แปร กาฮ็อห 13
13
ลอง อาโมวแซ จัร เฆ ฮาว คยอง ดี ยอด มืง กานัณ
1เฌาพรา ปี วี จัร อาโมวแซ ต็อห, 2“แตห แม ร็อห เฆ อี มูห ดา ตาง ดูอี อีซาเรลัะ ฆึร ดี อา วี, อู ครึร อู วี, แตห เฆ ฮาว คยอง ดี ยอด มืง กานัณ อี มูห มืง ปี ดี ดัว โอว ดี เบ ดูอี อีซาเรลัะ.”
3ปาย ตี อาโมวแซ บอ โบง โดบ ปี กาลาง เฌาพรา ดี อัน. อัน บอ จัร เฆ อี มูห ดา ตาง อี แยต เฆ ดอน ครึร, แตห เฆ เลห แคง แปร โดง จืร พาราน ตึอน.
4แคง ครึร อารูเบน อึณ บอ มูห อาซามูอา อี มูห ฆอน อาฌากูรา.
5แคง ครึร อาซีเมโอน อึณ บอ มูห อาซาพัด อี มูห ฆอน อาโฮวรี.
6แคง ครึร อายูดา อึณ บอ มูห อาฆาลีบ อี มูห ฆอน อาเยโพวนา.
7แคง ครึร อาอีซาคา อึณ บอ มูห อาอีฆาลัะ อี มูห ฆอน อาโยว.
8แคง ครึร อาเอพารีม อึณ บอ มูห อาโฮวเซ อี มูห ฆอน อานูน.
9แคง ครึร อาเบนยาม อึณ บอ มูห อาปาลาดี อี มูห ฆอน อาราพู.
10แคง ครึร อาเฌบูโลน อึณ บอ มูห อากาเดลัะ อี มูห ฆอน อาซอดี.
11แคง ครึร อามานาเซ อี มูห ฆอน อาโยว ตึอน อึณ บอ มูห อากาตี อี มูห ฆอน อาซูซี.
12แคง ครึร อาดาน อึณ บอ มูห อาเมลา อี มูห ฆอน อาเกมาลี.
13แคง ครึร อาเซน อึณ บอ มูห อาเซซูรา อี มูห ฆอน อามีคีลา.
14แคง ครึร อานาบทาลี อึณ บอ มูห อานาพี อี มูห ฆอน อาวาพาซี.
15แคง ครึร อาฆัด อึณ บอ มูห อาฆูลัะ อี มูห ฆอน อามาคี.
16อาโมวแซ บอ จัร ดูอี เฆ ตี แตห เฆ ฮาว คยอง ดี ยอด แคง มืง กานัณ ตึอน. อาโฮวเซ อี มูห ฆอน อานูน ตึอน, อาโมวแซ บอ วี กาปลูะ จืร อัน, แตห อัน วี จืร อาโยวซูอา.
17ดอ จัร อาโมวแซ เฆ ฮาว ตี, อัน วี ดัม เฆ ต็อห, “แตห เบ ฮาว โดบ อึณเตณ นา เตต, แตห เบ วี โฮะ แดง นอน. 18แตห เบ ยอด, แตห เบ นับ แคง มืง ตี อึณ ปาย เหมา. ดูอี อี กอย แคง มืง ตี, อึณ กืน แคะ เหมา. เฆ มึห แฮณ มอก เหมา.
19แตห เบ ยอด บอ กาดาย แคง มืง ตี, โยว อึณ หมึอม อาว หมึอม. แตห เบ ยอด บอ โดง กอย เฆ ดูอี แคง มืง ตี, โยว อึณ มูห ทึบ บีก, โยว อึณ มูห มืง อี แฮะ มึห แรง, อี แฮะ มัน ซีคยา. 20แตห เบ ยอด บอ กาดาย โดง รัณ เฆ, โยว เลห อัน แฮะ กืน อาว กืน. ยอด บอ แปร เฆ นัง เฮ, โยว อึณ มึห ตู มึห. แตห เบ ลาย แยต ดี ยัะ. แตห เบ บอ ดึห ตัห เบล ปี ซัม เฆ แคง มืง ตี มัง โมยว.” อาคราว ดอ อัน ตี อึณ ซีงยา กาจูห เบล มางูน ดี ซีน.
21เฆ บอ ฮาว โดบ อึณเตณ นา กัว ตึอน. เฆ มืร กาจูห ดี ยอด แคง แปร กาฮ็อห อี จืร จีนา กอ วี ฌัม โดง อี จืร เรโฮบ อี มูห โคบ อึณเตณ อี ฮาว เลโบวฮามาด. 22ปาย ตี เฆ ฮาว โดบ อึณเตณ บลาก นา เตต, วี ฮาว ฌัม ดี มืง เฮโบรว อี มูห โดง กอย เฆ ดูอี อาฮีมาน บอ ดูอี อาเซมเซ บอ ดูอี อาตาลาม. ดูอี เฆ ตี, เฆ มูห หลูกหลาน ดูอี อานาก. มืง เฮโบรว ตี, เฆ แฮะ แด อาต แด เฆ มืง จอนา อี กอย แคง มืง แอฆึบ ตึอน. เฆ แฮะ แด มืง เฮโบรว ตี อาดา บู ซีนัม, เฆ กอ วี แด มืง จอนา. 23ดอ ฮาว ฌัม เฆ ดี ดีลัยะ อี จืร เอโคน, เฆ บอ แดบ เบล มางูน อู กาโย็ง อี ตาง กาเซา. ดูอี อา วี โลว กาฆอด กาโย็ง เบล มางูน ตี. เฆ บอ ดึห ตัห บอ เบล มาจัก บอ เบล ดีปู. 24โกบ แดบ เฆ ดูอี อีซาเรลัะ ดี กาโย็ง เบล มางูน โดบ ดีลัยะ ตี, เฆ แตห ดีลัยะ ตี จืร เอโคน. “เอโคน” แคง โฆรห เฆ, อึณ เลห “กาโย็ง เบล.” 25อึณ บอ โนะ พวน ฆึร ซีแง, เฆ บอ วี เลห โดง ปรา เฆ ดี คยอง ดี ยอด, วี วีว โดง กอย เฆ.
26ดอ อัน ตี อาโมวแซ บอ อาโรน บอ เฆ ดูอี อีซาเรลัะ บอกาเฆลียด, เฆ กอย โคบ มืง ซาเดด แคง แปร กาฮ็อห อี จืร พาราน ตึอน. เฆ บอ กาลาง บอ แค ปี ปาย แปะ แฮะ ยึร เฆ. เฆ บอ บยัะ บอ เบล ปี ดึห ตัห เฆ ตึอน, แตห ดูอี กืน ยึร. 27เฆ บอ กาลาง ดี อาโมวแซ ต็อห, “เย แฮะ ฮอต ฮาว ยอด ซีคยา ปี ปาย แคง มืง ตี. แฮะ มูห มืง บอด อี แตห เอ มึห ปี โลว เอ ดอน โมยว. บอ กาดาย แฮะ บอด, แฮะ หมึอม. เบล เฆ นี มืร, บอ มูห เบล แคง มืง ตี. 28มาแล, ดูอี อี กอย แคง มืง ตี, เฆ มึห โปลม มึห แฮณ กืน. มืง ดอน มืง บอ มูห มืง ตาง อี แฮะ มึห แรง โรบ ดอน บลาก. แดง ตี, เย แฮะ ยึร บอ ดูอี อานาก ตึอน. 29ดูอี อามาเลก บอ กอย บลาก นา เตต. ดูอี อาโมยว เฮทีด, ดูอี เยบูซีด บอ ดูอี อาโมวรีด, เฆ วี กอย แดง นอน. ดูอี อาโมยว กานัณ, เฆ บอ กอย โคบ อึม นัมมูกซารา บอ โคบ แบลง ยอดาน.”
30ปัน ตี อาฆาลีบ บอ กาลาง ดี เฆ ดูอี กืน อี แฮะ จูห ดี ปึณ ดี อาโมวแซ, แตห เฆ วี เยน. อัน ต็อห, “แตห เอ ฮาว ดึห มืง ตี อู เฌณ. เอ ดืน ดี แป เฆ อาคาคัร หมาน.”
31มาแล, เฆ ดูอี อี โดบ อัน, เฆ วี ต็อห, “เอ ตู แหนน ดี แป ดูอี แคง มืง ตี. เฆ มึห โปลม เฆ แฮณ หลึอม เอ.” 32ปาย ตี เฆ วี กาลาง อี ตู หมึอม ดี เฆ ดูอี อีซาเรลัะ ลอง ปี ปาย แคง มืง ตึอน. เฆ วี ต็อห, “มืง แปะ แฮะ ฮอต ฮาว ยอด เย ตี, อึณ บอ มูห มืง อี นับ ดี แตห ดูอี อี กอย นา แคง ลึร ชึม. ดูอี ปี กาตูณ เย แคง มืง ตี มืร, อึณ มูห โตต ดูอี โดว โต็ง โดว ตาง ดีโลย. 33เย แฮะ ยึร ดูอี โดว ตาง, โปลม ตาง อี มูห ดูอี อานาก ตึอน. เฆ กอย แคง มืง ตี. เย ยอด เฆ, เอ แฮะ ปี มา อาโฌ็ง. เฆ มืร ดี มาด เอ ปาย ตี.”
Currently Selected:
แปร กาฮ็อห 13: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
