มท 15

ลอง ฮีด เฆ ดูอี อายูดา

1อึณ ยี มึห ดูอี แคง พึง พารีแซ มัง อี บอ เฆ ดา ซารา อี มาโนว ดารา ยูดา มัง อี, เฆ แฮะ เลห แคง มืง เยรูซาแลม, วี ตัห ฌัม โดง กอย เฌา เยซู. 2เฆ ดีหมอด อัน ต็อห, “เหมา อึณ ปาย ปี แวน เฆ ดีแบ แม ฮีด ดา ตาง อี กอย ดอ มึอน? เฆ ตู บาย แด เฆ อาต โฮม เฆ โบม, แตห อึณ ปี ปี หมาณ ฮีด เอ. อาตี อาว หมึอม.”

3เฌา เยซู วี ต็อห, “เซ อึณ มูห เบ, เหมา อึณ ปาย ปี แวน เบ ดารา เฌาพรา โกบ โดบ เบ ฮีด เบ? บอ อาตี อาว หมึอม. 4โคว, เฌาพรา แฮะ ต็อห, ‘แตห เบ โรวเซ ฆูณ มา เบ.’ อัน บอ ต็อห, ‘อาเซ ดืง ฆูณ มา อัน, อัน โลว ยัม.’ 5เบ ยี ตู มาโนว ปาย ตี. เซ อึณ มึห ดูอี อู วี ต็อห ดี ฆูณ มา อัน, ‘ปี โลว ดัว โอว ดี บาย, โอว อาว ฮู มึห ดี ดัว. โอว แฮะ ฮอต หลู ดี เฌาพรา,’ อัน ตู โรวเซ ฆูณ มา อัน. 6เบ ยี ต็อห, ปี โบง อัน แฮะ หมาน แฮะ มูห. ปาย ตี เบ นับ ดี แวน โฆรห เฌาพรา, ยี โดบ ฮีด เบ. 7เบ มูห ดูอี ณึงราง บอด. อาอีซายัะ แฮะ กาลาง โฆรห หมาน ดอ ต็อห อัน ลอง เบ,

8‘มี โมต เฆ ต็อห, เฆ โรวเซ โอว. แคง น็อห, เฆ ยี ตู นัมโหลห โอว. 9เฆ กรึบ โอว ปีเยณ. ปี มาโนว เฆ, อึณ ตู มูห ดารา โอว. อึณ มูห ดารา ปี โบง เฆ ดูอี.’”

10เฌา เยซู แฮะ ฮอต กาลาง โฆรห ตี ดี ดา ตาง ตึอน, อัน วี แดะ เฆ ดูอี กืน, แตห เฆ โทม โฆรห อัน. อัน วี ต็อห, “เบ โทม, แตห อึณ บอ ลึห ดี น็อห เบ. 11ปี ดี โฮม อี ลึบ แคง โดว โบ็ง, อึณ ตู แป ดี โบง แตห ดูอี ตู บอด. อึณ ยี มูห ปี กาลาง อัน, อี เลห แคง น็อห อัน, ฌึร ตี แตห ดูอี มึห หมาบ, แบน ดูอี ตู บอด.”

12เฌา เยซู แฮะ ฮอต ต็อห ปาย ตี, เฆ ดีแบ อัน วี ตัห โดง กอย อัน, วี ต็อห, “แม แฮะ ยึร, เฆ ดูอี แคง พึง พารีแซ, เฆ ตู อึง โฆรห แม ตี?”

13เฌา เยซู วี ต็อห, “เซ อึณ มึห ดูอี อี ตู มาโนว ซีคยา ลอง เฌาพรา, เฌาพรา ดี แวน โฆรห ดูอี ตี, แตห อึณ ปี ดูอี อี รึต แวน เดา ปี ตู ซัม อัน, แตห บอ เดา บอ เรียห อัน เลห, แตห อึณ ชึม. 14เบ ตู โลว โทม โฆรห เฆ ดูอี แคง พึง พารีแซ ตึอน. เฆ ปี ดูอี งาย อับ อี เทว ดี แยต อี เฮา. เซ ดูอี งาย อับ ต็อห ดี แยต ดูอี งาย อับ ปอ อู วี, ฆาย บอ อา วี ดี โจห แคง กาเดา.”

15อาเปตารู วี ต็อห, “แตห แม กาลาง ดี เย ลอง ดาง อูพามา ตี.”

16เฌา เยซู วี ดีหมอด เฆ ต็อห, “เหมา อึณ ปาย ปี ตู มึห เบ อางยาน? 17เหมา อึณ ปาย อึณ ตู ลึห ดี เบ ลอง โฆรห โอว ตึอน? มาเซ อี ลึบ แคง วัต, อึณ วี เลห แคง วัต. 18อึณ ยี มูห โฆรห อี เลห แคง โมต อี, อึณ บอ เลห แคง น็อห. โมยว อี เลห แคง น็อห ตี, อึณ แตห ดูอี ตู บอด. 19เซ ดูอี เฌณฌา นา ตู หมึอม, เซ เฆ ซี ง็อห แวน อี เฮา, ลูต อีบึณ อี, โบง หมึอม กาอีห, ปรา โกรว อี, แบน ซักเซ อี กาโลว, กาลาง โฆรห ตู หมึอม ลอง อี, 20ปี โบง เฆ ฌึร ตี, อึณ เลห แคง น็อห อี, แตห ดูอี ตู บอด. เซ ดูอี ยี ตู บาย แด อัน อาต โฮม อัน โบม, อึณ ตู แตห อัน แบน ดูอี อาว บอด.” แคะ ตี เฌา เยซู วี กาลาง ดี ดีแบ อัน.

ลอง อีบึณ อี หณึม ซีคยา เฌา เยซู

21วาย อัน ตี เฌา เยซู เลห โดง กอย อัน ตึอน, วี ฮาว ฌัม กาตัด มืง ทูโรว ฆาย มืง ซีโดน. 22อึณ ยี มึห อีบึณ อู วี, อัน มูห ดูอี อาโมยว กานัณ อี กอย กาตัด โดง ตัห เฌา เยซู. อัน วี ตัห โดง กอย เฌา เยซู วี ต็อห ดี อัน, “แม เฌา, แม มูห หลูกหลาน อาดาวีด ตึอน,#15:22 เฆ ดูอี บาน ดอ อัน ตี เฆ แฮะ นับ, อึณ ดี มึห หลูกหลาน อาดาวีด อู วี อี มูห อัน เฌา เมดตา แตห แม กาเว โอว. ฆอน อีบึณ โอว มึห กานัม แคง โดว อัน. กานัม ตี ดัว ดูก แบน โมยว แบน โมยว ดี อัน.”

23เฌา เยซู ตู เวียะ โฆรห อัน ตี. ปัน ตี ดีแบ อัน วี ตัห ดี อัน ต็อห, “แตห แม กาลาง, แตห อัน เวณ. โยว อัน โดบ เอ, ดี บอ แดะ แม เซเซ.”

24เฌา เยซู วี ต็อห, “เฌาพรา แฮะ ตึย โอว แตห โอว จอย มี เฆ ดูอี อีซาเรลัะ. เฆ ปี มาบู อี โบยห.”

25อีบึณ ตึอน ยี ตัห, ครึบเครา ดี อาต เฌา เยซู. อัน ต็อห, “แม เฌา, จอย โอว.”

26เฌา เยซู วี ต็อห ดี อัน, “ปี ดี โลว ดัว ฆอน โฮม, อาว กาอาบ ดัว มาโซว โฮม.#15:26 บาน ดอ อัน ตี ดอน อี แฮะ นับ, เฆ ดูอี อายูดา ปี ฆอน, เฆ ดูอี อาโมยว เฮา ปี มาโซว ปาย ตี บอ โอว อาว กาอาบ จอย ดูอี อี ตู มูห อาโมยว อีซาเรลัะ.”

27อีบึณ ตึอน วี ต็อห, “โฆรห ปี กาลาง แม เฌา ตี แฮะ หมาน. มาแล, มาโซว ยี ปึอน บัร ดี เลียะ โฮม โบม บรัด ดา กาณา อัน.”

28อัน แฮะ ฮอต กาลาง โฆรห ตี, เฌา เยซู วี ต็อห, “อึย ฆึณ, แม แฮะ หณึม ซีคยา. อึณ ดี แบน แคะ ปี หมาณ แม ดี โอว ตี.” ซีณ ดอ กาลาง เฌา เยซู โฆรห ตี, ฆอน อีบึณ อัน ตึอน แฮะ แกน อู เฌณ.

ลอง เฌา เยซู เฮียง ดูอี พวน แหรณ วี

29วาย อัน ตี เฌา เยซู เลห โดง กอย อัน ตึอน. บอ อัน บอ ดีแบ อัน วี ฮาว ฌัม ดี โคบ อึม ดึง ฆาลีเล. แฮะ ฮอต, อัน วี โฮะ ตูต แดง นอน. 30อึณ วี มึห ดูอี กืน กาเซา, เฆ วี ตัห โดง กอย อัน, วี ตึย เฆ ดูอี เซา บอ ดูอี เปลา ยัม, ดูอี งาย อับ, ดูอี เช, ดูอี ตู ปึอน กาลาง โฆรห บอ เฆ ดูอี มึห เซา แบน โมยว แบน โมยว. เฆ ตัห ตึย ดูอี ฌึร ตี, แตห เฆ ฌัม ดี อาต เฌา เยซู. อัน มืร แตห เฆ แกน ดอน อี. 31เฆ ดูอี กืน ยี ยึร เฆ ดูอี ตู ปึอน กาลาง โฆรห, เฆ วี กาลาง ซีคยา. เฆ ดูอี เช วี ซีคยา, เฆ ดูอี เปลา ยัม วี ปึอน ฮาว, เฆ ดูอี อี งาย อับ วี ปึอน ยึร. แคะ กอย เฆ อี ยึร ลอง อัน ตี, เฆ วี อาม กาเซา, วี อืบ เฌาพรา อี มูห เฌาพรา ปี กรึบ เฆ ดูอี อีซาเรลัะ.

32ปัน ตี เฌา เยซู วี แดะ ดีแบ อัน แตห เฆ ตัห กาตัด อัน. อัน วี ต็อห ดี เฆ, “โอว กาเว เฆ ดูอี อี กอย ดี นี. เฆ แฮะ โดบ โอว อาดา โอย ซีแง. เฆ ยี ตู มึห ดี โฮม มาเซ. โอว ตู ซี แตห เฆ เวณ กาง เฆ ดอ กาปราณ เฆ ปี ดี โฮม. โยว เฆ ดีหลัห เกห ดอ ฮาว เฆ โดบ อึณเตณ.”

33เฆ ดีแบ อัน วี ต็อห, “โดง กอย เอ นี แฮะ กาโต็ง มืง. แคง แปร กาฮ็อห นี, เหมา เอ ดี ปาย ดี จึห ปี ดี โฮม แคะ ปี โลว เอ, แตห เฆ ดูอี กืน โฮม แพ?” 34เฌา เยซู วี ดีหมอด ต็อห, “คามูน หนาง โบ็ง เบ มึห?” เฆ วี ต็อห, “บู โบ็ง. บอ มาฆา ดีแตด มัง โดว แฮะ มึห.” 35ปัน ตี เฌา เยซู จัร เฆ ดูอี กืน แตห เฆ ตูต แดง กาดาย.

36อัน บอ วี ดึห คามูน บู โบ็ง บอ มาฆา ตึอน, วี ดาง ฆูง เฆฌู ดี เฌาพรา, วี กาบัก คามูน เฆ มาฆา. แฮะ ฮอต, อัน วี ดัว ดี เฆ ดีแบ อัน, แตห เฆ วี ดัว โตต ดี ดูอี กืน. 37เฆ บอกาเฆลียด วี ปึอน ดี โฮม แพ. แฮะ ฮอต โฮม, เฆ ดีแบ เฌา เยซู วี กาฌูะ กาโลย โฮม เฆ, กอ โนะ บู คอน. 38อึณ บอ มึห อีมาย พวน แหรณ อี โฮม แพ. ตู ตีห อีบึณ เฆ ฆอน. 39ปัน ตี เฌา เยซู จัร เฆ ดูอี กืน เวณ กาง เฆ. แฮะ ฮอต, อัน วี ลึบ แคง รึร, วี ป็อะ ฮาว แตห อัน ฌัม กาตัด มืง มาฆาดาน.

Currently Selected:

มท 15: pce

Highlight

Copy