หม 95
95
โหมว อี อืบ เฌาพรา
1ตัห ตัห, แตห เอ ต็อห โหมว, อืบ เฌาพรา. แตห เอ ต็อห โหมว ดาคึย ดี เฌาพรา อี คยอด เอ.
2แตห เอ ฮาว โดง กอย เฌาพรา, แตห เอ ดาง ฆูง เฆฌู ดี เฌาพรา. แตห เอ ต็อห โหมว ดาคึย บอ อืบ เฌาพรา.
3โคว, เฌาพรา มูห เฌาพรา อี บอด มยาด. อัน บอ มูห คูนดีคัม อี ตาง หลึอม เฆ เฌา ปี กรึบ อี เฮา บอกาเฆลียด.
4อัน เฌา บอ มูห อี อึบ บอ กาเดา ฮูเลา อี ลึก กาเซา, บอ กาแดะ นอน อี จา กาเซา.
5อึม นัมมูกซารา, อึณ บอ มูห โกรว เฌาพรา. โคว, อัน แฮะ โบง แตห อึณ มึห. อัน มืร แฮะ พาน เบลห บอ กาดาย.
6แตห เอ ตัห มูด ฆึบ กรึบ อัน เฌา. แตห เอ ตัห ครึบเครา ดี อาต เฌาพรา อี พาน เบลห บอ เอ ดูอี.
7อัน เฌา มูห เฌาพรา ปี กรึบ เอ. เอ บอ ปี มาบู ปี เฮียง ลึมลา อัน เฌา. อาตึร นี, แตห เบ โทม โฆรห อัน เฌา,
8แกวะ แตห น็อห เบ ดืร ปี ดา ดา เบ ดอ กอย เฆ ดี นอน เมรีบา ตึอน. แกวะ แตห เบ ปี ดา ดา เบ ดอ กอย เฆ แคง แปร กาฮ็อห อี จืร มาซา ตึอน.
9ดอ อัน ตี เฆ แฮะ เทว น็อห โอว. เฆ ปี บอ แฮะ ยึร ปี โบง โอว มืร, เฆ แนะ โบง แตห โอว จาว.
10เฆ แฮะ โบง แตห โอว กาอีห โจว เฆ อาดา พวน ฆึร ซีนัม. โอว มืร ต็อห, “เฆ มึห น็อห ซี วัห โอว. เฆ แฮะ แวน โตต โฆรห ปี กาลาง โอว ดี เฆ.”
11โกบ ปาย ตี, โอว รู จาว บอ ดืง ต็อห, “โจว เฆ ตี ตู ปึอน ดี ลึบ ฌัม แคง มืง ปี ดี อาบ โอว ดี เฆ, แกวะ แตห เฆ ปึอน ดี กอย หนีม ดอ เหมา.”
© 2021, Wycliffe Bible Translator, Inc. All rights reserved.