มท 6

ลอง จอย อี เฮา

1ปัน ตี เฌา เยซู วี มาโนว ต็อห, “เซ เบ จอย อี เฮา, เบ โลว ซาดีก น็อห เบ. เซ เบ โบง นา หมึอม ปี อึง เฌาพรา, แกวะ โบง แตห อี เฮา ยึร. เซ เบ ตู ซาดีก ปาย ตี, เฌาพรา อี กอย ฆางหราว, อัน ตู วี แตห อึณ แบน อาฆยึร ดี เบ.

2โคว อัน ตี เซ เบ ต็อห ดี ดัว โกรว เบ ดี ดูอี ฆีน, แกวะ โบง ปี เฆ ดูอี ณึงราง บอด แคง โฌง เฆ บอ ดี ฆลัะ โดง ปึอน ยึร ดูอี กืน. แกวะ แดะ อี ตัห ยอด ปี โบง เบ. เฆ ดูอี ณึงราง บอด, เฆ นับ ดี โบง ปาย ตี, แตห อี เฮา อืบ เฆ. โอว ยี ต็อห อาคัร ดี เบ. อาเซ โบง ปาย ตี, อึณ ปี อัน แฮะ ฮอต ปึอน แคะ ปี ซี ปึอน อัน. ปี โบง อัน อาว มึห อาฆยึร ดี อาต เฌาพรา. 3เซ เบ ดัว โกรว เบ ดี ดูอี ฆีน, แกวะ แตห อาเซ นับ ปี โบง เบ. 4แตห มี เบ นับ ลอง อัน ตี. เซ อึณ ปาย ตี, เฌาพรา อี ปี ฆูณ เบ, อัน ดี วี ยอด แปะ แฮะ โบง เบ. อัน ดี วี โบง, แตห อึณ แบน อาฆยึร ดี เบ.”

ลอง ดูอี ซาคึร ดี เฌาพรา

5เฌา เยซู วี ต็อห, “อึณ บอ ปาย ตี, เซ เบ ซาคึร ดี เฌาพรา, แกวะ โบง ปี เฆ ดูอี อี ณึงราง บอด. เฆ อึง ดี กอย แคง โฌง เบ, บอ กอย ดี โคบ อึณเตณ, แตห อี เฮา ยึร เฆ. โอว ต็อห อาคัร ดี เบ. เฆ ดูอี ฌึร ตี แฮะ ปึอน แคะ ปี ซี ปึอน เฆ. ปี ซาคึร เฆ อาว มึห ดีโคว ดี อาต เฌาพรา. 6โคว อัน ตี เซ เบ ซาคึร, เบ โลว ฮาว ลึบ แคง โฮง, วี กาบีด มาโลห, วี ซาคึร ดี เฌาพรา อี ปี ฆูณ เบ ปี ตู ปึอน ยึร เบ. ปัน ตี เฌาพรา อี นับ ดี ยึร ปี ตู ปึอน ยึร อี เฮา, อัน ดี โทม โฆรห เบ, แตห อึณ แบน อาฆยึร ดี เบ. 7ปอ อู โมยว เบ โลว ซาดีก. เซ เบ ซาคึร, แกวะ กาลาง โฆรห ซัมซัด ปี เฆ ดูอี อี ตู นับ เฌาพรา. เฆ ทาง, เซ เฆ ซาคึร เหลณ บอ ซาคึร โต็ง, เฆ ดี ปึอน แคะ ปี หมาณ เฆ. 8แกวะ แตห เบ โบง ปี เฆ. โคว, เฌาพรา อี ปี ฆูณ เบ, อัน แฮะ นับ โตต ดอน โมยว ปี โลว เบ อาต หมาณ เบ ดี อัน.

9โคว อัน ตี เบ โลว ซาคึร ปาย นี. เบ โลว ต็อห,

‘อึย, ฆูณ เย อี กอย ฆางหราว, หมาณ แตห เย ดูอี มึห น็อห โรวเซ รีมาด แม เฌา.

10อาคราว ดี อึบ แม เฌา ดูอี แดง กาดาย, แตห แม แตห อึณ ตัห, แตห อึณ ฌัม. แคง มืง แดง แม อึบ ปาย เหมา, แตห แม อึบ บอ แดง กาดาย ปาย ตี.

11ดอน ซีแง ดอน ซีแง แตห แม เฌา ดัว ปี ดี โฮม ดี เย.

12แตห แม เฌา บลัวะ แวน หมาบ เย. แตห อึณ ปี, บอ เย บลัวะ แวน หมาบ อี เฮา.

13แกวะ แตห เย โดบ อี กาซูห เย โบง หมาบ. แตห แม คยอด เย, แตห เย ลอด นา ตู หมึอม. โกบ มูห แม อัน เฌา อี อึบ กาดาย บอ มึห ปวน ตาง บอ อาพูง ดังโคว ตาง อี กอย ดอน โจว ดอน บาน, เย ซาคึร ปาย ตี.’#6:13 บับ ดอ โฆว มัง โมยว อาว มึห กาบัก นี.

14เซ เบ บลัวะ แวน หมาบ อี, บอ เฌาพรา อี ปี ฆูณ เบ, อี กอย ฆางหราว, อัน ดี บลัวะ แวน บอ หมาบ เบ. 15เซ เบ ยี อูน หมาบ อี เฮา, บอ เฌาพรา ดี อูน หมาบ เบ.”

ลอง ดูอี ยืน ปี ดี โฮม

16ปัน ตี เฌา เยซู วี มาโนว ปอ อู โมยว. อัน ต็อห, “เซ เบ ยืน ปี ดี โฮม, แกวะ แตห เบ มึห นา อี ตู ดาคึย ปี เฆ ดูอี ณึงราง บอด. เฆ นับ ดี โบง แตห นา เฆ อาว ชีด, แตห อึณ บยัะ ดี อี ลอง ยืน เฆ ปี ดี โฮม. โอว ต็อห อาคัร ดี เบ, เฆ อี โบง ฌึร ตี, เฆ แฮะ ปึอน แคะ ซี ปึอน เฆ. 17เซ เบ ยืน ปี ดี โฮม, แตห เบ พ็อห นามัน ดี ฆีณ เบ, ดีหล็อห เบ. 18แกวะ แตห อึณ ลึห ดี อี ลอง ยืน เบ ปี ดี โฮม. แตห มี เฌาพรา นับ ลอง อัน ตี. เฌาพรา ตู แตห อี ยึร อัน. อัน ยี นับ ดี ยึร ปี ตู ปึอน ยึร อี เฮา. อัน ดี บอ แตห ปี ยืน เบ ปี ดี โฮม วี แบน อาฆยึร ดี เบ.”

ลอง น็อห ซี ปึอน แบน โมยว แบน โมยว

19แฮะ ฮอต กาลาง โฆรห ตี, เฌา เยซู วี ต็อห, “แกวะ กาฌูะ อูน โกรวกราม แบน โมยว แบน โมยว ปี ปึอน โฮม มาวัะ, ปี ปึอน โฮม เอียงเรียห. แกวะ อูน โกรว ปี ปึอน อี ดี ปรา. 20เบ ยี โลว โบง แตห อึณ ปี เบ อูน โกรวกราม แคง มืง ฆางหราว. โกรวกราม ฌึร ตี อาว มูห โมยว ปี ปึอน โฮม มาวัะ เฆ เอียงเรียห. โดง ปี เบลห อูน เบ ฌึร ตี, ดา ปรา อาว ปึอน ตัห ลึบ, อาว ปึอน ปรา. 21โคว, โดง อูน เบ โกรวกราม เบ, บอ น็อห เบ ดี บอ นัมโหลห ดี ตี เซเซ.

22งาย เบ ดูอี, อึณ ปี เงา อี แตห บลาง ดี โดว โบ็ง บอ โดว. เซ งาย เบ แฮะ ลึห ซีคยา, อึณ ปี, บลาง แฮะ โนะ แคง โดว เบ บอ โดว. 23เซ งาย เบ ยี ลึร, อึณ ปี, อี อับ ว็อง แฮะ โนะ แคง โดว เบ บอ โดว. โคว, อึณ ปาย นี. เซ เฌาพรา ซี แตห บลาง อัน ลึบ แคง โดว เบ, เซ เบ ยี ตู คัม, อาว ฮู มึห มาเซ อี แป ดี แตห บลาง อัน ลึห ดี เบ.

24อาว มึห ดูอี อี ปึอน แบน หมาย ดา กาณา อา วี. เซ อัน ร็อก อู วี, อัน ดี วี ฌ็อง ปอ อู วี. เซ อัน บอ โทม โฆรห อู วี, อัน ดี แวน โฆรห ปอ วี. ปาย ตี บอ เบ ตู ปึอน โดบ ซีคยา เฌาพรา บอ โบง แบน โมยว แบน โมยว แตห เบ ปึอน กืน รึอน.

25โคว อัน ตี โอว วี ต็อห ดี เบ, แกวะ แตห เบ มึห น็อห กาฮัวะ ลอง อาซาก เบ. แกวะ แตห น็อห เบ กาฮัวะ ลอง ปี ดี โฮม ปี ดี ตา เบ. โคว, อาซาก เบ, อาเร อัน แฮะ ตาง หลึอม ปี ดี โฮม เบ. บอ โดว โบ็ง เบ, อาเร อัน แฮะ ตาง หลึอม ครึง ปี ดี ตา เบ. 26แตห เบ ยอด มาซีม อี กอย แคง เบลณ. เฆ ตู ซัม มาเซ. แฮะ ฮอต, เฆ ตู วี โซะ มาเซ. เฆ มืร ตู อูน ปี ดี โฮม เฆ แคง บูะ โหงว. เฌาพรา อี ปี ฆูณ เฆ, อี กอย ฆางหราว, อัน ยี เฮียง เฆ โฮม. อึณ ยี มูห เบ, ง็อห เบ แฮะ ตาง หลึอม ง็อห มาซีม. 27อาว มึห ดูอี อี ปึอน โบง แตห อาซาก อัน วี โต็ง ปอ อึณ ปัว โกบ มึห อัน น็อห กาฮัวะ. อาดา อู นารี มืร อัน ตู แป ดี ปีโต็ง อาซาก อัน.

28เซ อึณ ปาย ตี, เหมา อึณ ปาย ปี มึห เบ น็อห กาฮัวะ ลอง ครึง ปี ดี ตา เบ? แตห เบ ยอด โบห คัมซอน อี ลัต แคง แปร. เฆ ตู รัณ, ตู บัด เซณ เฆ. 29โอว ต็อห ดี เบ, คูนดีคัม อาซาโลวโมว ตึอน, อัน มึห อาพูง ดังโคว ตาง. ครึง ปี ตา อัน แฮะ ชีด กาเซา, ยี ตู ชีด ปี โบห อู โบ็ง ตี. 30เปต แฮะ กอย อาตึร. แคหณา เงา วี กาซึม เปต ตี. เซ เฌาพรา แตห โบห เฆ เปต ชีด แคะ ตี, แตห เบ นับ ซีคยา, อัน ดี บอ ดัว ครึง ปี ดี ตา ดี เบ, แตห อึณ หลึอม ตี. อึย เบ ดูอี, เหมา อึณ ปาย ปี หณึม เบ อี แจก แคง น็อห เบ? 31โคว, แกวะ แตห เบ มึห น็อห แหม ต็อห, ‘มาเซ ปี ดี โฮม เย?’ บอ ‘มาเซ ปี ดี ตา เย?’ 32อึณ มูห เฆ ดูอี อี ตู นับ เฌาพรา, เฆ มึห น็อห ซี ปึอน ฌึร ตี ดอน โมยว. อึณ ยี มูห เฌาพรา, อี ปี ฆูณ เบ, อี กอย ฆางหราว, อัน แฮะ นับ ซีคยา, เบ โลว โกรว ฌึร ตี. 33อาต โบง เบ แบน โมยว แบน โมยว, เบ โลว โฆยวฆยา ดี โบง อี โดบ น็อห ซืร น็อห หมาน ปี ดัว เฌาพรา. เบ บอ โลว โฆยวฆยา ดี โบง ดอน โมยว อี ดี แตห เฌาพรา อึบ กาดาย. เซ เบ โบง ปาย ตี, ปี ดี โลว เบ ดอน โมยว, เบ ดี บอ ปึอน โตต ดอน โมยว. 34โคว อัน ตี แกวะ แตห เบ มึห น็อห กาฮัวะ ลอง ปี ดี โลว เบ แคหณา. เซ เบ กาดูห ดูก อาตึร, เฌาพรา นับ ดี จอย, แตห เบ กาแคณ มี อาตึร. ปา แคหณา อึณ บอ ปาย ตี.”

Currently Selected:

มท 6: pce

Highlight

Copy