หม 34
34
ลอง ปี เฆฌู เฌาพรา
อาดาวีด แฮะ แดม โหมว นี, ดอ เตา ฮาว อัน ดี อาบีเมน บอ ณึงราง รึร, แตห อาบีเมน โฮว เลห อัน.
1โอว ดี อืบ ฆูง เฆฌู เฌาพรา เซเซ. โฆรห อี อืบ เฌาพรา, โอว ตู ซี แตห อึณ กาดัด ดอ เหมา.
2แคง น็อห แคง พึอม โอว, อึณ ดี เลห โฆรห อี คึกคัม ลอง เฌาพรา. เฆ ดูอี อี กาดูห ดูก ฮี ยึร, แตห เฆ วี โคย.
3แตห บอ เบ กาโพรม ดี อืบ เฌาพรา โดบ โอว. แตห เอ บอกาเฆลียด อืบ มยูก อัน เฌา.
4ดอ ซาคึร โอว ดี อัน เฌา, อัน เฌา บอ โทม โฆรห โอว. อัน บอ จอย แกวะ แตห โอว โยว มาเซ.
5แตห เบ บึง อัน เฌา, แตห เบ เอว, แกวะ แตห เบ โลว ซาย อี เฮา ดอ เหมา.
6โอว อี แฮะ คัม ดูก แบน โมยว แบน โมยว, โอว แฮะ แดะ เฌาพรา, อัน เฌา บอ ย็อห โฆรห โอว. อัน เฌา บอ คยอด โอว, แตห โอว เลห แคง ดูก แคง หณาบ ดอน โมยว.
7อึณ มูห อามู อามาด เฌาพรา อี กอย โรบ เฆ ดูอี อี โรวเซ เฌาพรา. เฆ บอ จอย แตห ดูอี ตี ปึอน ดี ลอด อาเพ อาเร ดอน โมยว.
8แตห เบ ตัห, แตห เบ เทว ดี บึง เฌาพรา, แตห เบ นับ ราง เบ แคะ หมึอม เฌาพรา. อาเซ บึง เฌาพรา, อัน ดี โบยว ดาคึย.
9เบ อี หณึม เฌาพรา, แตห เบ โรวเซ เฌาพรา. อาเซ โรวเซ เฌาพรา, อัน ดี มึห แคะ ปี โลว อัน.
10มาครังซี หนึม ซี บอ เอต ปี ดี โฮม. อาเซ ยี บึง เฌาพรา, อัน ตู เอต อี บอด อี หมึอม.
11อึย เบ ฆอน, แตห เบ ตัห โทม โฆรห โอว. โอว ดี มาโนว แตห เบ นับ ดี โรวเซ เฌาพรา.
12อาเซ ซี ปึอน อาซาก โต็ง, อัน ดี บอ หน็อะ อึณด็อะ ดอน หมึร ดอน หณา, แตห อัน ปึอน นา บอด นา หมึอม.
13อัน โลว ซาดีก, แกวะ แตห โฆรห ตู หมึอม เลห แคง โมต อัน, แกวะ แตห อัน กาลาง โฆรห ตู หมาน.
14แตห เบ แวน อี ตู หมึอม, วี โบง อี หมึอม. แตห เบ กอย ซีคยา บอ โฆยวฆยา ดี กาล็อะ ดี อี เฮา.
15เฌาพรา บอ ยอด เฆ ดูอี อี มึห น็อห ซืร น็อห หมาน. อัน ดี บอ โทม ปี ยาม ปี ดัด เฆ.
16เฌาพรา ดี โบง กาบัห ดี เฆ อี โบง มืก. อัน ตู แตห อี นัมโหลห เฆ แดง กาดาย นี.
17เฌาพรา บอ โทม โฆรห ปี ซาคึร เฆ ดูอี น็อห ซืร น็อห หมาน. อัน บอ จอย แตห เฆ เลห ตัะ ดูก ดอน โมยว.
18เฌาพรา บอ กอย กาตัด เฆ อี มึห น็อห ลึร. อัน เฌา บอ จอย เฆ อี ดูก อี ตู มึห ปี หน็อะ อึณด็อะ มาเซ.
19ดูอี อี โบง นา หมาน นา หมึอม, อัน กาดูห ดูก แบน โมยว แบน โมยว. เฌาพรา ยี ดี จอย อัน, แตห อัน เลห ตัะ ดูก ฌึร ตี ดอน โมยว.
20เฌาพรา ดี ยอด ลึมลา อัน, แกวะ แตห กาอาง อัน กาบัก คอ อู ณ็อง.
21เฆ ดูอี มืก, เฆ ดี ยัม ดี โมยว ตู หมึอม. อาเซ ฌ็อง ดูอี น็อห ซืร น็อห หมาน, อัน ดี โลว คัม หมาบ อัน.
22เฌาพรา บอ ทูด เลห แดเจณ อัน ดอน อี. อาเซ บึง เฌาพรา อาว ฮู โลว คัม หมาบ อัน.
© 2021, Wycliffe Bible Translator, Inc. All rights reserved.