มท 13

ลอง ดูอี บรัด ซีมา โหงว

1ซีแง ตี, เฌา เยซู วี เลห แคง กาง ตึอน, วี ฮาว ฌัม โคบ บาง อึม, วี ตูต ดี ตี. 2อึณ ยี มึห ดูอี กืน กาเซา ตัห กาฌูะ, กอย กอ โรบ อัน. โคว, อัน วี ลึบ ตูต แคง รึร, แตห เฆ ดูอี กืน กอย ดี โคบ อึม. 3แฮะ ฮอต, อัน วี กาลาง อูพามา แบน โมยว แบน โมยว ดี เฆ. อัน ต็อห, “อึณ แฮะ ดึอม มึห ดูอี อู วี, อัน ฮาว บรัด ซีมา โหงว. 4ดอ บรัด อัน ซีมา โหงว ตึอน, ซีมา โหงว มัง โบ็ง โจห ดี โคบ อึณเตณ. มาซีม บอ ตัห โฌะ โฮม อู เฌณ. 5ซีมา โหงว มัง โบ็ง บอ โจห แดง มาว, อี มูห กาดาย ดีเหรว นา แดง. อึณ บอ ลัต อู เฌณ โกบ ดีเหรว กาดาย. 6ซีแง ฮี ซอดาด, อึณ บอ แกร ดี เฮียะ. โคว, เรียห อัน ตู ปึอน ดี ฮาว แคง กาดาย. 7ซีมา โหงว มัง โบ็ง บอ โจห แดง กาดาย อี มึห เดา มาอาต. เดา มาอาต ยี แกร ดี ตาง, วี ยาบ โหงว, ตู แตห อึณ มึห กาโย็ง อัน. 8ซีมา โหงว มัง โบ็ง บอ โจห แดง กาดาย บอด, แตห อึณ แบน โหงว กามาย อี เลห อู มาย็อห บูน, เดา ฆึร บูน บอ โอย ฆึร บูน. 9อาเซ มึห โหยะ อี นับ ดี โทม, แตห อัน โทม โฆรห โอว นี.”

10เฌา เยซู แฮะ ฮอต กาลาง โฆรห ตี, เฆ ดีแบ อัน วี ตัห เครียะ อัน. เฆ วี ดีหมอด อัน ต็อห, “ดอ มาโนว แม เฆ ดูอี กืน, เหมา อึณ ปาย ปี กาลาง แม โฆรห อูพามา ดี เฆ?”

11เฌา เยซู วี ต็อห, “โอว แฮะ แตห เบ นับ ซีคยา ลอง อาคราว ปี ดี อึบ เฌาพรา กาดาย นี. ปี ตู ดึอม นับ อาเซ, โอว แฮะ แตห เบ นับ. อาว มูห เฆ ดูอี กืน อี ดี นับ ลอง อัน ตี. 12อาเซ ซี นับ ซีคยา ลอง เฌาพรา, อัน ดี บอ แกร ดี นับ กาปัว, แตห อัน ปี ดูอี อี ปึอน กืน กาเซา โกรว อัน. อาเซ ยี ตู มึห น็อห ซี นับ ลอง เฌาพรา, อัน ดี บอ ปีว โตต ดอน โมยว ปี ดึอม โทม อัน ลอง อัน ตี, แตห อึณ ปี, อี เฮา ดี ตัห ดึห แวน โกรวกราม อัน. 13โคว, โอว กาลาง ดี ดูอี กืน, แตห อึณ แบน อูพามา. ปาย ตี เฆ แฮะ ปึอน ยึร, ยี ตู ลึห ซีคยา ดี เฆ. เฆ บอ ปึอน โทม โฆรห, ยี ตู กาหลูห ดี น็อห เฆ.

14ลอง เฆ ดูอี ฌึร ตี อาอีซายัะ ตึอน แฮะ ดึอม แดม อูน ต็อห, ‘เบ ดี บอ โทม เซเซ, อึณ ยี ตู ลึห ดี น็อห เบ ดอ เหมา. เบ ดี บอ ยอด เซเซ, ยี ตู ยึร ซีคยา ดอ เหมา. 15โคว, น็อห เฆ ดูอี ตี แฮะ ดืร, ตู นับ ดี บยอง. โหยะ เฆ ตู บอ นับ ดี โทม. เฆ บอ กาบีด งาย เฆ, ตู แตห เฆ ยึร. เซ เฆ ตู โบง ปาย ตี, อึณ ดี บอ ลึห ดี งาย เฆ. เฆ ดี บอ ปึอน ดี โทม, แตห อึณ ซีโบรห. แฮะ ฮอต, อึณ ดี บอ ลึบ แคง น็อห เฆ, แตห เฆ บยอง น็อห เฆ. เซ เฆ โบง ปาย ตี, โอว ดี บอ บลัวะ แวน หมาบ เฆ, แตห อึณ ปี ดูอี เซา แฮะ แกน.’ แคะ ตี แฮะ แดม อูน แคง บับ เฌาพรา.

16อี มูห เบ, เบ แฮะ ดาคึย. โคว, งาย เบ แฮะ ปึอน ยึร. โหยะ เบ แฮะ นับ ดี โทม, แตห อึณ กอ ลึบ แคง น็อห. 17โอว ต็อห อาคัร ดี เบ, คา อาต แฮะ ดึอม มึห ดูอี อี บยาน โฆรห เฌาพรา บอ เฆ ดูอี อี มึห น็อห หมาน, เฆ กืน ซี ยึร ปี ปึอน ยึร เบ ดอ ตี นี. เฆ ยี ตู ปึอน ยึร. เฆ บอ ซี โทม โฆรห ปี โทม เบ ดอ ตี นี. เฆ ยี ตู ปึอน ดี โทม โฆรห ฌึร ตี.

18แตห เบ วี โทม ลอง ดาง อูพามา แปะ แฮะ แค โอว ลอง ดูอี บรัด ซีมา โหงว. 19เซ อึณ มึห ดูอี โทม โฆรห ลอง เฌาพรา ดี อึบ กาดาย, อึณ ยี ตู กาหลูห ดี น็อห อัน, กานัม ฮาย วี ตัห, วี ดึห แวน โตต อี แฮะ ลึบ แคง น็อห อัน. อาตี, อึณ ปี ซีมา โหงว อี โจห โคบ อึณเตณ. 20ซีมา โหงว อี โจห แดง มาว อี มึห กาดาย ดีเหรว นา แดง, อึณ ปี ดูอี อี โทม โฆรห เฌาพรา. แฮะ ฮอต, อัน บอ ดาคึย ดี แตห โฆรห เฌาพรา ลึบ แคง น็อห. 21โกบ ดีเหรว กาดาย, เรียห โหงว ตู อัห. อึณ ปึอน กอย อู กาจัน. อึณ ปี, ดูอี อี โทม วี กาดูห ดูก โกบ หณึม อัน โฆรห เฌาพรา ตี. โคว, อัน วี แวน โฆรห ตี, อาว ฮู หณึม. 22ซีมา โหงว อี โจห แดง กาดาย อี มึห เดา มาอาต, อึณ ปี ดูอี อี โทม โฆรห เฌาพรา. แฮะ ฮอต, อัน วี มึห น็อห กาฮัวะ ลอง ปี ดี โลว อัน, ปี ดี โฮม ปี ดี ตา อัน. อัน ดี บอ กาพา กาลึบ. อัน ทาง, เซ อัน โฆยวฆยา ดี โบง แบน โมยว แบน โมยว อี แตห อัน ครัม, อึณ ดี แบน น็อห ดาคึย ดี อัน. ปี โบง อัน ฌึร ตี, อึณ ตู แตห โฆรห เฌาพรา กอย แคง น็อห อัน, ตู แบน อาฆยึร ดี อัน. 23อาเซ อี ปี ซีมา โหงว อี โจห แดง กาดาย บอด, อัน มูห ดูอี อี โทม โฆรห เฌาพรา, แตห อึณ กอ กาหลูห ซีคยา ดี น็อห อัน. แฮะ ฮอต, โฆรห ตี วี แบน อาฆยึร อี ปี ซีมา โหงว อี มึห เฆา อัน อู มาย็อห บูน, เดา ฆึร บูน เฆ โอย ฆึร บูน.” แคะ ตี เฌา เยซู แค ลอง อาบึม ตี.

ลอง เปต อี ลัต

24เฌา เยซู แฮะ ฮอต กาลาง ลอง ซีมา โหงว, อัน วี กาลาง อูพามา ปอ อู โมยว. อัน ต็อห, “มืง ปี อึบ เฌาพรา, อึณ ปี ดูอี อู วี อี บรัด ซีมา โหงว อี หมึอม แคง โดง นา อัน. 25อัน แฮะ ฮอต โบง ปาย ตี, แคง หมึร ดอ แฮะ อีด เยน ดอน อี, อึณ ยี มึห รันซู อัน, วี ตัห บรัด ซีมา เปต กาแต โหงว อี หมึอม. อัน แฮะ ฮอต โบง ปาย ตี, อัน วี เวณ โดง กอย อัน. 26โหงว ยี ลัต วี มึห กาโย็ง อัน. ดอ อัน ตี บอ เปต แฮะ ลัต. 27ยี มึห หมาย ดา กาณา โดง นา ตึอน. เฆ วี ตัห โดง กอย อัน วี ต็อห, ‘อึย ดา, เย ทาง แม แฮะ บรัด ซีมา โหงว อี หมึอม. ดอ ตี นี ยี มึห เปต อี ลัต. เปต ตี ตัห นา เหมา?’ 28อัน วี ต็อห, ‘รันซู เอ แฮะ บรัด เปต ตี.’ แฮะ ฮอต, หมาย วี ดีหมอด ต็อห, ‘แม ซี แตห เย ฮาว รัณ เปต ตี?’ 29อัน วี ต็อห, ‘แกวะ โบง มาเซ. โคว, เซ เบ ฮาว รัณ เปต ดอ ตี นี, เบ ดี บอ รึต เลห บอ เปต บอ โหงว. 30แตห เบ แตห บอ อา โมยว กอย, แตห อึณ กอ ฌัม อาคราว ดี โซะ โหงว. ฮี ฌัม อาคราว โซะ โหงว, แตห เบ จัร ดูอี โซะ โหงว, แตห เฆ กาย็อห โหงว ฆาย เปต, แตห เฆ ปัก กาฌูะ อึณโป็ง เปต, วี โดะ แคง เงา. แฮะ ฮอต, อี มูห โหงว, แตห เฆ วี กาฌูะ อูน แคง ฆรัว โอว.’”

ลอง กาอาง เดา เซียม

31เฌา เยซู แฮะ ฮอต กาลาง โฆรห ตี, อัน วี แค อูพามา ปอ อู โมยว. อัน ต็อห, “มืง ปี อึบ เฌาพรา, อึณ ปี กาอาง เดา เซียม อู โมยว. ดูอี อู วี ดึห กาอาง ตี, วี ฮาว ซัม แคง มาน อัน. 32ดอ ซัม ดูอี กาอาง เดา เซียม ตี, อึณ ดีแตด หลึอม ซีมา กาอาง โมยว เฮา. เซ อัน ฮี ลัต, ฮี ตาง, อึณ ดี วี แบน เดา อี ตาง หลึอม เดา ดอน โมยว. อึณ วี แบน ยวน, แตห มาซีม ปึอน ดี ตัห ดีเหลา แดง รา อัน.”

ลอง ซีนัม บรัห คามูน

33เฌา เยซู แฮะ ฮอต กาลาง ลอง อัน ตี, อัน วี แค อูพามา ปอ อู โมยว. อัน ต็อห, “มืง ปี อึบ เฌาพรา, อึณ บอ ปี ซีนัม บรัห คามูน. อึณ ปี, อีบึณ อู วี ดึห ซีนัม บรัห คามูน ตี, วี กาวัร แคง กาแปะ เคาคยูง โอย ซีลัยะ. อัน วี กาวัร แตห อึณ กอ ปราง กอ บรัห โตต กาแปะ ตี.”

34ปาย ตี ปี กาลาง เฌา เยซู ดอน โมยว, อึณ แบน โตต อูพามา. อัน ตู ต็อห มาเซ อี มูห โฆรห ซืร. 35ปี กาลาง เฌา เยซู, อึณ แฮะ แบน โตต ปี แปะ แฮะ ดึอม กาลาง ดูอี อี บยาน โฆรห เฌาพรา ลอง เฌา เยซู. อึณ ต็อห, “โอว ดี กาลาง โฆรห ดี ดูอี, แตห อึณ แบน อูพามา. ปาย ตี โอว ดี กาลาง ลอง ปี ตู ดึอม นับ ดูอี อู ซีณ ดอ โบง เบลห เฌาพรา กาดาย นี.”

ลอง เฌา เยซู กาลาง ลอง ดาง อูพามา อู โมยว

36เฌา เยซู แฮะ ฮอต กาลาง อูพามา แบน โมยว แบน โมยว, อัน วี เลห โดง กอย เฆ ดูอี กืน, วี ฮาว ลึบ แคง กาง. ดอ อัน ตี ดีแบ อัน วี ตัห กาลาง โฆรห ดี อัน. เฆ ต็อห, “แตห แม กาลาง ดี เย ลอง ดาง อูพามา, แตห อึณ กาหลูห ซีคยา ดี น็อห เย ลอง เปต อี ลัต กาแต โหงว.”

37เฌา เยซู วี ต็อห, “ดูอี อี บรัด ซีมา โหงว อี หมึอม, อัน ปี โอว, อี แฮะ แบน ฆอน ดูอี. 38กาดาย โดง บรัด อัน โหงว ตี, อึณ ปี ดอน นา ดอน โปละ แดง กาดาย นี. ซีมา โหงว อี หมึอม, อึณ ปี เฆ ดูอี อี ปึอน ดี ลึบ แคง มืง ปี อึบ เฌาพรา. เปต ตี ยี ปี เฆ ดูอี อี โดบ กานัม ฮาย. 39รันซู อี ตัห บรัด เปต ตึอน, อัน ปี โบว อี อึบ เฆ กานัม ฮาย. อาคราว ดี โซะ เฆ โหงว ตี, อึณ ปี อาคราว ดี โตต ฌาด นี. เฆ ดูอี อี โซะ โหงว, เฆ ปี อามู อามาด เฌาพรา.

40ดอ ฌัม อาคราว ดี โตต ฌาด นี, อึณ ดี ปี, เฆ กาฌูะ เปต ตึอน, วี โดะ แคง เงา. 41ดอ อัน ตี โอว อี แฮะ แบน ฆอน ดูอี, โอว ดี จัร อามู อามาด โอว, แตห เฆ ฮาว กาย็อห นา หมึอม บอ นา ตู หมึอม, แกวะ แตห นา ตู หมึอม มึห แคง มืง ปี อึบ เฌาพรา. บอ ดอน โมยว อี แตห ดูอี โบง หมาบ, บอ ดอน อี อี โบง นา ตู หมึอม, อาว ปึอน กอย แคง มืง ปี อึบ เฌาพรา. อึณ ปี เฆ ดูอี โซะ โหงว, เฆ ดี ดึห แวน เปต. 42อามู อามาด โอว, เฆ ดี ดึห ดูอี ตู หมึอม ฌึร ตี, โบง แตห เฆ โจห แคง เงา, แตห เฆ บอ ยาม ตาง, แตห กูงกาบ เฆ กอ กาดอย โกบ โยว เฆ. 43ดอ อัน ตี อึณ ยี มึห เฆ ดูอี อี แฮะ โบง นา หมาน เซเซ, เฆ ดี มึห อาพูง, มึห ซาเร แคง มืง ปี อึบ เฌาพรา, อี มูห ฆูณ เฆ. อาพูง ซาเร เฆ ตี อึณ ดี ปี ซีแง อี บลาง กาเซา. อาเซ นับ ดี โทม, แตห อัน โทม โฆรห นี.” แคะ ตี เฌา เยซู กาลาง ลอง ดาง อูพามา อัน.

ลอง โกรวกราม อี ง็อห กาเซา

44วาย อัน ตี เฌา เยซู วี ต็อห, “มืง ปี อึบ เฌาพรา, อึณ ปี โกรวกราม อี ง็อห กาเซา อี ปี ปี ดีบ ดูอี แคง มาน, แกวะ แตห อี ยึร. อึณ ยี มึห ดูอี อู วี, อัน วี กาดูห โกรว ตี. อัน วี เครียง ซีคยา, แกวะ แตห อาเซ ยึร. แฮะ ฮอต, น็อห อัน กอ โคย กาเซา. อัน วี เวณ ย็อง โตต โกรว อัน ดอน โมยว, วี ฮาว จึห มาน ตึอน, แตห บอ โกรวกราม ตึอน แบน โกรว อัน.

45มืง ปี อึบ เฌาพรา อึณ บอ ปี ดูอี อู วี อี ต็อห ดี จึห ปึอน มาฮอย อี บอด. 46อัน บอ ยึร ปึอน มาฮอย อี ง็อห กาเซา, อัน ฮาว ย็อง โตต ดอน โมยว อี มูห โกรวกราม อัน, วี จึห ปึอน มาฮอย ตี.”

ลอง อึณรับ อี เหมต มาฆา

47ปัน ตี เฌา เยซู แค อูพามา ปอ อู โมยว. อัน ต็อห, “มืง ปี อึบ เฌาพรา, อึณ ปี อึณรับ. เฆ ฮี บยัว อึณรับ ตี แคง อึม, มาฆา ปี ปึอน เฆ บอ มึห แบน โมยว แบน โมยว กอ โนะ นา แคง. 48แฮะ ฮอต เฆ ดูอี เหมต มาฆา ตึอน, เฆ วี ดืด เลห อึณรับ แคง อึม, แตห มาฆา กอ ฌัม ดี โคบ อึม. เฆ วี ร็อห มาฆา อี ซีคยา, วี ฮับ กาฌูะ อูน แคง คอน. มาฆา อี ตู หมึอม, เฆ ยี แวน. 49เซ ฌาด นี ฮี ดี โตต, เฆ อามู อามาด เฌาพรา, เฆ ดี บอ โบง ปาย ตี. เฆ ดี ตัห กาย็อห เฆ ดูอี ฮาย บอ เฆ ดูอี อี มึห น็อห ซืร น็อห หมาน. 50เฆ ดี บอ แวน ดูอี ฮาย, แตห เฆ กอย แคง เงา. แคง เงา ตี เฆ ดี ยาม ตาง. กูงกาบ เฆ ดี บอ กาดอย โกบ โยว กาเซา เฆ.”

51เฌา เยซู แฮะ ฮอต กาลาง อูพามา ฌึร ตี ดอน โมยว, อัน วี ดีหมอด เฆ ดีแบ อัน ต็อห, “เบ แฮะ นับ ลอง ดาง อูพามา ตี ดอน โมยว?” เฆ วี ต็อห, “แฮะ นับ.”

52ปัน ตี อัน วี แค อูพามา ปอ อู โมยว. อัน ต็อห, “เซ อึณ มูห ดูอี อี มาโนว ดารา เฌาพรา, เซ อัน แฮะ ฮอต เฮน ลอง ปี ปาย แคง มืง ปี อึบ เฌาพรา, อัน ปี ดา กาณา กาง. ดา กาณา กาง นับ ดี อูน โกรวกราม แบน โมยว แบน โมยว แคง กาง อัน. ปาย ตี, บอ มูห โกรว อี บรีม บอ โกรว อี กามาย, อัน แฮะ ปึอน วี ดึห เลห ดัว ดี อี.” แคะ ตี เฌา เยซู กาลาง ดี ดีแบ อัน.

ลอง ดูอี อี บยาน โฆรห เฌาพรา

53เฌา เยซู แฮะ ฮอต แค อูพามา ฌึร ตี ดอน โมยว, อัน วี เลห โดง กอย อัน ตึอน. 54อัน วี ฮาว ฌัม มืง บรีม อัน. อัน วี ฮาว ลึบ แคง โฌง กรึบ เฆ ดูอี อายูดา เฌาพรา, วี มาโนว ลอง เฌาพรา. เฆ ดูอี อี โทม โฆรห อัน, เฆ อาม กาเซา. เฆ ต็อห, 55“เหมา อัน ปาย ดี ปึอน อางยาน ฌึร ตี? ปวน อาเซ อึณ มูห, อี แตห อัน โบง นา หมึอม อาม กาเซา?” เฆ บอ ต็อห, “อัน มูห ฆอน ดา ลักซามา. มา อัน มูห นาง มารี. วา อัน เฆ บอ มูห อายาโกบ, อาโยวเซ, อาซีโมน บอ อายูดัด. 56บอ วา อัน อี มูห อีบึณ, เฆ กอย รึม โดบ เย. เหมา อึณ ปาย ปี นับ อัน อางยาน ฌึร ตี ดอน โมยว? อาเซ แฮะ มาโนว อัน?” 57โคว, เฆ ตู โรวเซ อัน. เฌา เยซู ยี ต็อห ดี เฆ, “เซ อึณ มูห ดูอี อี บยาน โฆรห เฌาพรา, เฆ ดี โรวเซ อัน ดอน นา ดอน โปละ. อึณ ยี มูห เฆ อี กอย แคง มืง บรีม อัน, มี เฆ ตู โรวเซ อัน.” 58โกบ ตู หณึม เฆ, อัน ตู โกบ โบง นา หมึอม อาม กาเซา ดี ตี.

Currently Selected:

มท 13: pce

Highlight

Copy