มท 14

ลอง ดา ซารา อายอฮาน แฮะ ยัม

1วาย อัน ตี อึณ มูห คูนดีคัม อาเฮโรด ตึอน. อัน มูห ดา กาณา อี อึบ พวน มืง. อัน บอ นับ แบน โมยว แบน โมยว ปี กาลาง เฆ ดูอี ลอง เฌา เยซู. 2อัน วี ต็อห ดี แดเจณ อัน, “ดา ซารา อายอฮาน อี จึบ ดูอี แคง อึม ตึอน, อัน แฮะ ฮอต ยัม. โอว ยี ทาง อาเยซู ตี, อัน มูห ดา ซารา อายอฮาน ตึอน, อี แฮะ วี ยีต วี อีม. โคว, อาเยซู ตี, อัน มึห ปวน อี แตห อัน โบง นา หมึอม อาม กาเซา แบน โมยว แบน โมยว.”

3อาเฮโรด แฮะ กาลาง โฆรห ตี โกบ โหลห อัน ปี ดึอม โบง อัน ดี อายอฮาน ตึอน. อาเฮโรด แฮะ ดึอม จัร อี เหมต ปัก อายอฮาน, วี คร็อง อัน แคง กาปึม. อัน แฮะ โบง ปาย ตี โกบ โฆรห ปี ดึอม กาลาง อายอฮาน ดี อาเฮโรด ลอง นาง เฮโรวดี ตึอน. นาง เฮโรวดี แฮะ ดึอม มูห อีบึณ วา อาเฮโรด อี จืร อาพีลีบ. อาเฮโรด ยี วี พาด นาง ตี, แตห อัน แบน อีบึณ อัน. 4โคว อัน ตี อายอฮาน แฮะ วี กาลาง ดี อาเฮโรด, “ปี โบง แม, อึณ ตู โดบ ดารา. อาว ปึอน พาด อีบึณ วา แม, แตห อัน วี แบน อีบึณ แม.” 5โกบ อึณ ปาย ตี, อาเฮโรด ซี ง็อห อายอฮาน. อัน ยี ตู ยัะ โบง. อัน โยว เฆ ดูอี กืน. เฆ ทาง, อายอฮาน มูห ดูอี อี บยาน โฆรห เฌาพรา.

6ดอ กอย อายอฮาน แคง กาปึม ตึอน, อึณ ฌัม ซีแง โบง เฆ บลอย โหลห ซีแง ฆึอด อาเฮโรด. ดอ อัน ตี อึณ มูห ฆอน อีบึณ นาง เฮโรวดี ตึอน. อัน ตัห ลึบ บลอย ตี บอ ฆา ดี อาต แคต ดอน อี. อึณ บอ ล็อะ น็อห อาเฮโรด.

7โคว, อัน ดืง ต็อห ดี ฆอน ตึอน, “แตห แม หมาณ แคะ ปี ซี ปึอน แม. เซ โอว ตู ดัว ปี หมาณ แม, แตห กาดาย หณอด โอว.” 8วาย อัน ตี มา อัน วี กาลาง ดี ฆอน อีบึณ ตึอน ปี โลว หมาณ อัน. แฮะ ฮอต อัน วี ฮาว ดี อาเฮโรด ต็อห, “แตห แม ดึห ฆีณ ดา ซารา อายอฮาน, อี จึบ ดูอี แคง อึม ตึอน. แตห แม เบลห แดง พาน, ดัว ดี โอว.” 9อัน แฮะ ฮอต กาลาง โฆรห ตี, อาเฮโรด บอ กลึร. โกบ ดืง อัน ดี อาต แคต อัน, อัน ยี ดัว อามีง, แตห เฆ โบง ปี อึง ฆอน อีบึณ ตี. 10อัน บอ จัร เฆ ฮาว แคง กาปึม, แดบ ฆีณ อายอฮาน ตึอน. 11แฮะ ฮอต, เฆ เบลห ฆีณ อายอฮาน แดง พาน, วี ดัว ดี ฆอน อีบึณ ตึอน. ฆอน ตึอน วี ดัว ฆีณ ตี ดี มา อัน. 12เฆ ดีแบ อายอฮาน ยี ตัห ดีบ โดว โบ็ง อัน. แฮะ ฮอต, เฆ วี ฮาว โดง กอย เฌา เยซู, วี แค ดี อัน ลอง อัน ตี.

ลอง เฌา เยซู เฮียง ดูอี พัน แหรณ วี แตห เฆ โฮม แพ

13เฌา เยซู แฮะ ฮอต นับ ลอง ดา ซารา อายอฮาน ตึอน, อัน วี ลึบ แคง รึร, วี ฮาว ปอ อู โปละ โดง ตู มึห ดูอี. เฆ ดูอี กืน ยี นับ ลอง อัน ตี, เฆ วี เลห แคง มืง เฆ, วี ฮาว ดี เปลา, โดบ เฌา เยซู, แตห เฆ วี ฌัม โดง กอย อัน. 14ดอ เลห เฌา เยซู แคง รึร, อัน วี ยึร เฆ ดูอี กืน บอ วี กาเว เฆ. โคว, อัน วี ปีแกน ดูอี เซา อี แฮะ ตัห โดบ อัน.

15บา ดี อับ, เฆ ดีแบ อัน วี ตัห ต็อห ดี อัน, “ดี นี มูห โดง ตู มึห มาเซ. อาว เหลณ แปร ดี อับ. แตห แม จัร เฆ ฮาว แคง เรา อี กอย กาตัด ดี นี, แตห เฆ ปึอน ดี ฮาว จึห ปี ดี โฮม เฆ.”

16เฌา เยซู วี ต็อห, “เฆ ตู โลว เลห โดง กอย เอ นี. แตห เบ ดัว ปี ดี โฮม ดี เฆ.” 17เฆ วี ต็อห, “เย มึห แคะ คามูน พัน โบ็ง บอ มาฆา อา โดว.” 18เฌา เยซู ต็อห, “แตห เบ ดึห ปี ดี โฮม ตี, ดัว ดี โอว.”

19แฮะ ฮอต, อัน วี จัร ดูอี กืน เฆ ตี, แตห เฆ ตูต แดง เปต. ปัน ตี อัน วี ดึห คามูน พัน โบ็ง บอ มาฆา อา โดว ตึอน, วี ซากึห ยอด ฆางหราว, วี กาลาง ฆูง เฆฌู ดี เฌาพรา. แฮะ ฮอต, อัน วี กาบัก คามูน, วี ดัว ดี ดีแบ อัน, แตห เฆ วี กาซาง ดัว ดี ดูอี กืน เฆ ตึอน. 20ปาย ตี, เฆ บอกาเฆลียด ปึอน ดี โฮม แพ. เฆ ดีแบ อัน วี แฆบ กาฌูะ กาโลย โฮม แคง กาแตบ, กอ ปึอน ฆึร ดี อา กาแตบ. 21เฆ ดูอี อี โฮม รึม มึห อีมาย กาบัก พัน แหรณ วี, อาว บาะ อีบึณ เฆ ฆอน.

ลอง เฌา เยซู ฮาว แดง อึม

22เฆ ดูอี กืน แฮะ ฮอต โฮม แพ, เฌา เยซู วี จัร ดีแบ อัน ลึบ แคง รึร อู เฌณ, แตห เฆ ป็อะ ฮาว บลาก นา ตัะ. อัน แตห เฆ แยต ดี อาต. ดอ ฮาว เฆ, อัน ต็อห ดี จัร บอ ดูอี กืน เฆ ตึอน วีว โดง กอย เฆ. 23เฆ แฮะ ฮอต วีว, อัน บอ วี โฮะ แดง นอน, แตห อัน ปึอน ดี กอย อัน อู วี, ซาคึร ดี เฌาพรา. อัน บอ กอย โดง ตี ดอ แฮะ อับ แปร. 24รึร ปี ป็อะ เฆ ดีแบ อัน, อึณ แฮะ กอย กาแต อึม. คูน ดียูห รึร โกบ โลว ฮาว เฆ นา กอย คูน.

25ซีณวัห เจว, แปร หณัม บลาง, เฌา เยซู วี ฮาว ฌัม โดง กอย เฆ. อัน บอ ฮาว แดง อึม. 26เฆ ดีแบ อัน บอ ยึร เฌา เยซู ดอ ตัห อัน ฮาว แดง อึม, เฆ บอ โยว กาเซา. เฆ วี ต็อห, “อึณ มูห กาเปรา.” เฆ บอ ดัด ตาง โกบ โยว เฆ.

27เฌา เยซู ต็อห ดี เฆ อู เฌณ, “แกวะ โยว. อึณ มูห โอว. แตห เบ ดาคึย.”

28อาเปตารู ยี ต็อห, “แม เฌา, เซ แฮะ มูห แม มืร, แตห แม แดะ โอว ตัห ดี แม, แตห บอ โอว ฮาว แดง อึม.”

29เฌา เยซู ต็อห ดี อัน, “ตัห.” ปัน ตี อาเปตารู บอ เลห แคง รึร, วี ฮาว แดง อึม, ฮาว ดี เฌา เยซู. 30อัน ยี ยึร คูน บูด. อึณ แตห อัน โยว. ดอ อัน ตี อัน แกร ดี เจต แคง อึม. อัน วี ดัด ต็อห, “แม เฌา, คยอด โอว.”

31เฌา เยซู วี ปา แด อัน อู เฌณ, วี ต็อห, “แม มูห ดูอี อี หณึม อี แจก, เหมา อึณ ปาย ปี แบน น็อห กาลีง กาแล ดี แม?”

32วาย อัน ตี ฆาย วี ลึบ แคง รึร. คูน บอ วี เยน. 33เฆ อี กอย แคง รึร, เฆ วี กรึบ อัน. เฆ ต็อห, “แฮะ มูห แฮะ หมาน, แม มูห ฆอน เฌาพรา.”

34เฆ แฮะ ฮอต ป็อะ รึร, เฆ วี คยัะ ดี มืง เกเนซาเรด. 35เฆ ดูอี อี กอย แคง มืง ตี บอ นับ, แฮะ มูห เฌา เยซู อี แฮะ ตัห, เฆ วี จัร ดอน อี แตห เฆ วี กาลาง ดี อี เฮา, แตห เฆ ดูอี บอ มืง กอ นับ. เฆ วี ตัห ตึย ดูอี เซา อี กอย กาแต เฆ, แตห เฆ ตัห ฌัม โดง กอย เฌา เยซู. 36เฆ หมาณ อัน ควาง แตห ดูอี เซา ปา ครึง อัน. แฮะ ฮอต, เฆ ดอน อี อี ปา ครึง เฌา เยซู วี แกน.

Currently Selected:

มท 14: pce

Highlight

Copy