ฮบ 10

1ดารา เฆ ดูอี อายูดา ตึอน, อึณ ตู มูห อี หมาน อาคาคัร อี ดี ตัห วาย นี. อึณ ปี กามึก อี บยัะ ลอง อึณ มึห อี หมาน อาคาคัร อี มูห อี หมึอม, อี ดี ตัห วาย นี. โคว, โกรว ปี หลู เฆ ดอน ซีนัม ดอน ซีนัม, อึณ ตู ปึอน โบง แตห เฆ อี ตัห กรึบ เฌาพรา ตี แบน ดูอี หมึอม อี เฌะฌูง. 2เซ ปี ดี หลู เฆ ตี นับ ดี แตห เฆ แบน ดูอี หมึอม อี เฌะฌูง, เฆ อาว ฮู โลว วี หลู แบน เฌณ แบน เฌณ. หมาบ เฆ มืร อาว ฮู มึห. โคว, อึณ แฮะ ฮอต ฆ็อห แวน. ปาย ตี, เฆ มืร อาว ฮู โลว โยว ดี คัม หมาบ เฆ. 3มาแล, ปี ดี หลู เฆ ดอน ซีนัม ตี, อึณ แบน อี ดัม ซาดีก ดี ดูอี, แตห เฆ โหลห หมาบ เฆ. 4โคว, หนาม มามัก เฆ หนาม มาแป, อึณ ตู แป ดี ฆ็อห แวน หมาบ ดูอี ดอ เหมา.

5โคว อัน ตี ดอ ตัห เฌา เยซู แดง กาดาย นี, อัน บอ กาลาง ดี เฌาพรา ต็อห, “แม เฌา ตู ซี ปึอน ปี ดี หลู อี มูห โดว ซัดดาวา. บอ ปี หลู อาโมยว เฮา แม ตู โลว. แม เฌา ยี ดัว โดว โบ็ง ดี โอว, แตห อึณ แบน ปี ดี หลู. 6แม เฌา มืร ตู อึง ปี หลู อี โดะ ดี เงา บอ ปี หลู อี ฆ็อห แวน หมาบ. 7โอว วี ต็อห ดี แม, ‘อึย แม เฌาพรา, โอว แฮะ กอย ดี นี, โอว ดี โบง โดบ ปี อึง แม เฌาพรา, แตห อึณ โดบ แปะ แฮะ แดม อูน ลอง โอว แคง บับ เฌาพรา.’” เฌา เยซู แฮะ กาลาง ปาย ตี. 8ดอ กาลาง เฌา เยซู โฆรห ตี, อัน แฮะ ต็อห ดี อาต, “ปี ดี หลู โดว ซัดดาวา บอ ปี ดี หลู แบน โมยว แบน โมยว, ปี หลู อี โดะ ดี เงา บอ ปี หลู อี ฆ็อห แวน หมาบ, อาว มูห ปี อึง แม เฌา. แม เฌา มืร ตู ซี ปึอน.” ปี ดี หลู ฌึร ตี ดอน โมยว ปี บอ มูห ปี ดัม ดารา, อัน มืร แฮะ ต็อห ปาย ตี. 9แฮะ ฮอต อัน ปี วี ต็อห, “อึย แม เฌา, โอว แฮะ ฮอต ตัห, แตห โอว ปึอน ดี โบง โดบ ปี อึง แม เฌา.” อัน กาลาง โฆรห ตี โกบ แฮะ แวน อัน อี บรีม, แตห อึณ มึห อี กามาย. 10โกบ ปี อึง เฌาพรา ตี, เอ ปึอน ดี แบน ดูอี อี ซีงา บอด. โคว, เฌา เยซู แฮะ คัม ดี หลู โดว อัน อู เฌณ ตี, แกวะ แตห อึณ ซี โลว หลู ปอ อึณ ปัว ดอ เหมา.

11เฆ ดูอี อี หลู ดี เฌาพรา อี กอย แดง กาดาย นี, เฆ บอ หลู ปี ดี โลว หลู แบน เฌณ แบน เฌณ, ดอน ซีแง ดอน ซีแง. ปี หลู เฆ ตี ยี ตู แป ดี ฆ็อห แวน หมาบ ดอ เหมา. 12อี มูห เฌา เยซู, อัน ยี หลู ปี ดี หลู อู โมยว อี ฆ็อห แวน หมาบ. ปี หลู อัน ตี, อึณ ยี มึห อาฆยึร เซเซ. แฮะ ฮอต หลู, อัน วี กอย บลาก อาอัห เฌาพรา. 13ซีณ ดอ โฮะ อัน กอ ฌัม ดอ ตี นี, อัน บอ กอย ดี ตี บัร, แตห อึณ กอ ฌัม ปัน ดี แตห เฌาพรา อัน แณต โตต รันซู อัน บอกาเฆลียด. 14โกบ แฮะ หลู อัน ปี ดี หลู อู เฌณ ตี, อึณ แตห เฆ อี หณึม บึง อัน ปึอน น็อห ซีงา บอด บอ แบน ดูอี หมึอม, อี เฌะฌูง เซเซ.

15บอ น็อห พึอม เฌาพรา แฮะ กาลาง ลอง อัน ตี ดี เอ. อัน แฮะ ต็อห, 16“อานี แฮะ มูห ปี ดี กาแซณ โอว ดี เฆ. วาย อัน ตี โอว เฌาพรา ดี วี แตห ดารา โอว ลึบ แคง น็อห เฆ. โอว ดี แตห เฆ เฌณฌา ลอง อัน ตี เซเซ.” 17แฮะ ฮอต อัน เฌา ปี วี ต็อห, “หมาบ แปะ แฮะ กาลึบ เฆ, โอว มืร ฮู โหลห ดอ เหมา.” 18ปาย ตี, เซ หมาบ เอ แฮะ ฮอต ฆ็อห แวน, อาว ฮู โลว วี หลู ปี ดี หลู อี ฆ็อห แวน หมาบ ปอ อู เฌณ.

19อึย เบ บีนอง โอว, เฌา เยซู แฮะ คัม ดี ยัม กาดาง เอ, แตห เอ มึห น็อห ยัะ ดี ลึบ ฌัม โดง อี บอด หลึอม โตต. 20แตห เอ โดบ อึณเตณ ปี อึณปราย เฌา เยซู ดี เอ. อึณ มูห อึณเตณ กามาย อี แตห เอ ปึอน อาซาก กามาย. เซ เอ โดบ อึณเตณ ตี, อึณ ปี เอ แฮะ ปึอน ดี กาโลห บีก ฆ็อง ตึอน, แตห เอ ลึบ แคง โดง บอด หลึอม โตต. บีก ฆ็อง ตี ยี บยัะ ลอง เฌา เยซู อี แฮะ คัม ดี ยัม กาดาง เอ. 21ปาย ตี บอ เอ แฮะ มึห ดูอี อี หลู ดี เฌาพรา อี บอด มยาด, อี แฮะ อึบ แคง ฆางหราว. 22โคว อัน ตี แตห เอ ตัห กอย กาดึก กาด็อะ ดี เฌาพรา. โกบ มึห เอ น็อห ซืร บอ น็อห หณึม ซีคยา, โกบ มึห เอ บอ น็อห ฮู โหลห หมาบ บอ โกบ มึห เอ โดว โบ็ง อี ปี แฮะ บาย แคง อึม อี ซีงา, เอ ปึอน ดี กอย กาดึก กาด็อะ ดี เฌาพรา. 23แกวะ แตห เอ มึห น็อห กาลีง กาแล, แตห น็อห เอ มัน ซีคยา ลอง ปี หน็อะ อึณด็อะ เอ ปี กาลาง เอ ดี อี เฮา. โคว, อัน เฌา อี แฮะ ดัว กาดีก ซัดฌา, อัน ดี โบง แคะ ปี กาลาง อัน เซเซ. 24แตห เอ กาดัวะ กาพา, เหมา เอ ดี ปาย ดี ลาย กาซูห, แตห เอ ลาย ร็อก บอ โบง นา บอด นา หมึอม. 25ดอ ตัห กาฌูะ เฆ ดูอี อี หณึม เฌา เยซู, อึณ มึห มัง อี อี ตู ตัห. แกวะ แตห เอ โบง ปาย ตี. แตห เอ ออน ดี ลาย กาลาง แตห อึณ แบน โปลม แบน แฮณ ดี น็อห. แตห เอ แว กาลาง ลอง อัน ตี โกบ แฮะ นับ เอ, ซีแง ดี ตัห เฌาพรา แฮะ กาตัด ดี ฌัม.

26เซ เอ แฮะ ฮอต มึห อางยาน อี แตห เอ นับ นา มูห นา หมาน, เซ เอ ยี วี โบง ฮาว หมาบ ปี บรีม, อาว ฮู มึห ปี ดี หลู อี ดี ปึอน ฆ็อห แวน หมาบ ปอ อู เฌณ. 27ดูอี ฌึร ตี, อึณ ฆีด บัร มี ปัน ดี ดัม เฌาพรา หมาบ อี หมึอม โยว กาเซา ดี อัน. อัน บัร มี ปัน ดี กาซึม เงา ดี เฆ อี กาบัห ดี เฌาพรา. 28ดอ มึอน, เซ อึณ มึห ดูอี อี แฮะ แวน ดารา อาโมวแซ ตึอน, เซ แฮะ มึห อา วี, โอย วี อี แฮะ ยึร ลอง อัน ตี, อาว ปึอน กาเว อัน. อัน ดืน ดี โลว ยัม. 29โกบ อึณ ปาย ตี, เซ อึณ มึห ดูอี อี ลูกตาย ฆอน เฌาพรา บอ ต็อห, ปี กาแซณ เฌาพรา ดี ดูอี โกบ แฮะ คัม เฌา เยซู ดี ยัม, อึณ ตู มึห ดีโคว, เซ อึณ บอ มึห ดูอี อี ตู โรวเซ น็อห พึอม เฌาพรา อี นับ ดี เฆฌู เอ, ดูอี วี ตี ดี โลว คัม หมาบ กืน หลึอม ดูอี อี แฮะ แวน ดารา ตึอน. 30โคว, เอ แฮะ นับ อัน เฌา อี แฮะ ต็อห, “โอว อี ดี โบง เวียะ ปี ลูต เฆ.” เอ แฮะ นับ, อัน เฌา แฮะ กาลาง ปอ อู เฌณ ต็อห, “เฌาพรา อี ดี ดัม หมาบ ดี เฆ ดูอี ปี อึบ อัน.” 31เฌาพรา ยี มูห อัน เฌา อี อีม เซเซ. เซ อัน ดี บยัะ ปวน อัน ดี เอ, อึณ หมึอม โยว กาเซา.

32แตห เบ วี โหลห ปี ปาย เบ อาต นี. ดอ แฮะ ฮอต เบ แตห บลาง เฌาพรา ลึบ แคง น็อห เบ, เบ ปี บอ แฮะ คัม ดูก ตาง กาเซา มืร, เบ ยี ตู ชึม มาเซ โกบ อี ดูก อี หณาบ ดี น็อห เบ ตี. 33มัง เฌณ เบ แฮะ คัม อี เฮา แนนัะ เบ บอ คาหนาบ เบ. มัง เฌณ เบ แฮะ โพรม ดี คัม ดูก โดบ อี เฮา. 34เบ มืร แฮะ กาเว เฆ อี แฮะ โจห แคง กาปึม. ดอ มึห อี ตัห โฌน ตัห พาด ดึห โกรวกราม เบ, เบ บอ โคย ดาคึย, ตู แคร เฆ. โคว, เบ แฮะ นับ, เบ มึห โกรว อี กอย เซเซ, อี แฮะ บอด แฮะ หมึอม หลึอม โกรว ปี พาด เฆ ตี.

35โกบ อึณ ปาย ตี, แกวะ แตห เบ แวน น็อห ยัะ เบ, อี ดี แตห เบ ปึอน อาฆยึร อี กืน กาเซา. 36เบ โลว มึห น็อห อี คัม ดี ยืน เหลณ, แตห เบ ปึอน ดี โบง โดบ ปี อึง เฌาพรา. เซ เบ แฮะ ฮอต โบง ฌึร ตี ดอน โมยว, เบ ดี บอ ปึอน แปะ แฮะ กาแซณ เฌาพรา ดี ดัว ดี เบ. 37โคว, แคง บับ เฌาพรา อึณ แฮะ แดม อูน ต็อห, “อาว ฮู เหลณ, อัน เฌา อี แฮะ ต็อห ดี ตัห, อัน ดี ตัห ครัน ครัน, อัน ตู แกร. 38มาแล, ดูอี ปี อึบ โอว, อี มึห น็อห ซืร น็อห หมาน, อัน ดี หณึม บึง โอว เซเซ. โคว, อัน ดี ปึอน อาซาก กามาย. อาเซ ยี ตู หณึม บึง โอว เซเซ, โอว มืร ตู อึง ดูอี วี ตี.” 39อี มูห เอ, เอ ยี ตู มูห ดูอี อี ตู หณึม, อี ดี ชึม. เอ มูห ดูอี อี หณึม ซีคยา. เฌาพรา มืร แฮะ คยอด เอ.

Currently Selected:

ฮบ 10: pce

Highlight

Copy

Compare