อง 25
25
1อานี อึณ บอ มูห โฆรห อี มึห อางยาน บอด ปี กาลาง คูนดีคัม อาซาโลวโมว. ดอ มูห โจว คูนดีคัม อาเฮจัะกียา, ดอ อึบ อัน อืง ยูดา, เฆ ดา จาเร แฮะ วี ทูด วี แดม กามาย.
2เอ โรวเซ เฌาพรา โกบ นับ อัน ดี โบง ปี ตู นับ ดูอี. เอ ยี โรวเซ คูนดีคัม โกบ นับ อัน ดี กาลาง แตห อึณ ลึห โตต อาเร ดูอี.
3เอ ดูอี, เอ ตู นับ แคะ จา ฆางหราว, ตู นับ แคะ เฮต กาดาย. ปาย ตี เอ มืร ตู นับ ปี กาพา คูนดีคัม.
4เซ เอ ทารอง เลห เอียง รึอน, เอ ดี ปึอน รึอน บอด อี ปึอน โบง แบน ก็อก.
5เซ เอ ดึห แวน ดูอี ตู หมึอม อี กอย โคบ คูนดีคัม, คูนดีคัม ดี กอย ซีคยา, โบง นา มูห นา หมาน.
6แม แกวะ ปีพูง แม ดี อาต คูนดีคัม. แกวะ กอย โดง กอย เฆ ดา ตาง.
7โคว, เซ อี ต็อห, “ตัห โฮะ นา แดง นี.” อึณ หมึอม หลึอม อี กาลาง ดี แม, แตห แม หมึอม ซาย ดี อาต ดา ตาง.
8แม แกวะ กาเตา ดี กาลาง ดี ดา ตาง ลอง แปะ แฮะ ยึร แม. เซ ฮี วี มึห อี เฮา วี กาลาง ปอ อู โมยว, แม ดี วี ปาย เหมา?
9เซ แม มึห ดี กาบัห ดี ดูอี อี กอย กาตัด แม, แตห บาย ลาย กามวน, แตห อึณ ฮอต คานา บาย. แกวะ วีน ดี กาลาง บยัะ โฆรห ปี เครียง อี ดี กาลาง ดี แม,
10โยว อี แฮะ โทม โฆรห แม ตี ดี วี กาลาง แตห แม ซาย อี, แตห อึณ แตห แม ชึม ซาเร.
11โฆรห ปี กาลาง ดอ ซังโดว, อึณ ดี ปี เบล ครีว ชีด อี มึห กาง รึอน.
12โฆรห อางยาน อี ดัว ซาดีก, ฆาย ดูอี อี ซี โทม, อึณ บอ ปี บีโหยะ ครีว ฆาย ฆันแด ครีว แฌด.
13ดาลาม อี มึห น็อห ซืร, อัน ดี บอ โบง, แตห น็อห ดูอี อี จัร อัน ฆัด เฆียด. อึณ ปี อึม ดาด อี โจห อาคราว โซะ โหงว.
14เซ ดูอี อี กาแซณ ต็อห, “อึร, โอว ดี แตห,” อัน ยี ตู แตห, อึณ บอ ปี แฮะ มึห อึณอูะ, ยี ตู มึห ฆลาย.
15น็อห คัม ดี ยืน, อึณ ดี บอ ปึอน ดี กาซูห ดา กาณา. โฆรห อึณจูะ อึณจัม อี หมึอม โทม, อึณ บอ แป ปี อึณจัม น็อห ดูอี อี ตู โฆม อาเซ.
16เซ แม กาตูณ งาม มาเพียน, แตห แม โฮม มอก แคะ ดี แพ ซีคยา แม. เซ แม ฮี โฮม กืน, โฮม หลึอม, แม ดี วี ฮึร เลห.
17แกวะ แตห แม ออน ดี ฮาว แล เซ รึร ดี กาง เฆ อี กอย กาตัด แม, โยว เฆ ปึร แม, วี กาอีห แม.
18เซ ดูอี แบน ซักเซ, กาลาง อี ตู หมาน ลอง ฆึก อัน, อึณ บอ ปี อัน กาโฆห ดี เฆ, ตา มัง มัห บอ มาปัวะ ลาง บอ บลา อัะ อี บัต กาเซา.
19ดอ ฌัม แม ดูก, เซ แม บึง ดูอี อี ตู ปึอน น็อห ตาง, อึณ บอ ปี แม มึห หราง วัะ บอ เปลา แฆะ.
20ดูอี อี ต็อห โหมว แตห ดูอี น็อห ลึร โทม, อัน บอ ปี ดูอี อี บูต ซีโตว ดอ อาคราว ฆัด. อัน บอ ปี ดูอี อี ดึห ซัยะ พ็อห ดี ดีม.
21เซ รันซู แม ซี โฮม, แตห แม เฮียง อัน โฮม. เซ อัน ซี เดียง อึม, แตห แม ดัว อัน เดียง.
22เซ แม โบง ปาย ตี, โยว อัน บอ วี ซาย แม, วี โหลห หมาบ อัน, วี ซี แบน ฆึก แม. เฌาพรา ดี วี ดัว รูห อัน ดี แม.
23เซ คูน บูด ตัห นา กัว, อึณ แตห ฆลาย ตัห. ปาย ตี โฆรห อี ลาย กาย็อง แตห อี ปีซ็อง งาย.
24กอย แคง ทึบ, อึณ บอ หมึอม หลึอม กอย รึม แคง กาง โดบ อีบึณ ซีมา ปึณ ซีมา เอห.
25เซ แม ยึร ซาดาง นา บอด นา หมึอม อี ตัห มืง โต็ง, อึณ บอ ปี แม แฮะ ปึอน ดี เดียง อึม เฆียด ดอ ซี เดียง กาเซา แม.
26เซ ดูอี อี มึห น็อห ซืร วี โดบ ปี อึง ดูอี ฮาย, อัน บอ ปี อึม โตห อี กาตูน. อัน ปี บอ อึม คึม อี แฮะ อูห อัม.
27เซ แม โฮม กืน โฮม หลึอม งาม มาเพียน, อาว หมึอม ดี แม. ปาย ตี, อึณ ตู กาอาบ แม โบง แตห อี เฮา อืบ แม.
28เซ แม ตู ยืน ตู โอด น็อห, อึณ ปี แรง มืง อี แฮะ ลึร, อี แฮะ กาปยาต.
© 2021, Wycliffe Bible Translator, Inc. All rights reserved.