หม 35
35
ปี ซาคึร แตห เฌาพรา จอย
อาดาวีด แฮะ แดม โหมว นี.
1อึย แม เฌาพรา, โอว หมาณ, แตห แม เฌา โบง กาบัห ดี เฆ อี โบง กาบัห ดี โอว. แตห แม เฌา วี กาโฆห ดี เฆ อี กาโฆห ดี โอว.
2โอว หมาณ, แตห แม เฌา ตา ครึง กาโฆห, ฮาว กาโฆห ดาง โอว.
3แตห แม เฌา ดึห บลา เลียห แม, หงา ดี เฆ, แร เฆ อี คูงครัห โอว. แตห แม เฌา วี กาลาง ดี น็อห โอว ต็อห, “โอว เฌาพรา อี คยอด แม,” แตห โอว นับ ซีคยา ลอง อัน ตี.
4เฆ อี เหรต ดี ง็อห โอว, แตห เฆ วี ชึม ซาเร, แตห เฆ กอ วี ซาย อี. เฆ อี โบง นา ตู หมึอม ดี โอว, แตห เฆ วี กาดูห วีว ดูก, แตห ปี คราม เฆ ชึม.
5แตห เฆ หราย ปี เดียบ โหงว ปี บูด คูน. แตห อามู อามาด เฌาพรา วี ณอน เตา เฆ.
6ดอ เตา เฆ ดี อามู อามาด เฌาพรา ตี, แตห อึณ อับ ว็อง, แตห อึณเตณ เฆ บอ เฆลียด.
7โคว, ปี โบง เฆ อาว มึห ดีโคว. เฆ แฮะ ดีณ ยอต แตห โอว เคร. เฆ บอ ฆึห กาเดา แตห โอว โจห ยัม.
8ดูอี ฌึร ตี, แตห เฆ ชึม ดอ ตู นัมโหลห เฆ. แตห เฆ วี เคร ยอต ปี ดีณ เฆ. แตห เฆ วี โจห ชึม แคง กาเดา.
9เซ อึณ ปาย ตี, น็อห โอว ดี โบยว ดาคึย โกบ เฌาพรา. อัน เฌา แฮะ คยอด โอว, แตห โอว โบยว ดาคึย.
10แคง น็อห แคง พึอม โอว ต็อห, “อึย เฌาพรา, อาว มึห อาเซ อี ปึอน จอย ปี แม เฌาพรา. แม มูห เฌาพรา อี จอย ดูอี อี ตู มึห โปลม, แตห เฆ ลอด ดี รันซู เฆ อี มึห โปลม มึห แฮณ หลึอม เฆ. แม มูห เฌาพรา อี ปึอน จอย เฆ ดูอี อี คัม ดูก, แตห เฆ ลอด ตัะ ดูอี อี คาหนาบ เฆ.”
11เฆ ดูอี ฮาย แฮะ ตัห กาลาง โฆรห ตู หมาน ลอง โอว. เฆ บอ ดีหมอด ปี ตู นับ โอว.
12เฆ โบง อี ตู หมึอม, วี เวียะ อี หมึอม ปี โบง โอว. เฆ โบง แตห น็อห โอว กาปยาต ลึร.
13ดอ ดึอม มึห เฆ เซา, โอว แฮะ ยืน ปี ดี โฮม, ชึบ ครึง จาน ดี โอว. โอว บอ มูด ฆึบ ตู โฆรห, ตู รัร, ยี ซาคึร แคง น็อห โอว.
14โอว โบง ปาย ตี, โอว มาด เฆ มูห ฆึก บอ อีกัด โอว. โอว บอ ปี ดูอี อี แฮะ มึห ดูก ตาง, อี แฮะ กลึร โกบ แฮะ ยัม มา อัน.
15ดอ วี เกห โอว, เฆ บอ กอย กาฌูะ โคย กาณัห โอว. เฆ บอ กาโพรม ดี ตัห กาโฆห ดี โอว. เฆ ดูอี ปี ตู นับ โอว, เฆ บอ เอห กาเซา โอว, เอห โอว เซเซ.
16เฆ บอ นับ ดี โบง ฮาว ฌึร ตี, ตู นับ ดี ปึร. เฆ บอ ฌ็อง ดีมัม ดี โอว.
17อึย แม เฌาพรา, อึณ ดี เหลณ แคะ เหมา, แม เฌา กอ ดี คยอด โอว? โอว หมาณ, แตห แม เฌา คยอด โอว, แกวะ แตห อาซาก โอว ชึม ดี เฆ อี ฮาย, อี ปี มาครังซี.
18ปัน ตี โอว ดี วี ดาง ฆูง เฆฌู ดี แม เฌา กาแต เฆ ดูอี กืน อี ตัห กาฌูะ. โอว ดี อืบ มยูก แม เฌา กาแต เฆ ดูอี บอกาเฆลียด.
19โอว หมาณ, แกวะ แตห เฆ รันซู โอว ปึอน ดี โคย กาณัห โอว ปีเยณ. แกวะ แตห เฆ อี ฌ็อง โอว บอ ปรา ดี กาเอียบ งาย, ตู มึห ดีโคว.
20โกบ ตู ซี กาล็อะ เฆ ดี อี, เฆ บอ กาพา ลอง ปี ดี ปาย ดี กาโลว ดี เฆ อี กอย ซีคยา, อี กอย หนีม แคง เรา แคง กาง.
21เฆ บอ กาลาง โฆรห ตาง ต็อห, “เอก, เอก, เย แฮะ ฮอต ยึร อัน.”
22แม เฌาพรา, แม แฮะ ยึร โตต ลอง อัน ตี. โอว หมาณ, แตห แม กอย รึม โดบ โอว เซเซ.
23อึย เฌาพรา, แม มูห เฌาพรา ปี กรึบ โอว. โอว หมาณ, แกวะ แตห แม เฌา กอย หนีม, แตห แม เฌา จอย โอว, แตห แม ซูงพยาด นา หมาน ดี โอว.
24แม เฌาพรา ปี กรึบ โอว, โอว หมาณ, แตห แม โบง ดี โอว แคะ กาดาน น็อห หมาน น็อห หมึอม แม. แกวะ แตห เฆ ปึอน ดี โคย กาณัห โอว.
25แกวะ แตห เฆ ปึอน ดี เฌณฌา แคง น็อห เฆ ต็อห, “เอก, เย แฮะ ฮอต โบง, แตห อัน ชึม, แตห อัน ลึร.” แกวะ แตห เฆ ปึอน ดี ต็อห, “เย แฮะ ฮอต แวน อัน.”
26เฆ อี โคย อี กาณัห โอว ตี, แตห เฆ วี กาฟัร กาเฟียน วี หมึอม ซาย. เฆ อี ปีคึก เฆ ต็อห, เฆ แฮะ หมึอม หลึอม โอว, แตห เฆ วี ชึม ซาเร บอ ซาย อี.
27เฆ อี โวว โอว, อี ซี แตห โอว กอย ดาคึย, แตห เฆ โคย ต็อห โหมว ดาคึย เซเซ. แตห เฆ ต็อห, “เฌาพรา แฮะ มึห ปวน ตาง. เซ แดเจณ อัน ปึอน ดี กอย ดาคึย, อึณ ล็อะ น็อห อัน.”
28แฮะ ฮอต ปัน ตี โอว ดี บอ กาลาง ลอง น็อห ซืร น็อห หมาน แม เฌา. โอว ดี บอ อืบ มยูก แม เฌา ดอง วัน ดอง คืน.
© 2021, Wycliffe Bible Translator, Inc. All rights reserved.