แปร กาฮ็อห 14
14
ลอง ดูอี อีซาเรลัะ ปีรู เฆ ดี เฌาพรา
1ปาย ตี ดูอี เฆ ตึอน บอ แบน น็อห กลึร, น็อห ดีแตด. เฆ บอ ยาม ดอง คืน. 2เฆ บอกาเฆลียด บอ ปึณ บอ เอห บอ กาลาง โฆรห ตู หมึอม ดี อาโมวแซ ฆาย อาโรน. เฆ ต็อห, “เย นี, เซ เย ยัม แคง มืง แอฆึบ, ยัม บอ แคง แปร กาฮ็อห นี, อึณ หมึอม กาเซา ดี เย. 3เหมา อึณ ปาย ปี แยต เฌาพรา ดี เย, แตห เย ตัห ฌัม แคง มืง ตี? อัน ดี บอ แตห เย ยัม ดี ดา ซึก, แตห อีบึณ เฆ ฆอน เย วี คัม ดูก นา ปัน. โคว, แตห เย วี วีว แคง มืง แอฆึบ ตึอน. อึณ หมึอม หลึอม ฮาว ลึบ เอ แคง มืง ตี.” 4ปาย ตี เฆ บอ ลาย กามวน กาแต เฆ ต็อห, “แตห เอ วี ร็อห ดูอี คอ อู วี, แตห อัน วี แยต วีว เอ ดี มืง แอฆึบ ตึอน.”
5ดอ อัน ตี อาโมวแซ ฆาย อาโรน บอ มูด ฆึบ นา อาต เฆ ดูอี กืน. 6อาโยวซูอา อี มูห ฆอน อานูน ตึอน บอ อาฆาลีบ อี มูห ฆอน อาเยโพวนา, ฆาย แฮะ ดึอม ฮาว โดบ เฆ อี คยอง ดี ยอด มืง ตึอน. ฆาย บอ กายาต ครึง ตา ฆาย โกบ แฮะ กลึร ฆาย. 7ฆาย วี กาลาง ดี เฆ ดูอี บอกาเฆลียด ต็อห, “มืง แปะ แฮะ ฮอต ฮาว ยอด เย ตี, อึณ แฮะ มูห มืง อี หมึอม กาเซา. 8เซ เฌาพรา บอ อึง เอ, อัน เฌา ดี แยต เอ แตห เอ ฌัม แคง มืง ตี อี มูห มืง บอด อี แตห เอ มึห ปี โลว เอ ดอน โมยว. 9แกวะ แตห เอ กาแคณ ดี เฌาพรา. แกวะ แตห เอ โยว ดูอี แคง มืง ตี. เอ ดี แป เฆ หงึย หงึย, แตห อึณ ปี เอ โฮม คามูน. เฆ อาว ฮู มึห อี แร อี ฆ็อง เฆ. เฌาพรา ยี กอย รึม โดบ เอ. โคว, แกวะ แตห เบ โยว.”
10ฆาย แฮะ ฮอต ต็อห ปาย ตี แคะ กอย ดูอี เฆ บอกาเฆลียด บอ วี กาโพรม ดี ดึห มาว, ต็อห ดี วึณ, แตห ฆาย ยัม. ดอ อัน ตี อู เฌณ, เฌาพรา บอ บยัะ อาพูง ดังโคว อัน, แตห อึณ บลาง แดง ทึบ บีก บอด, แตห เฆ บอกาเฆลียด ปึอน ดี ยึร. 11เฌาพรา วี ต็อห ดี อาโมวแซ, “ดูอี อาโมยว นี, เฆ ตู โรวเซ โอว ดอ เหมา. โอว แฮะ โบง อี หมึอม อาม กาเซา แบน โมยว แบน โมยว. เฆ ยี ตู หณึม โอว ดอ เหมา. โอว อาว ฮู แป คัม ปี โบง เฆ ตี. 12โอว ดี แตห เฆ คัม ดูก ดี เซา รอฆา, ตู แตห เฆ ปึอน ดี บึง คาฆูน ปี ต็อห โอว ดี ดัว ดี เฆ. โอว ดี วี แตห แม แบน ดูอี อาโมยว กืน. แตห แม มึห ปวน หลึอม เฆ.”
13อาโมวแซ วี ต็อห ดี เฌาพรา, “แม เฌา แฮะ แตห ปวน แม แยต เลห ดูอี เฆ นี แคง มืง แอฆึบ. เซ แม วี แวน เฆ, ดูอี อี กอย แคง มืง แอฆึบ, เฆ ดี บอ วี ยึร ลอง อัน ตี. 14เฆ ดี บอ วี กาลาง ดี ดูอี อี กอย แคง มืง นี. เฆ ยี แฮะ ฮอต ยึร ลอง แม เฌา แฮะ กอย รึม โดบ เย แดเจณ แม. แม เฌาพรา มืร แฮะ บยัะ ซีคยา ปี ปาย แม ดี เย. แม แฮะ แตห ร็อง อึณอูะ กอย กาโรย เย. กาแต ซีแง อึณ บอ แบน ร็อง อึณอูะ. แคง หมึร อึณ บอ แบน ร็อง เงา อี แยต ฮาว เย. 15เซ แม เฌา ดี ง็อห ยัม ดูอี บอกาเฆลียด, เฆ ดูอี อาโมยว เฮา, เฆ อี แฮะ ดึอม ยึร ลอง แปะ แฮะ โบง แม เฌา ตี, เฆ ดี วี ต็อห, 16‘เฌาพรา ตี, อัน ตู แป ดี แยต ฮาว เฆ, แตห เฆ ฌัม แคง มืง แปะ แฮะ กาแซณ อัน ดี ดัว ดี เฆ. โคว, อัน วี ง็อห ยัม เฆ แคง แปร กาฮ็อห นี.’
17อึย แม เฌาพรา, ดอ ตี นี โอว วี หมาณ, แตห แม เฌา วี บยัะ ปวน แม, แตห แม เฌา วี โบง โดบ แปะ แฮะ ดึอม ดัว แม เฌา กาดีก ซัดฌา. 18แม เฌา มืร แฮะ ดึอม ต็อห, ‘โอว เฌาพรา, โอว ตู ปีรู ปีจาว โอว หงึย หงึย. โอว มูห เฌาพรา อี นับ ดี ร็อก กาเว เซเซ. โอว บอ ฆ็อห แวน หมาบ บอ ทาย ดี ดูอี อี ปีรู ปีจาว เฆ ดี โอว. ปี บอ แฮะ ปาย ตี มืร, โอว ยี ตู แตห ดูอี ลอด คัม หมาบ เฆ. โอว ดี ดัม หมาบ ดี หลูกหลาน เฆ, แตห เฆ วี คัม หมาบ ฆูณ เฆ ตี, แตห อึณ กอ โนะ โอย โจว, พวน โจว.’ 19อึย แม เฌาพรา, โกบ มึห แม น็อห ร็อก อี ตู นับ ดี บยอง, ตู นับ ดี บลืง, โอว วี หมาณ แม เฌา, แตห แม ฆ็อห แวน หมาบ ดูอี เฆ นี, แตห อึณ ปี ดอ แฮะ ฆ็อห แวน แม เฌา หมาบ เฆ ซีณ ดอ เลห เฆ แคง มืง แอฆึบ ตึอน กอ ฌัม อาตึร นี. โอว หมาณ ปาย ตี.”
20แฮะ ฮอต ปาย ตี เฌาพรา วี ต็อห ดี อาโมวแซ, “โอว แฮะ ฆ็อห แวน หมาบ เฆ โกบ แฮะ หมาณ แม ดี โอว. 21โอว ต็อห อาคัร ดี แม, อาพูง ดังโคว โอว ดี บอ ลึห แดง กาดาย นี ดอน โปละ. 22อึณ ยี มูห ดูอี เฆ นี, โอว มืร แฮะ ฮอต แตห เฆ ยึร อาพูง ดังโคว โอว. เฆ มืร แฮะ ยึร บอ อี หมึอม อาม กาเซา ปี บยัะ โอว แคง มืง แอฆึบ บอ ดอ ฮาว เฆ โดบ อึณเตณ แคง แปร กาฮ็อห นี. มาแล, เฆ ยี ตู โทม โฆรห โอว, เฆ แฮะ เทว ดี ยอด น็อห โอว แบน ฆึร เฌณ. 23โคว, ดูอี เฆ ตี, เฆ ตู ปึอน ดี ลึบ แคง มืง แปะ แฮะ กาแซณ โอว ดี ดัว ดี ฆูณ ดัง เฆ. เฆ อี แฮะ ปยาต แตห โอว รู, เฆ ตู ปึอน ดี ลึบ แคง มืง ตี คอ อู วี. 24มาแล, อี มูห แดเจณ โอว อาฆาลีบ, น็อห อัน ตู ปี เฆ. อัน แฮะ โดบ ซีคยา โอว. โคว, โอว ดี แยต อัน, แตห อัน กอ ฌัม แคง มืง แปะ แฮะ ฮอต ฮาว ยอด อัน ตี. บอ หลูกหลาน อัน ดี ปึอน ดี ลึบ กอย แคง มืง ตี. 25แคหณา แตห เบ ฮาว. ดูอี อามาเลก บอ ดูอี กานัณ เฆ แฮะ กอย โดบ ดีลัยะ. แตห เบ ฮาว แคง แปร กาฮ็อห โดบ อึณเตณ อี ฮาว ดีโหนง เรณ.”
26แฮะ ฮอต ปาย ตี เฌาพรา ปี วี ต็อห ดี อาโมวแซ ฆาย อาโรน, 27“โอว อาว ฮู คัม เฆ ดูอี ฮาย ดูอี มืก อี ต็อห โฆรห ตู หมึอม ดี โอว. โฆรห ปี ปึณ ปี ต็อห เฆ ดี โอว, โอว แฮะ ฮอต แพ. 28แตห แม กาลาง ดี เฆ, ‘เฌาพรา ต็อห อาคัร ดี เบ, อัน ดี โบง ดี เบ, แตห อึณ โดบ แปะ แฮะ กาลาง เบ ดี อัน. 29เบ โลว ยัม. โดว ยัม เบ ดี บอ กอย แบน โปละ แบน โปละ แคง แปร กาฮ็อห นี. ดอน อี อี แฮะ ฮับ จืร อัน แคง ฌาราง ตึอน, อาซาก อี แฮะ โนะ อา ฆึร ซีนัม โฮะ นา แดง, เฆ บอกาเฆลียด แฮะ ปึณ, แฮะ ต็อห โฆรห ตู หมึอม ดี โอว. โคว, อู วี มืร อาว มึห อี ปึอน ดี ลึบ แคง มืง ตี. 30โอว แฮะ ดึอม กาแซณ ดี แตห เบ บึง มืง ตี. มาแล, อึณ มึห มี อาฆาลีบ อี มูห ฆอน อาเยโพวนา ฆาย อาโยวซูอา อี มูห ฆอน อานูน อี ปึอน ดี ลึบ. แดง ตี, เบ ตู ปึอน ดี บึง คอ อู วี. 31เบ ปี บอ แฮะ ต็อห, ฆอน เบ บอ หลูกหลาน เบ ดี คัม ดูก มืร, โอว ยี ดี แยต ดี ตึย เฆ, แตห เฆ กอ ฌัม แคง มืง แปะ แฮะ แวน เบ ตี. แตห เฆ วี บึง มืง ตี. 32อี มูห เบ, เบ ดี ยัม แคง แปร กาฮ็อห นี. 33หลูกหลาน เบ, เฆ โลว ฮาว วีว ฮาว เวณ แคง แปร กาฮ็อห นี อาดา พวน ฆึร ซีนัม. เฆ ดี วี โลว คัม หมาบ แปะ แฮะ ลูต เบ, แตห อึณ กอ ฌัม ปัน ดี ยัม โตต เบ แคง แปร กาฮ็อห นี. 34เบ แฮะ ฮาว คยอง ดี ยอด มืง ตี อาดา พวน ฆึร ซีแง. อู ซีแง, โอว แตห อึณ วี แบน อู ซีนัม. เบ โลว วี คัม หมาบ เบ ตี อาดา พวน ฆึร ซีนัม. ปาย ตี เบ มืร ดี นับ แคะ ดี หณาบ เซ โอว แวน เบ.’ 35โอว แฮะ ฮอต กาลาง, โอว ดี โบง ปาย ตี ดี เบ ดูอี ฮาย ดูอี มืก. เบ อี แฮะ กอย กาฌูะ กาดึม, กาพา มี ดี กาแคณ ดี โอว. แคะ กอย เบ บอกาเฆลียด, เบ ดี ยัม โตต แคง แปร กาฮ็อห นี ดอน อี. โอว เฌาพรา แฮะ กาลาง ปาย ตี.”
36ปัน ตี เฆ ดูอี ปี จัร อาโมวแซ แตห เฆ ฮาว คยอง ดี ยอด มืง ตึอน, เฆ อี ตู วี ตัห กาลาง โฆรห หมาน, เฆ อี โบง แตห ดูอี อีซาเรลัะ ปึณ ดี เฌาพรา, 37เฌาพรา แตห เฆ ยัม โตต ดี เซา รอฆา. 38แคง เฆ ดูอี ฆึร ดี อา วี อี ฮาว คยอง ดี ยอด มืง ตึอน, อึณ ลอด มี อาโยวซูอา อี มูห ฆอน อานูน บอ อาฆาลีบ อี มูห ฆอน อาเยโพวนา. อึณ มึห มี ฆาย อี ปึอน ดี กอย ดาคึย ฆยามซา.
39อาโมวแซ บอ วี กาลาง ปี ต็อห เฌาพรา ตี ดี เฆ ดูอี อีซาเรลัะ บอกาเฆลียด. เฆ บอ วี กลึร กาเซา. 40ปา แคหณา เฆ บอ ยีต ซีณ ซีณวัห เจว, แตห เฆ โฮะ แดง นอน จา. เฆ มืร ต็อห, “อึร, คา นี เอ ดี ฮาว ดี มืง แปะ แฮะ กาแซณ เฌาพรา ดี ดัว ดี เอ. โคว, เอ มืร แฮะ ฮอต กาลึบ.”
41มาแล อาโมวแซ วี ต็อห ดี เฆ, “เหมา อึณ ปาย ปี หลึร เบ โฆรห เฌาพรา? อากยาม อางยาน เบ ตี, อึณ ตู แบน. 42แกวะ แตห เบ ฮาว. เฌาพรา ตู กอย รึม โดบ เบ. รันซู เบ ดี กาโฆห แป เบ. 43เบ ฮี กาตูณ ดูอี อามาเลก บอ ดูอี กานัณ, เบ ดี ยัม โดง กาโฆห เบ ตี. โกบ แฮะ แวน เบ เฌาพรา, เฌาพรา มืร อาว ฮู กอย รึม โดบ เบ.”
44เฆ ยี ตู จู, แนะ ฮาว. มาแล, ฌีดืก เฌาพรา บอ อาโมวแซ ตู เลห นา เรต โดง คยัะ เฆ ตึอน. 45ปาย ตี ดูอี อามาเลก ฆาย ดูอี กานัณ อี กอย แดง นอน ตึอน, เฆ บอ โลง บอ กาโฆห ดี เฆ ดูอี อีซาเรลัะ ตี. เฆ บอ แป ดูอี อีซาเรลัะ บอ คูงครัห เฆ กอ ฌัม ดี มืง ฮอมัะ.
Currently Selected:
แปร กาฮ็อห 14: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
