หม 92
92
โหมว อี อืบ เฌาพรา ดอ ซีแง ดีเหลา
1เซ เอ อืบ เฌาพรา, ต็อห โหมว อี ดาง ฆูง เฆฌู ดี อัน เฌา อี อึบ โตต ดอน โมยว, อึณ แฮะ หมึอม.
2ซีณวัห, แตห เอ กาลาง ลอง น็อห ร็อก อัน เฌา. แคง หมึร, แตห เอ โหลห น็อห อัน อี หมาน อี หมึอม เซเซ.
3แตห เอ บัห ดีง อี มูห วัน ฆึร ณ็อง บอ ดีง ดีเรา. แตห เอ ต็อห โหมว โดบ ฮัม ดีง ตี.
4โคว, แม เฌาพรา โบง แตห น็อห โอว ดาคึย กาเซา โกบ แปะ แฮะ โบง แม เฌา แบน โมยว แบน โมยว. โอว ดี ต็อห โหมว โกบ แปะ แฮะ พาน เบลห แม เฌาพรา.
5อากยาม อางยาน แม เฌาพรา แฮะ คึกคัม กาเซา. แปะ แฮะ โบง แม เฌา แฮะ หมึอม อาม โตต ดอน โมยว.
6-7ปี โบง เฆ ดูอี มืก, ปี บอ แฮะ ออง แตห อึณ กอ ปี เปต อี ลัต, เฆ ปี บอ แฮะ เจว ครัม มืร, อาว เหลณ เฆ ดี ชึม หราย โตต. ลอง อัน ตี, เฆ ดูอี รึร ยี ตู ยึร. เฆ ดูอี ตู มึห อางยาน ยี ตู นับ.
8อึณ ยี มูห แม เฌาพรา อี อึบ โตต ดอน โมยว ดอน โจว ดอน บาน.
9เย แฮะ นับ ซีคยา, รันซู แม เฌาพรา ดี ลึร ชึม โตต. เฆ ดูอี ฮาย ดูอี มืก ดอน อี, เฆ ดี โลว เตา กาย็อห ฮาว ดอน บลาก.
10แม เฌาพรา แฮะ จอย โอว แตห โอว มึห น็อห โปลม, แตห อึณ ปี มัก แปร. แม เฌาพรา แฮะ พ็อห นามัน บอด ดี ฆีณ โอว, แตห โอว ดาคึย คัะ ฆยามซา.
11โอว ดี บอ ยึร ดอ ชึม เฆ รันซู โอว. โอว ดี บอ ยึร โฆรห ปี ต็อห ปี ปึณ เฆ อี ตู หมึอม.
12เฆ ดูอี น็อห บอด น็อห ซืร, เฆ ดี ดาคึย ฆยามซา ปี เฮ จึก อี เหรห อี บอด. เฆ ดี เหรห ดี ตาง ปี เฮ อารีด อี กอย ดี นอน เลบานูน.
13เฆ ดี กอย ซีคยา ปี เฮ ปี ซัม อี แคง แวง โฮว เฌาพรา. เฆ ดี กอย รึม โดบ เฌาพรา.
14อาซาก เฆ ปี บอ กืน, อึณ ดี ปี เฮ อี มึห เบล กืน. เฆ บอ ปี เฮ บอด อี ซี เงียน ซี หนึม.
15เฆ ดี กาลาง แตห ดอน อี นับ ลอง น็อห ซืร น็อห หมาน อัน เฌา. เฆ ดี ต็อห, “เฌาพรา อาว มึห นา ตู หมึอม. อัน เฌา บอ ปี ดาอาง มาว โดง ปึอน โอว กอย ซีคยา.”
© 2021, Wycliffe Bible Translator, Inc. All rights reserved.