฌาพรา. เฆ ปึอน ดี กรึบ เฌาพรา, โบง ฆาน เฌาพรา แคง โฮว อัน ดอง คืน ดอง วัน. อัน เฌา อี ตูต แดง มาลาง, อัน แฮะ กอย กาเครียะ ดี เฆ, แตห อัน แร ฆ็อง เฆ.

16วาย นี, เฆ มืร ฮู เอต ปี ดี โฮม, ฮู เอต อึม ดอ เหมา. เฆ มืร อาว ฮู โลว คัม ซอดาด เฆ กาฮัวะ ซีแง ดอ เหมา.

17โคว, ฆอน มาบู อี กอย โคบ มาลาง ตี, อัน ดี เฮียง ลึมลา เฆ. อัน เฌา ดี แยต เฆ ฮาว โดง มึห อึม โตห อี ดัว อาซาก. เฌาพรา มืร ดี คูด แวน อึม งาย อี ดึก ดี งาย เฆ.”

Currently Selected:

ปบ 7: pce

Highlight

Copy

Compare