ฮบ 11

1เซ เอ หณึม, เอ มืร นับ ซีคยา, ปี หน็อะ อึณด็อะ เอ แฮะ มูห แฮะ หมาน. เอ บอ นับ ซีคยา, ปี ตู ยึร เอ แฮะ มึห อาคัร หมาน. 2เฆ ดูอี บาน ดอ มึอน แฮะ หณึม ปาย ตี. โคว, เฌาพรา มืร แฮะ อืบ มยูก เฆ.

3โกบ หณึม เอ, เอ แฮะ นับ, เฌาพรา แฮะ กาลาง แตห อึณ มึห เบลณ เฆ กาดาย. ดอ พาน เบลห อัน เฌา แบน โมยว แบน โมยว, อัน แฮะ ดึห โมยว อี ตู ปึอน ยึร, โบง แตห อึณ วี แบน โมยว อี แฮะ ปึอน ยึร.

4โกบ หณึม อาแบ ตึอน, อัน มืร หลู อี หมึอม หลึอม ปี หลู อากัณ ตึอน. โกบ หณึม อัน ปาย ตี, เฌาพรา มืร ต็อห, อัน มูห ดูอี อี มึห น็อห ซืร น็อห หมาน. เฌาพรา มืร แฮะ กาลาง ปาย ตี โกบ ยึร อัน ปี หลู อาแบ ตี. โกบ หณึม อาแบ ตี, อัน ปี บอ แฮะ ฮอต ยัม มืร, แปะ แฮะ โบง อัน, อึณ ยี มาโนว เอ ฌัม ดอ ตี นี.

5โกบ หณึม อาเฮน ตึอน, อัน มืร ตู โลว ยัม. เฌาพรา แฮะ ดึห โฮะ อัน โดง กอย เฌาพรา. อาว ฮู มึห อาเซ อี วี ยึร อัน. โคว, เฌาพรา แฮะ ฮอต ดึห อัน. อาต ดึห โฮะ เฌาพรา ดี อัน, อึณ มึห อี กาลาง ลอง อัน ต็อห, อัน มูห ดูอี อี ล็อะ น็อห เฌาพรา. 6เซ เอ ยี ตู หณึม, เฌาพรา มืร ตู อึง. อาว ล็อะ น็อห เฌาพรา. โคว, อาเซ ตัห กรึบ เฌาพรา, อัน โลว หณึม, แฮะ มึห เฌาพรา. อัน บอ โลว หณึม, อัน เฌา ดี ดัว อาฆยึร ดี เฆ ดอน อี อี ซี นับ อัน.

7โกบ หณึม อาโนว ตึอน, เฌาพรา มืร กาลาง แตห อัน นับ อี ดี ปาย นา อาต ฮาว ปี หณัม ปึอน ยึร. อัน บอ โทม โฆรห ปี กาลาง เฌาพรา ตี บอ โบง รึร ซังโพว ตาง, แตห อึณ คยอด บอ อัน บอ ดูอี แคง อึณโฮม อัน. อี มูห เฆ ดูอี เฮา, เฆ บอกาเฆลียด ยี โลว คัม หมาบ เฆ. อาโนว ยี แฮะ ปึอน น็อห ซืร น็อห หมาน ปี ดัว เฌาพรา โกบ หณึม อัน.

8โกบ หณึม ดา อาบราฮัม ตึอน, อัน มืร โทม โฆรห เฌาพรา ดอ ต็อห เฌาพรา ดี อัน, แตห อัน ฮาว ดี มืง ปี ดี ดัว เฌาพรา ดี อัน, แตห อึณ แบน มืง อัน. อัน ปี บอ ตู นับ นา ดี ฮาว, อัน ยี เลห ฮาว โดง กอย บรีม อัน. 9โกบ หณึม อัน, อัน ปึอน ดี กอย แคง มืง อี เฮา ปี แคต. อึณ มูห มืง แปะ แฮะ ต็อห เฌาพรา ดี ดัว ดี อัน. อัน บอ กอย แคง ทึบ บีก. บอ อาแซก บอ อาโกบ กอย ปาย ตี. โคว, กาดีก ซัดฌา แปะ แฮะ ดัว เฌาพรา ดี อาบราฮัม, อัน แฮะ ดัว บอ ดี ฆาย. 10อาบราฮัม แฮะ กอย ปาย ตี โคว, อัน หน็อะ อึณด็อะ บอ บัร ดี ลึบ แคง มืง แปะ แฮะ แด เฌาพรา, อี กอย เซเซ.

11โกบ หณึม อาบราฮัม, อัน ปี บอ แฮะ กัด, อัน ยี แฮะ ปึอน ฆอน. บอ อีบึณ อัน อี มูห นาง ซาราย อี แฮะ หมัน, อัน ยี วี ปึอน ดี แด บาดีก ซันเท ดอ แฮะ กัด กาเซา อัน. อาบราฮัม แฮะ นับ, เฌาพรา ดี โบง โดบ กาดีก ซัดฌา แปะ แฮะ ดึอม ดัว อัน. 12อาบราฮัม ตี, อัน ปี บอ แหนน ดูอี อี แฮะ ฮอต ยัม มืร, อัน ยี แบน ฆูณ ดัง เฆ ดูอี กืน กาเซา. หลูกหลาน อัน มืร กืน กอ ปี ซีมัณ อี กอย แคง เบลณ. เฆ บอ กืน ปี กาฮาต อี กอย โคบ อึม นัมมูกซารา กอ ฮู นับ ดี ตีห.

13ดูอี เฆ ตี, ดอ ยัม เฆ, เฆ บอกาเฆลียด หณัม ปึอน โตต แคะ ปี ต็อห เฌาพรา ดี ดัว. เฆ ยี หณึม บึง เฌาพรา เซเซ. เฆ ปี ซัะ ปึอน แปะ แฮะ กาลาง เฌาพรา ดี ดัว, อึณ ยี ปี เฆ แฮะ ปึอน ยึร, ยี ซี กอย กาโต็ง. เฆ บอ บัร ดี รับ. เฆ มืร แฮะ นับ ซีคยา, เฆ ปี แคต ดอ กอย เฆ แดง กาดาย นี. 14ดูอี อี แฮะ เบลห น็อห เฆ ปาย ตี, อึณ ลึห ซีคยา, เฆ เหรต มืง ปอ อู โมยว, โดง ปึอน กอย เฆ เซเซ. 15เซ เฆ ยี วี โหลห มืง บรีม อี มูห โดง ดึอม เลห ตัห เฆ, เฆ แฮะ ปึอน วี เวณ. 16มาแล, เฆ ยี หน็อะ อึณด็อะ มืง อี หมึอม หลึอม ตี, อี มูห มืง ฆางหราว. โคว, เฌาพรา มืร ตู ซาย ดอ ต็อห เฆ, เฌาพรา มูห เฌาพรา ปี กรึบ เฆ. อัน มืร แฮะ แรน อูน มืง อู มืง อาดา เฆ.

17โกบ หณึม อาบราฮัม ตึอน, อัน บอ คัม ดี หลู ฆอน อัน อี จืร อาแซก, แตห อึณ ปี อี หลู โดว ซัด. ปาย ตี เฌาพรา แฮะ ต็อห ดี เทว น็อห อาบราฮัม. อัน ปี บอ แฮะ ปึอน กาดีก ซัดฌา ปี ดัว เฌาพรา ลอง ฆอน อัน, อัน ยี คัม ดี หลู ฆอน วี ตี. 18โบ็ง หมาน อัน, เฌาพรา แฮะ ฮอต กาลาง อูน ดี อัน ต็อห, “โกบ อาแซก ตี, แม ดี มึห หลูกหลาน กืน.” 19อาบราฮัม แฮะ ฮอต นับ, เฌาพรา แฮะ มึห ปวน ดี แตห อาแซก วี อีม วาย แฮะ ฮอต ยัม อัน. โคว, อัน มืร โทม โฆรห เฌาพรา, ต็อห ดี ง็อห หลู อาแซก. วาย อัน ตี อึณ บอ ปี, เฌาพรา แฮะ วี ดัว อาแซก ดี อาบราฮัม วาย แฮะ ฮอต ยัม อัน.

20อาแซก ตี, โกบ หณึม อัน, อัน มืร ม็องการา ดัว ดี อาโกบ ฆาย อาโซว, แตห ฆาย นับ อี ดี ปาย นา อาต ฮาว.

21โกบ หณึม อาโกบ ตึอน, อัน วี ม็องการา ดัว ดี ฆอน อาโยว อา วี ตึอน ดอ แฮะ กาตัด อัน ดี ยัม. ดอ อัน ตี อัน บอ ฆึบ ดี อึณกรวน อัน, วี กรึบ เฌาพรา.

22โกบ หณึม อาโยว, อาต ยัม อัน, อัน แฮะ กาลาง อูน ลอง เฆ ดูอี อีซาเรลัะ ดี เลห แคง มืง แอฆึบ. อัน บอ ดัม เฆ, แตห เฆ ดึห ฮาว บอ กาอาง อัน.

23โกบ หณึม ฆูณ มา อาโมวแซ ตึอน, ดอ ฆึอด อาโมวแซ, ฆาย แฮะ ดึห เครียง อัน อาดา โอย มาเฆียน. โกบ แฮะ ยึร ฆาย, อารึบ ฆอน ฆาย ตี แฮะ ชีด, ฆาย มืร อาว ฮู โยว อามีง ปี ดัม อูน คูนดีคัม พาโรว ตึอน.

24โกบ หณึม อาโมวแซ, ดอ แฮะ วี ตาง อัน, อัน ตู ซี แตห อี นับ ลอง มูห อัน ฆอน นาง อี มูห ฆอน ดีบยา คูนดีคัม พาโรว. 25อัน บอ มึห น็อห ซี คัม ดูก ดีรึม โดบ เฆ ดูอี อาโมยว ปี อึบ เฌาพรา. อัน ตู ซี กอย โดง โบยว ดาคึย อาดา อู กาจัน อู กาบรึห. อัน มืร ตู ซี โบง แบน โมยว แบน โมยว อี แบน หมาบ ดี อัน. 26อัน แฮะ นับ, เซ อัน คัม ดูก คัม อี แนนัะ ปี โลว คัม ดูอี โกบ หณึม เฆ เฌา เยซู, อึณ แฮะ หมึอม หลึอม โกรวกราม อี ง็อห ตาง อี กอย แคง มืง แอฆึบ. อัน โบง ปาย ตี โคว, อัน หน็อะ อึณด็อะ ดี ปึอน รูห ปี ดี ดัว เฌาพรา ดี อัน วาย นี. 27โกบ หณึม อาโมวแซ, อัน มืร ตู โยว คูนดีคัม พาโรว ดี รู จาว ดี อัน. อัน บอ เลห ตัะ มืง แอฆึบ. โกบ หณึม บึง เฌาพรา, อึณ ปี อัน แฮะ ยึร เฌาพรา ปี ตู ปึอน ยึร ดูอี. 28โกบ หณึม อัน, อัน บอ โบง แปะ แฮะ จัร เฌาพรา อัน โบง, อัน บอ กาลาง แตห เฆ ดึห หนาม มาบู, พ็อห ดี มา มาโลห, แกวะ แตห อามู อามาด เฌาพรา ง็อห ยัม ฆอน อีมาย เฆ อี มูห ฆอน ฆีณ, แตห เฌาพรา กาโลห กาง เฆ. แกวะ แตห อัน โบง ดี ดูอี อีซาเรลัะ ปี ปี โบง อัน ดี ดูอี แอฆึบ.

29โกบ หณึม เฆ ดูอี อีซาเรลัะ, เฆ มืร ปึอน ดี กาโลห อึม ตาง อี จืร อึม ดีโหนง เรณ. เฆ กาโลห อึม ตี ปี เฆ ฮาว แดง กาดาย เฮณ. ดอ วี ตัห เฆ ดูอี แอฆึบ, ดอ ซีงยา ฮาว โดบ เฆ ปาย ตี, อึม บอ วี ตัห อึณปูน ยัม โตต เฆ.

30โกบ หณึม เฆ ดูอี อีซาเรลัะ, เฆ แฮะ แลบ แรง มืง เยรีโคว ตึอน อาดา บู ซีแง. แฮะ ฮอต, แรง มืง ตี บอ ดีฆล็อห โจห อู เฌณ.

31โกบ หณึม นาง ราฮาบ อี มูห ยา มาลัม ตึอน, อัน มืร ตู ลึร ชึม ปี เฆ ดูอี อี ตู โทม โฆรห เฌาพรา. โคว, อัน แฮะ รวห เครียง ซีคยา เฆ ดูอี อีซาเรลัะ อี แฮะ ปรา ดี ตัห คยอง ดี ลึบ มืง ตึอน.

32แดง ตี, เบ ซี แตห โอว กาลาง ปอ อึณ ปัว? อึณ ดี โต็ง กาเซา เซ โอว กาลาง บอ ลอง อากีดีโอน, บอ อาบารัก, บอ อาซามโซน, บอ อาเยพาดา, บอ ลอง อาดาวีด เฆ อาซามูเอน, บอ ลอง เฆ ดูอี อี บยาน โฆรห เฌาพรา ตึอน. เซ โอว ดี กาลาง ลอง เฆ ตี, อาว นับ ดี โตต. 33ดูอี เฆ ตี, โกบ หณึม เฆ, เฆ แฮะ กาโฆห บอ แป มืง อี เฮา. เฆ แฮะ ซูงพยาด อามู อี บอ ปึอน แคะ ปี ต็อห เฌาพรา ดี ดัว. เฆ บอ ปึอน ดี กาบีด โมต มาครังซี. 34เฆ แฮะ ดึอม บยัด บอ เงา อี กูห แฮณ กาเซา. เฆ มืร แฮะ ลอด อาเพ อาเร ดี มาปัวะ ลาง เฆ บลา เลียห. ดอ ดีหลัห อึณจัม เฆ, เฆ แฮะ วี มึห โปลม มึห แฮณ กืน. เฆ วี ปึอน ดี กาโฆห ดี ดา ซึก ดูอี อาโมยว เฮา. 35อึณ บอ มึห อีบึณ, โกบ หณึม เฆ, เฆ มืร แฮะ วี ปึอน วีว ฆอน เฆ อี แฮะ วี ยีต วี อีม วาย แฮะ ฮอต ยัม เฆ. ดูอี เฆ ตี มัง อี, เฆ แฮะ คัม ปี คาหนาบ อี เฮา บอ คัม ดูก กาเซา. เฆ มืร ตู โลว ดี กอย ทังฮาง. เฆ ซี ปึอน อาซาก อี หมึอม หลึอม อาซาก เฆ ตี. 36มัง อี เฆ แฮะ คัม ปี พยาก ปี แนนัะ อี เฮา, แฮะ กาดูห บอ อี มัห อี ปัก เฆ, แฮะ โจห บอ แคง กาปึม. 37เฆ แฮะ คัม บอ อี เฮา ดึห มาว, วึณ ดี เฆ. เฆ แฮะ คัม บอ อี เฮา ดึห เลกลึร, กาซัวะ เฆ แบน ตอน แบน ตอน. เฆ บอ กาดูห ดี ยัม ดี มาปัวะ ลาง. เฆ กาดูห ดี ชึบ ดี ตา ฮูน มาบู เฆ ฮูน มาแป โกบ ตู มึห เฆ ครึง ดี ตา. เฆ บอ คัม ดูก ปี คาหนาบ อี เฮา. 38โกบ หณึม ดูอี เฆ ตี, เฆ แฮะ กาอาบ กอย โดง หมึอม หลึอม กาดาย นี. มาแล, ดอ กอย เฆ แดง กาดาย นี, เฆ ยี โลว ฮาว วีว ฮาว เวณ แคง แปร กาฮ็อห, บอ โลว โฮะ กอย แดง นอน. เฆ บอ โลว เครียง แคง กาเดา มาว บอ แคง กาเดา กาดาย.

39เฌาพรา แฮะ ต็อห ลอง ดูอี เฆ ตี, เฆ แฮะ หณึม ซีคยา. เฌาพรา ปี บอ อืบ เฆ ปาย ตี, เฆ ยี ตู ปึอน ปี ต็อห เฌาพรา ดี ดัว ดี เฆ. 40โคว, ดอ กอย เฆ ดอ มึอน, เฌาพรา แฮะ ฮอต แรน อูน อาดา เอ อาโมยว อี แฮะ หมึอม หลึอม กาดีก ซัดฌา แปะ แฮะ ดัว อัน ดี เฆ. เฌาพรา ยี โบง แตห เฆ เฌะฌูง รึม โดบ เอ.

Currently Selected:

ฮบ 11: pce

Highlight

Copy

Compare